Moisés chixku tiku xtataktuju
¿TUKU WAMPUTUN TATAKTUJUKAN?
Tataktujukan wamputun pi ni tlankajwa nawankan. Tiku tataktuju ni lanka makgkatsikan kxlakatin amakgapitsin. Tiku tataktuju na xlilakapastakat pi ni putum tlan tlawa.
¿LA LIMASIYALH MOISÉS PI XTATAKTUJU?
Moisés ni mastalh talakaskin pi tlanka xlimakgkatsika xlakata limapakgsin nema maxkika. Akxni chatum chixku maxkikan limapakgsin, lakapala litasiya komo tataktuju o tlanka makgkatsikan. Robert G. Ingersoll, chatum akgchuwina xalak siglo XIX wa: «Komo xlikana katsiputuna la likatsi chatum chixku kamaxki limapakgsin». Xlakata uma, Moisés wililh lu tlan liʼakxilhtit xlakata xtataktuju.
Jehová maxkilh lhuwa limapakgsin xlakata lakgayawalh nakapulalin israelitas. Pero Moisés ni tlanka limakgkatsika. Kaʼakxilhwi tuku tlawalh akxni kgalhskinka xlakata akgtum taʼakglhuwit (Números 27:1-11). Uma lu xlakaskinka xwanit xlakata tuku xlaksakli wa xmaklakaskinkgolh la liʼakxilhtit tiku xlatamakgolh alistalh.
¿Tuku tlawalh Moisés? ¿Lakpuwa pi xlakata wa xpulalin kachikin Israel, xkatsini la xlakkaxtlawalh? ¿Lipawa xliskgalala, tuku xkatsininit kxlatamat o lakpuwa pi liwana xkatsi la lakapastaka Jehová?
Chatum tiku tlanka makgkatsikan chuna xtitlawalh, pero Moisés ni chuna tlawalh. Biblia kinkawaniyan pi «Moisés wililh taʼakglhuwit kxlakatin Jehová» (Números 27:5). ¡Kalakpuwanti! Maski xtitaxtunita 40 kata xpulalima kachikin Israel, Moisés chuntiya xlipawan Jehová chu ni xakstu xlipawankan. ¡Uma litasiya pi Moisés lu xtataktuju!
Moisés ni xlakpuwan pi kaj xakstu xkgalhilh limapakgsin. Akxni Jehová na kamaklakaskilh amakgapitsi israelitas xlakata palakachuwinanin xwankgolh, ni sitsilh; wata paxuwalh (Números 11:24-29). Akxni xputiʼatlat wanilh pi xkalakgayawalh amakgapitsi tsinu taskujut nema xkgalhi, Moisés chuna tlawalh (Éxodo 18:13-24). Chu maski tliwakgaku xwanit akxni kgololh, Moisés skinilh Jehová pi xlaksakli tiku xtawilalh xlakgxokgo. Wa Josué tiku laksakka chu Moisés xliputum xnaku makgtayalh. Nachuna, kawanilh kachikin pi kstalanikgolh Josué tiku xʼama katamaknu kTiyat nema xKawanikanit Nakamaxkikan (Números 27:15-18; Deuteronomio 31:3-6; 34:7). Tlan nawanaw pi Moisés lu xlakaskinka akxilhli nakapulalin israelitas xlakata xkakninanikgolh Dios. Pero tuku tlakg xlakaskinka xakxilha wa pi tlan xkakitaxtunilh israelitas nixawa limapakgsin nema xkgalhi.
¿TUKU KINKAMASIYANIYAN XLIʼAKXILHTIT?
Nikxni kamastaw talakaskin pi tlanka nakinkalimakgkatsikanan xlakata kgalhiyaw limapakgsin o wi tuku katsiyaw tlawayaw. Jehová tlakg xlakaskinka akxilha ni tlankajwa nawanaw nixawa tuku katsiniyaw tlawayaw (1 Samuel 15:17). Komo xlikana tataktujuyaw, nastalaniyaw uma lu tlan tachuwin xalak Biblia: «Kalipawanti Jehová xliputum minaku, chu ni wa mintalakapastakni kalipawanti» (Proverbios 3:5, 6).
Xliʼakxilhtit Moisés na kinkamasiyanin pi ni lu xlakaskinka naʼakxilhaw tuku lakgayaw o limapakgsin nema kinkamaxkikanitan.
¿Kinkamakgtayayan natataktujuyaw chuna la Moisés? Xlikana pi chuna. Akxni xaxlikana tataktujuyaw, tlakg tlan katalalinaw amakgapitsin chu kinkapaxkikgoyan. Pero tuku tlakg xlakaskinka, kinkapaxkiyan Jehová, tiku litalakgapasa uma lu stlan tayat (Salmo 18:35). “Dios nipala tsinu kaʼakxilhputun wanti tlanka makgkatsikan wampi xla lhuwa lakgalhamankgo wanti yama xalaksmalhwan [o tataktujukgo].” (1 Pedro 5:5, Hua Xasasti Talaccaxlan, 1999.) Wa uma tuku kinkamakgtayayan natataktujuyaw la xtlawa Moisés.