XTALAKASTAKWANAT Jesús ni wa tuku kaj makgasa lalh nema ni xlakaskinka naliʼakxilhaw. Apóstol Pablo wa: «Lakastakwananit nCristo klinin; na wa nti xakgasiyaj lakastakwananit, xaliʼukxilhtit liwanit lantla nalakastakwanankgoy xlipaks ninin. Xampi lantla likilhtsukulh anan linin xpalakata nchatum chixku, na chuna xpalakata nchatum chixku lantla nalilakastakwanankgo ninin. Xampi lantla nikgoy xlipaks nchixkuwin mpi wa ntatapakgsikgoy Adán, pus na chuna wa nti ntatapakgsikgoy nCristo, paks nalakastakwanampalakgoy» (1 Corintios 15:20-22).

Jesús malakastakwanika 16 xla nisán kata 33. Kilhtamaku akxni judíos xʼankgo ktemplo xalak Jerusalén xlakata xmakamaxkikgo Jehová Dios xapulana tawakat nema xmakgalakgo. Xlakata Pablo wa pi Jesús «wa nti xakgasiyaj», xkilhchanima pi xwilakgolh atanu tiku tlan xkamalakastakwanika kkalinin.

Pablo wan la kinkamakgtayayan xtalakastakwanat Jesús: «Likilhtsukulh [...] linin xpalakata nchatum chixku, na chuna xpalakata nchatum chixku lantla nalilakastakwanankgo ninin». Xlakata Adán kinkamatitaxtinin talakgalhin putum niyaw. Pero xlakata Jesús mastalh xlatamat nema ni xkgalhi talakgalhin, tlawalh pi putum latamanin tlan xkalakgmaxtuka ktalakgalhin chu klinin. Pablo lu tlan lichuwinan uma akxni tsokgli anta kRomanos 6:23: «Wa xtaxokgo ntalakgalhin, wa linin, wa mpi wa xtatakin Dios, wa latamat wantu xaliankgalhin, xpalakata nCristo Jesús nkimPuchinakan».

Jesús wa tuku kilhchanima kimpalakatakan xlakata nilh chu lakastakwanalh. Xla wa: «[“]Lakimpi xlipaks wa nti nkanajlaniy, ni katitsankgalh, wampi wata nakgalhiy xlatamat wa ntu xaliankgalhin”. Lhuwa chuna mpaxkilh Dios ntachixkuwitat, wa ntilimastalh nchastum xKam, lakimpi xlipaks wa nti nkanajlaniy, ni katitsankgalh, [...] wata nakgalhiy xlatamat wa ntu xaliankgaIhin» (Juan 3:14-16).

Kaj kalakpuwanti: ¡latamat xliputum kilhtamaku, niku ni anan takatsanajwat, chu tapatin! (Apocalipsis 21:3, 4.) ¡Xlikana pi lu lipaxaw nawan! La wa chatum tiku lakputsanani Biblia: «Putaknun kinkamalakapastakayan pi ni makgas latamakan, talakastakwanat kinkamalakapastakayan pi ni putum kilhtamaku nikan». Xlikana: xtalakastakwanat Jesús kilhchanima latamat.