Lu aktsujku xakwanit, kinatlatni lamakgxtakgli, wa xlakata kintse akstu kinkamakgastakni akit chu chatiy lakgkgawasan chu chatum tsumat nema tlakg laklankata. Ama kilhtamaku, kamanan xalak Francia ni chuna xkamasiyanikan chuna la uku, lu xmakgapatinan la xkamasiyanikan. Maski chuna, akit lu kimakgtayaka nixawa la amakgapitsin tiku ni kgaxmatkgo. Nakkawaniyan.

Milh kilhtamaku, lhuwa makgalhtawakgenanin xlakpuwankgo pi kamanan tiku nila kgaxmatkgo xkamasiyanika nachuwinankgo chu nakatsinikgo likgalhtawakgakgo kilhpin. Anta kFrancia, niku kstakli nipara tsinu xlakaskinkan namaklakaskina señas kʼescuela. Makgapitsi kamanan xkamakachikan kxchakgenkan.

Akxni aktsujku xakwanit akglhuwa horas akgatunu semana xkimasiyani chatum makgalhtawakgena xlakata tlan xakchuwinalh. Xkinkilhchipa o xkiʼakchipa chu makglhuwa xafuerza xkimatlawi wi tuku xakwa, pero akit nitu xakkgaxmata. Nila xakkatachuwinan amakgapitsi kamanan. Umakgolh kata lu kpatinalh.

Akxni xakkgalhi akgchaxan kata kimakanka kʼescuela niku ankgo kamanan tiku ni kgaxmatkgo. Xlimakgtumku tlan xakkatalalin kamanan tiku nila kgaxmatkgo la akit. Na ni xlakaskinkan namaklakaskina señas. Chu komo xakmaklakaskiw xkinkamakanikkanan o xkinkaʼaklhtankanan. Pero akinin tsekg xakmaklakaskinaw chu kputsaw tuku kaj akinin xakakgatekgsaw. ¡Tlantiya xakkatachuwinan amakgapitsi kamanan! Chuna akgtati kata ktsukulh paxuwa.

Pero akxni xakkgalhi akgkaw kata, kimakanka kprimaria niku xʼankgo tiku tlan xkgaxmatkgo. ¡Lu nitlan kmakgkatsilh! Klakpuwa pi putum kamanan tiku nila kgaxmatkgo xnikgonita chu kaj watiya akit xaklama kkatiyatni. Chuna la xkawaninit makuchina tiku xlakpuwankgo pi kaj paxkat xwa tuku xtlawakgonit, kifamilia ni xkatsikgo señas chu ni xkimaxkikgo talakaskin nakkatalalin kamanan tiku nila kgaxmatkgo. Klakapastakaku akxni kkilalh xconsultorio makuchina tiku putsanani tiku nila kgaxmatkgo. Xmesa xwi maktum libro xaseñas. Akxni kʼakxilhli xadibujos klimasiyanilh kimakan chu kwa: «¡Klakaskin ama!». Makuchina lakapala matsekgli. *

Kintse lu liskujli xlakata xaklatamaw chuna la lakaskin Dios. Xkinkalinan ktamakxtumit nema xtlawakgo xtatayananin Jehová, Congregación xalak Mérignac, lakatsu kkachikin Burdeos. Ni lu xakʼakgatekgsa tuku xwankan, xwilakgolh tiku xtalakgpalitilhakgo chu xtawilakgo kimpaxtun xlakata xkintsokgnikgo kkapsnat tuku xwankan. Xlakata lu xkimpaxkikgo chu xkililakgaputsakgo uma lu tlan xkimamakgkatsini. Kkinchik, kintse xkintalikgalhtawakga Biblia, pero nikxni kʼakgatekgsli putum tuku xkimasiyani. Nachuna xakmakgkatsi la palakachuwina Daniel, akxni chatum ángel wanilh tuku aku xʼama la xla wa: «Kkgaxmatli, pero nila kʼakgatekgsli» (Daniel 12:8). Chu kimpalakata: «Kakxilhli, pero nila kʼakgatekgsli».

Maski chuna, xaxlikana tuku masiya Biblia tsinu tsinu lakgchalh kinaku. Lu xlakaskinka xakaʼakxilha tuku liwana xakʼakgatekgsa chu xakmakgantaxtiputun. Na xakakxilha la xlikatsikgo makgapitsin. Akgtum liʼakxilhtit, Biblia wan pi ni lakapala nasitsiyaw (Santiago 5:7, 8). Uma ni lu xakakgatekgsa asta akxni natalan limasiyakgolh uma tayat. Chuna la xlikatsikgo natalan uma lu kimakgtayalh.

Akgtum kilhtamaku, akxni kajku kgawasa xakwanit kkaʼakxilhli ktiji makgapitsi lakgkgawasan tiku nila xkgaxmatkgo xchuwinamakgolh señas. Tsekg ktsukulh katalalin chu ktsukulh katsini señas xalak Francia. Chuntiya xakkan ktamakxtumit, niku xwi chatum xtatayana Jehová xwanikan Stéphane, lu xlakputsa la xkimakgtayalh chu xlakata tlan xkintachuwinalh. Lu tlan ktalalilh. Pero lu nitlan tuku lalh: Stéphane tamaknuka kpulachin xlakata ni makgtanuputulh lisoldado. Xlakata nialh xwi kimakgalipuwa chu nialhtu xakkatsiputun. Asta nialh xakkan ktamakxtumit.

