¿Tuku kilitlawatkan xlakata namakgapaxuwayaw Dios? ¿Nastalaniyaw akgtum lista xla limapakgsin? ¡Lu tlan pi ni chuna! Chuna la wa xKgawasa Dios, Jesucristo, Dios ni lhuwa tuku kinkaskiniyan. (Kalikgalhtawakga Marcos 12:28-31.)

Pero pulana kaʼakxilhwi tuku xlakata chuna kgalhtinalh. Uma kilhtamaku 11 xla nisán xwanit. Nialh lhuwa kilhtamaku xtsankga namakgnikan Jesús, chu xla anta xmasiyama ktemplo. Tiku lu ksitsinikgo xlakputsamakgolh tuku xlimalakgsiyakgolh, wa xlakata tlawanikgolh lhuwa takgalhskinin nema xlitaʼakglhuwikgo. Xlakata akgatunu takgalhskinin nema xtlawanikgo, Jesús tlan xkakgalhti, wa xlakata nila tuku xlimalakgsiyakgo, pero chatum kgalhskilh: «¿Nima xakgasiya limapakgsin xlipaks?» (versículo 28).

Uma lu tuwa takgalhskinin xwanit. Xlakata makgapitsi judíos xlitaʼakglhuwikgo tukuya limapakgsin xapulana o tlakg xlakaskinka xwanit, xlakata xʼanan akgchaxan ciento limapakgsin nema maxkika Moisés, makgapitsi xwankgo pi putum xlakaskinka xwankgonit chu ni kaj makgapitsi. ¿La xʼama kgalhtinan Jesús?

Akxni kgalhtinalh Jesús ni wa pi kaj pulaktum xwanit, wata wa pi pulaktiy. Pulana wa: «Napaxkiya Dios [...] [Jehová] lantla xlipaks kminaku, chu lantla xlipaks [milatamat], chu lantla xlipaks kmintapuwan, chu lantla xlipaks kmilitliwakga» (versículo 30; Deuteronomio 6:5). Uma wamputun pi paxkikan Jehová, napaxkiya miliputuminika, putum tuku kgalhiya, tuku tlan tlawaya. Maktum libro nema kilhtiyakanit kBiblia wan: «Dios nalipaxkiyaw putum tuku kgalhiyaw». Wa xlakata komo paxkiyaw Dios, natlawayaw putum tuku talakaskin xlakata tlan nakinkaʼakxilhan (1 Juan 5:3).

Xlipulaktiy, Jesús wa: «Napaxkiya wa nti lakatsunin tawilakgo, lantlata wix akstupaxkikana» (versículo 31; Levítico 19:18). Napaxkiya Dios chu mintalakatsu umakgolh pulaktiy lu xlakaskinka: napaxkiya Dios uma tlawa pi napaxkiya mintalakatsu (1 Juan 4:20, 21). Komo paxkiyaw kintalakatsukan chuna la akstu kinkapaxkikanan, nachuna nakalikatsiniyaw la lakaskinaw kakinkalikatsinikan (Mateo 7:12). Komo chuna natlawayaw nalimasiyayaw pi paxkiyaw Dios, tiku kinkatlawan chuna la xla (Génesis 1:26).

¿La xlilakaskinka limapakgsin xlakata napaxkiyaw Dios chu kintalakatsujkan? Jesús wa: «Ni anan akgtum limapakgsin ntlakg tlanka lantla yuma» (versículo 31). Kʼatunu relato nema na watiya xlichuwinama Jesús wa pi putum limapakgsin anta kilhtsukukgo kʼuma pulaktiy (Mateo 22:40).

Makgapaxuwakan Dios ni tuwa. Putum tuku Jehová kinkaskiniyan kaj watiya: tapaxkit. Uma tapaxkit xliputum kilhtamaku nalitalakgapasa xaxlikana takaknin. Pero, tapaxkit ni kaj lichuwinankan o kaj makgkatsikan, wata nalimasiyaya akxni nalilatapaya (1 Juan 3:18). ¿Katsiputuna la tlan nalimasiyaniya Jehová, Dios tiku «tapaxkit»? (1 Juan 4:8.)