Klakachilh kSanto Domingo niku tapakgsi República Dominicana; akit xaʼawatiya xlikgalhtati kinatalan. Kinatlatni lu lhuwa tuku xkatsikgo chu xlakaskinkgo pi xakkatalaliw tiku tlan likatsikgo. Akgtati kata akxni nina xaklakachin, kinatlatni kalakgapaskgolh makgapitsi misioneros mormones chu lu lakgatikgolh la xlikatsikgo, tlan xlhakganankgo chu liwana xtakaxtayakgo. Ni lhuwa kilhtamaku titaxtulh kifamiliajkan na wa xapulana xalak República Dominicana tiku makgtanukgolh kIglesia de Jesucristo de los Santos de los Últimos Días nema na kalilakgapaskan mormones.

Putum kilhtamaku xakmakgtlawa tuku xtlawakgo uma takanajla, pero tlakg xaklakgati xlakata lu xlakaskinka xʼakxilhkan familia chu nakgalhikan xalakwan tayat. Lu tlan xakmakgkatsi xlakata mormón xakwanit chu klakpuwa pi misionero nakwan.

Akxni kmakgatsilh 18 kata kifamilia ankgolh kʼEstados Unidos xlakata tlan xakkgalhtawakgalh kʼakgtum xatlan universidad. Akgtum kata titaxtulh, kinkuku chu xpuskat, tiku xtatayana Jehová xwankgonit, kinkalakgapaxialhnankgon kFlorida chu kinkawanikgon pi xakkataʼaw kʼakgtum lanka tamakxtumit. Lu klakgatilh pi putum xmalakikgo xBibliajkan chu xtsowilikgo tuku xwankan, wa xlakata, na kskilh kapsnat chu lápiz chu na ktsukulh tsokga tuku xlichuwinamaka.

Akxni sputli tamakxtumit kinkuku chu kinapa kiwanikgolh pi xlakata misionero xakwamputun, xkimakgtayaputunkgo xlakata tlakg xaklakgapasli Biblia. Akit klakpuwa pi lu tlan tuku xkiwanimakgolh, xlakata tlakg xaklakgapasa xlibrojkan mormones chu ni lu xaklakgapasa Biblia.

Akxni xʼankgonita chuntiya xaklichuwinanaw Biblia kteléfono. Putum kilhtamaku xkiwanikgo pi xaktamalakxtumilh kintakanajla tuku xwan Biblia.  Xlakaskinkgo pi kiʼakstu xakakxilhli tuku xaxlikana.

Xakkanajla lhuwa tuku xkimasiyanikanit kmormón pero ni xakkatsi komo tuku xmasiyakan anta xtakilhtinit kBiblia. Kinapa kimalakgachanilh revista ¡Despertad! 8 xla noviembre kata 1995 nema tlawakgonit xtatayananin Jehová, niku xlimin akgtiy artículo xlakata xtakanajlakan mormones. Kaks klilakawa xlakata ni lhuwa tuku xakkatsi xlakata tuku xmasiyakan kkintakanajla, wa xlakata, kputsalh kʼInternet kkimpaginajkan komo xlikana tuku xwan ¡Despertad!; chu xlikana tuku xlichuwinan. Pero tlakg kkanajlalh tuku xwan uma revista akxni kkilalh museo xla mormones nema wi kʼUtah.

Putum kilhtamaku xakkanajla pi xlibrojkan mormones chu tuku wan Biblia lakxtum xwanit. Pero akxni liwana ktsukulh likgalhtawakga Biblia kkatsilh pi xlibrojkan mormones ni xtalakxtum tuku masiya Biblia. Akgtum liʼakxilhtit, kEzequiel 18:4 wan pi lataman niy. Pero xlibrojkan mormones kAlma 42:9, wan pi lataman nikxni niy.

Ni kajwatiya xaklilakgaputsa tuku nitlan xmasiyakgo chu nachuna xlakata ni xkaʼakxilhputunkgo tiku atanu xkachikinkan. Akgtum liʼakxilhtit, mormones xmasiyakgo pi jardín xaʼEdén xwi kʼcondado xla Jackson, (Misuri, kʼEstados Unidos). Chu tiku pulalinkgo takanajla, wankgo pi «akxni namapakgsinan xTamapakgsin Dios namatalhmanikan xbanderajkan Estados Unidos, xaskulunku nawan, putum tlan nalatamakgokan chu nakamaxkikan chatunu tuku lakgchan».

Xaklakpuwan tuku xʼama akgspula kinkachikin chu amakgapitsi kachikinin akxni chuna xlalh. Akgtum kakgotanun kintachuwinalh kteléfono tiku xaklakgapasa chu xkgalhtawakgama xlakata misionero nawan chu kkgalhskilh xlakata uma. Lakatanks kkgalhskilh: «Komo minkachikin xtakgalhilh guerra atanu kachikin, ¿xkatalachipa mormones xalak kʼuma kachikin?». Kaks klilakawa akxni kiwanilh pi chuna xtlawalh. Chuntiya kputsananilh tuku xmasiyakan kkintakanajla chu kkakgalhskilh makgapitsi tiku xpulalinkgo takanajla, chu xlakan kiwanikgolh pi kintakgalhskinin alistalh xʼama takgalhti.

Lu ni klakgatilh tuku kiwanikgolh. Ktsukulh lakpuwan tuku xlakata misionero xakwamputun chu kakxilhli pi xtachuna la akxni wi tiku makgtayanankgo; na xaklakgati tuku kgalhikgo tiku misionero xwankgonit. Pero lu nitu xakkatsi xlakata Dios. Maski makglhuwata xaklikgalhtawakganit Biblia, ni lu xlakaskinka xakliʼakxilha. Na ni xakkatsi tuku xlakpuwanit Dios xlakata Katiyatni chu latamanin.

Akxni ktsukulh kkatalikgalhtawakga Biblia xtatayananin Jehová lhuwa tuku kkatsinilh: tuku xtukuwani Dios, tuku kinkaʼakgspulayan akxni niyaw, tuku lakgaya Jesús xlakata nakgantaxtu tuku lakapastaknit natlawa Dios... Chuna ktsukulh lakgapasa uma lu tlan libro chu ¡lu xaklakgati xakkalitachuwinan amakgapitsin xaxlikana tuku xakkatsinima! Xakkatsi pi Dios lama, pero la uku tlan xaktlawani oración xtachuna xaktachuwinalh tiku lu kiʼamigo. Ktamunulh 12 xla julio kata 2004 xlakata xtatayana Jehová xakwa chu titaxtulh akgchaxan papaʼ putum kilhtamaku ktsukulh lichuwinan Dios.

Akgkitsis kata kskujli kʼBrooklyn (Nueva York) niku pulalinkan xtaskujut Jehová. Lu kpaxuwa maski kaj tsinu kmakgtayanalh niku xtlawakan Biblia chu amakgapitsi likgalhtawakga xlakata nalitamakgtayakgo lhuwa millón latamanin xlikalanka Katiyatni. ¡Lu tlan klimakgkatsinit xlakata kkamakgtayanit kintalataman nalakgapaskgo Dios!