Titaxtulh akgkawitu papaʼ, Stéphane maxtuka kpulachin chu taspitpa kxchik. Lu tlan kmakgkatsilh akxni xla tsukulh kintachuwinan señas. Nila xakkanajla. ¿Tuku xlanit? Katsinilh señas anta kpulachin. Akxni xakʼakxilha la xtlawa xmakan chu xlakan tlakg xakpaxuwa akxni xaklakapastaka la xʼama kimakgtaya.

Stéphane tsukulh kilimakgalhtawakge Biblia. Akxniku liwana ktsukulh akgatekgsa tuku ni xakakgatekgsnit xaxlikana xlakata Biblia. Akxni aktsujku xakwanit lu xaklakgati xakakxilha dibujos nema liminkgo likgalhtawakga chu xakkaputsa tiku kalichuwinankan chu lu kuenta xaktlawa dibujos xlakata chuntiya xakkalakapastakli. Xakkatsi xlakata Abrahán, «[x]kamanan», chu xlakata «lhuwa tachixkuwitat» o lhuwa latamanin, pero asta akxni kimasiyanika señas akxniku kkatsilh tuku xkilhchanima umakgolh tachuwin (Génesis 22:15-18; Apocalipsis [Revelación] 7:9). Xlikana pi wa señas, tachuwin nema chan kkinaku.

Xlakata tlan xakakgatekgsa tuku xwankan ktamakxtumit, putum tuku xlichuwinankan xchan kinaku chu tlakg xakkatsiniputun tuku wan Biblia. Xlakata Stéphane xkimakgtaya tlakg xakakgatekgstilhama Biblia, chu kata 1992 ktamakamastanilh Jehová chu ktamunulh. Maski lhuwata tuku xakkatsininit, lu xakmaxanan chu ni xakwan tuku xakmakgkatsi, xlakata akxni aktsujku xakwanit niti xaktachuwinan.

Ktsukulh katatamakxtumi akgtum grupo tiku xchuwinankgo señas, chu alistalh xlakan makxtum talakgolh congregación xalak Pessac, barrio xalak Burdeos. Uma lu kimakgtayalh xlakata tlakg stakli kintakanajla. Ni lu lhuwa tuku  xakakgatekgsa, pero kiʼamigos tiku xkgaxmatkgo xkimakgtayakgo xlakata liwana xakakgatekgsli tuku xkiwanikan. Gilles chu Elodie akgtum tamakgaxtokgat xlakputsakgo la tlan xkintachuwinankgolh. Makglhuwa akxni ksputa tamakxtumit xkilenkgo xchikkan xakwayanaw o xakwayaw kape chu chuna lu tlan ktsukuw lu tlan latalalinaw. ¡Lu lipaxuw katatawilakan tiku tlawakgo xtalakaskin Dios!

Anta uma kcongregación klakgapasli Vanessa. Lu klakgatilh pi xla lu tlan xlakapastaknan chu xlakgati katatlawalh tuku xaʼakgstitum. Xla ni lakpuwa pi nila xkintachuwinan, wata xlakpuwan la tlan nakatsini natachuwinan tiku nila kgaxmata. Tuku xtlawa chalh kkinaku, chu ktamakgaxtokgwi kata 2005. Maski ni lu klakgati kchuwinan, xla kimakgtayanit nialh lu nakmaxanan. Lu kpaxtikatsini Vanessa xlakata kimakgtaya tlan nakmakgantaxti tuku klakgaya.

Watiya kata akxni ktamakgaxtokgwi, sucursal xla xtatayananin Jehová xalak Francia, kLouviers, kiwanika nakkan akgtum papaʼ ksucursal, xlakata xkimasiyanika la matitaxtikan tachuwin xaseñas. Umakgolh kata lhuwa horas limaxtukanit xlakata natlawakan DVD ktachuwin señas xafracés; pero lhuwa taskujut xʼananku chu tlakg xtalakaskin tiku xtlawakgolh uma taskujut.

Akit chu Vanessa lu lanka xtalakgalhaman Jehová kʼakxilhaw xlakata kmakgtayanalh ksucursal, maski pulana lu xaklilakgaputsayaw. ¿Tuku xʼama kaʼakgspula grupo xla señas? ¿Tuku xaktlawaw xlakata kinchikkan? ¿Tuku xaʼama liskuja Vanessa? Pero Jehová lakkaxtlawalh pulakatunu tuku xaklilakgaputsayaw. Lu kmakgkatsilh pi Jehová xkinkapaxkiyan akit chu kimpuskat chu putum tiku nila kgaxmatkgo.

Xlakata kmakgtayanalh kDepartamento niku Matitaxtikan tachuwin xaseñas, kkatsilh pi lhuwa taskujut tawila xlakata natlawakan tuku nakamakgtaya xtakanajlakan tiku nila kgaxmatkgo. ¡Lu tlan tamakgkatsi pi lhuwa natalan katsinimakgolh señas xlakata nakintachuwinankgo! Ni kmakgkatsi pi ni kimpaxkikgo. Putum uma tuku tlawakgo natalan litasiya pi lu tlan latalalin xkachikin Jehová (Salmo 133:1).

Lu kpaxtikatsini Jehová xlakata tlawalh pi putum kilhtamaku xʼanalh natalan tiku xkimakgtayakgolh. Na kpaxtikatsini pi kimaxkilh talakaskin nakmakgtayanan maski kaj tsinu xlakata tiku nila kgaxmatkgo nalakgapaskgo xapaxkina kiMalakatsukinakan chu tlan nalakgtalakatsuwikgo. Lu kakxilhputuna pi kachalha kilhtamaku, akxni nialh naʼanan tuku tlawa pi nila akxtum nachuwinanaw «xatlan tachuwin», uma wamputun xaxlikana xlakata Dios chu tuku lakpuwanit natlawa chu makxtum natawilayaw (Sofonías 3:9).