Taʼakgsanin akxni ni wankan tuku xaxlikana. ¿Milh kilhtamaku akxni akgsaninanti? *... Asta makgapitsi tiku paxkikgo Dios chu laklankata xwankgonit na akgsaninankgolh. Chatum, wa tiku lichuwinan Biblia nema max wix lakgapasa. Xwanikan Pedro, chu xlikgalhkutiy xʼapóstol Jesús xwanit. ¿Katsiputuna tuku xlakata akgsaninalh? Nakwaniyan.

Akxni xchipakanita Jesús chu xlinkanita kxchik xapuxku sacerdote. Liwakaya itat tsisni. Pedro tsekg tanuyacha kxkilhtin chiki chu tawila lakatsu niku wi lhkuyat. Akxni puskat tiku tamaknulh lakgapasli wa: «Na xawix nti xtalapat Jesús». Pero Pedro pekualh chu wa pi ni xlikana.

Alistalh akxilhpa achatum puskat tiku anta kskuja chu wa: «Yuma nchixku, na xawa xtalama Jesús». Pedro wampa pi ni xlikana. Kaj lipuntsu, makgapitsi na talakatsuwinikgo chu wanikgo: «Lu wa makgtum xlikana mpi na wix nchatum xlakan».

Pedro pekuan chu wampa xlimakgtutu: «Ni klakgapasa yama nchixku». Chu tunkun tasalh tantum puyu. Jesús lakaʼakxilha Pedro, chu Pedro lakapastakli pi aku xwaninit: «Akxni ni atasay nawan mpuyuj, nakinkgalhtatsekgniya makgtutu [nawana pi ni kilakgapasa]». Pedro lhuwa tasa. Lu lilipuwan xlakata tuku tlawalh.

¿Namin kilhtamaku nachuna naʼakgspulayan?... Kalakpuwanti pi wila kescuela chu mincompañeros tsukukgo lichuwinankgo xtatayananin Jehová. Chatum wan: «Xlakan ni saludarlikgo bandera». Atanu wampara: «Ni tlawakgo guerra xlakata natatayakgo xkachikinkan». Chu atanu wan: «Ni  kstalaninanin Cristo xlakata ni tlawakgo Navidad». Chu chatum lakaʼakxilhan chu waniyan: «Wix xtatayana Jehová, ¿ni xlikana?». ¿La xkgalhtinanti?...

Liwana milikatsit la nakgalhtinana. Pedro ni liwana xkatsi la xkgalhtinalh; wa xlakata akgsaninalh. Pero xlakata lu lilipuwa tuku tlawalh, Dios tapatilh.

Chu kalichuwinaw Ananías. Tiku na kstalanina Jesús xwanit chu na akgsaninalh, chu Safira xpuskat xtalikatsi. Pero Dios ni katapatilh. Kaʼakxilhwi tuku xlakata.

Titaxtulha akgkaw kilhtamaku la Jesús kamakgxtakgli xʼapóstoles chu amapa kʼakgapun niku wilacha Dios. Akgtutu mil latamanin kakgaxmatnikgo chu tamunukgo kJerusalén. Chalhuwa makgat minkgonitancha xlakata natlawakgo pascua xla Pentecostés chu tamakgxtakgkgo xlakata tlakg nalakgapaskgo xasasti xtakanajlakan. Wa xlakata, makgapitsi kstalaninanin Jesús maklakaskinkgo xtuminkan xlakata nakamaxkikgo tuku maklakaskinkgo tiku minkgonit.

Ananías chu xpuskat stakgo akgtum xpukuxtukan xlakata nakamaxkikgo tumin tiku na xnatalan wankgolh. Akxni Ananías kamaxki tumin apóstoles, wan pi chuna xokgonika, pero ni xlikana xlakata ni putum mastalh. Xlakata Dios makatsinilh, Pedro katsilh tuku xtlawanit chu wani: «Ni wa nchixkuwin akgskgawikgonita, wampi wa Dios». Tunkun xanin tamalh Ananías. Titaxtulh akgtutu hora milh xpuskat. Xla ni xkatsi tuku xlaninit xchixku, na akgsaninampa chu xla na nilh.

¡Lu lhuwa tuku kinkamasiyaniyan! Lu xlakaskinka ni naʼakgsaninanaw. Pero kimputumkan akgtsankgayaw, tlakg chuna la akxni lakgkgawasanku akinin. ¡Lu tlan limakgkatsiyaw xlakata katsiyaw pi Jehová kinkapaxkiyan chu nakinkatapatiyan chuna la tlawalh xlakata Pedro!, ¿ni xlikana?... Pero kalakapastakti pi putum kilhtamaku kiliwanatkan xaxlikana. Chu komo naʼakgsaninanaw, kiliskinitkan Dios kakinkatapatin. Chuna tlawalh Pedro wa xlakata Dios tapatilh. Komo lu naliskujaw nialh chuna natlawayaw, Dios na nakinkatapatiyan.