Dios ni kgalhi chatum xpuskat tiku natakgalhi xkamanan. Wa xMalakatsukina putum tuku staknan. Pero komo kinkatlawakan xlakata nalimasiyayaw xtayat Dios, wa xlakata «xtlat Adán wa Dios». Nachuna, Jesús wanikan «Xkam Dios» xlakata tlawaka chuna la kgalhi xtayat xTlat. (Kalikgalhtawakga Lucas 3:38, Hua Xasasti Talaccaxlan, 1999, chu Juan 1:14, 49.)

Dios pulana tlawalh Jesús chu alistalh tlawalh Adán. Wa xapulana tlawalh chu alistalh limaklakaskilh xlakata nakatlawa putum tuku anan asta ángeles. Wa xlakata, Biblia mapakuwi Jesús «xakgasiyaj xwija lantla xlipaks [x]tamalakatsukun» Dios. (Kalikgalhtawakga Colosenses 1:15, 16.)

Akxni nina xlakachin kBelén, Jesús chatum ángel xwanit kʼakgapun. Akxni chalh kilhtamaku la xlakaxwilinit, Dios wililh kxpan María xlakata tlan xlakachilh la chatum lataman. (Kalikgalhtawakga Lucas 1:30-32; Juan 6:38 chu 8:23.)

¿Tuku xlakata Dios tlawalh pi Jesús xlakachilh kKatiyatni la chatum lataman? ¿Tuku lu xlakaskinka taskujut tlawalh? Komo naputsaya xtakgalhtin umakgolh takgalhskinin kBiblia, tlakg naʼakgatekgsa chu napaxtikatsiniya tuku tlawakgonit kimpalakatakan Dios chu Jesús.