Tapaxkit kilhchanima tuku makgkatsiyaw xpalakata achatum. Tiku paxkinan limasiya tuku wan chu tuku tlawa, maski wi tuku nalimakgxtakga.

Moisés limasiyalh pi xpaxki Dios. ¿La tlawalh? Putum kilhtamaku kgalhakgaxmatli. Chuna la wan 1 Juan 5:3: «Xampi wa yuma liwi lantla napaxkiyaw Dios, mpi natlawayaw ntu wan xlimapakgsin». Maski tuwa o ni tuwa xwanit xlimapakgsin Dios, la akxni wanika pi xʼalh tachuwinan faraón xalak Egipto o akxni skinika pi kaj xlimakalh xlixtokgo kxaSpinini pupunu, Moisés chuna xtlawa la xwanikan (Éxodo 40:16).

Moisés na limasiyalh pi xkapaxki israelitas. Xlakan xkatsikgo pi Jehová xmaklakaskima Moisés xlakata xkapulalilh, wa xlakata kskinikgo xtamakgtay akxni xkgalhikgo taʼakglhuwit. Biblia wan pi «tsisa asta kakgotanun lakgankgolh israelitas Moisés» (Éxodo 18:13-16). Kaj kalakpuwanti la xlilhuwa xtlakgwan xlakata tantaku xkakgaxmatni xtaʼakglhuwitkan. Pero xatapaxuwan xtlawa xlakata xkapaxki.

Ni kajwatiya kakgaxmatnilh, Moisés na tlawalh oración xpalakatakan. Asta xtlawa oración xpalakatakan tiku xtlawanikgonit tuku nitlan. Akgtum liʼakxilhtit, akxni Míriam xtala Moisés nitlan lichuwinalh, Jehová tlawalh pi Míriam xpasalh lepra. Moisés ni lipaxuwalh tuku tlawanika Míriam wata tlawalh oración xpalakata chu wa: «¡Dios katlawa litlan! ¡Katlawa litlan, kamapaksa!» (Números 12:13). Akxni tlawalh uma oración limasiyalh xtapaxkit.

Pi lu kilipaxkitkan Dios, xlakata uma natlawa nakgalhakgaxmataw xlimapakgsin xliputum “kinakujkan” (Romanos 6:17). Akxni xliputum kinakujkan kgalhakgaxmataw lu lipaxuwa (Proverbios 27:11). Akxni xatapaxuwan skujnaniyaw Dios na tlan kinkakitaxtuniyan, xlakata akxni tlawayaw tuku lakgati kinkamakgapaxuwayan (Salmo 100:2).

Na wi tuku nalimakgxtakgaw xlakata kapaxkiyaw amakgapitsin. Akxni kiʼamigoskan o kifamiliajkan kinkalitachuwinankgoyan xtaʼakglhuwitkan, xlakata kapaxkiyaw 1) nalimaxtuyaw kinkilhtamakujkan xlakata nakakgaxmatniyaw, 2) namakgkatsiyaw xtalipuwankan chu 3) nakamamakgkatsiniyaw pi xlakaskinka kaʼakxilhaw.

Chuna la Moisés, tlan nakapalakaskinaw kkiʼoracioneskan tiku kapaxkiyaw. Namin kilhtamaku ni katikatsiw la nakamakgtayayaw chu max kajwatiya nakawaniyaw: «Kakintapati, nila kmakgtayayan pero tlan naktlawa oración mimpalakata». Kalakapastakti pi «xʼoración nti akgstitum lama, mpi xlipaks xnaku litlaway, lhuwa [makgtayanan]» (Santiago 5:16). Kioracionkan natlawa pi Jehová namakgtaya tiku palakaskimaw maski max nichuna xlakpuwanit. Lu kamakgtaya akxni tlawayaw oración xpalakata tiku kapaxkiyaw. *

¿Nixlikana pi lhuwa tuku kinkamasiyaniyan Moisés? Maski xla makglakgalhina xwanit la akinin, kinkawilinin lu tlan liʼakxilhtit xlakata takanajla, tataktujut chu tapaxkit. Kaliskujwi xlakata natlawayaw la Moisés chu nakgalhiyaw lhuwa tasikulunalin chu nachuna amakgapitsi (Romanos 15:4).