Jesús: Kinkamasiyaniyan la napaxuwayaw
¿XATAPAXUWAN latamalh Jesús? Liwana katsiyaw pi kxfamilia Jesús ni xkgalhikgo tumin chu ni lhuwa tuku kgalhilh kxlatamat; asta ni xkgalhi «ntani naʼakxtikatnan» (Lucas 9: 57, 58). Nachuna, makgapitsi lu sitsinikgolh, ni tlan lichuwinankgolh chu alistalh makgnikgolh.
Max wi tiku nawan, «uma tuku titaxtulh ni wa tuku lipaxuwakan klatamat». Anan atanu tuku tlawalh kxlatamat Jesús nema na tlan nalakputsananiyaw. Kaʼakxilhwi akgtati.
1. JESÚS WI TUKU XʼAMA TLAWA KXLATAMAT: XTALAKASKIN DIOS.
«Wa nkiliwat, wa naktlaway xtalakaskin nti nkimalakgachalh.» (Juan 4:34.)
Jesús liskujli natlawa xtalakaskin xTlat xalak akgapun, Jehová, akxni tuku xwan chu xtlawa. * Chuna la wan texto xala talhman, akxni chuna xtlawa lu xlipaxuwa asta la xliwat xliʼakxilha. Kaʼakxilhwi tuku xtitaxtuma akxni chuna wa.
Tastunut xwanit akxni Jesús chuna wa (Juan 4:6). Tsisa asta tastunut xtlawanit kkasipijni kSamaria chu la uku xtsinksmaja. Chu xtamakgalhtawakgen xwanimakgolh: «Rabí, kawayanti» (Juan 4:31). Chuna la kakgalhtilh, Jesús limasiyalh pi namakgantaxti xtalakaskin Dios nema xlakgayawanit xmakgalhkgasa chu xmatliwakglha. ¡Xlikana pi lu xpaxuwa Jesús kxlatamat!
2. JESÚS LU XPAXKI XTLAT XLIPUTUM XNAKU.
«Kpaxkiy xaTlat.» (Juan 14:31.)
Jesús lu tlan xtalalin xTlat akxni xwilacha kʼakgapun. Xlakata lu xpaxki, lichuwinalh xtukuwani, tuku lakapastaknit natlawa chu xtayat. Xlakata tuku xwan chu xtlawa, Jesús liwana limasiyalh la likatsi xTlat. Wa xlakata tlan nawanaw pi Jesús xtachuna xTlat. Wa xlakata, akxni Felipe skinilh: «Nkakinkamasiyuni xaTlat», Jesús kgalhtilh: «Wanti nkiʼukxilhnitta, ukxilhnitta xaTlat» (Juan 14:8, 9).
Jesús lu xpaxki xTlat wa xlakata kgalhakgaxmatli asta klinin (Filipenses 2:7, 8; 1 Juan 5:3). Tapaxkit nema xkgalhini Dios lu xmakgapaxuwa kxlatamat.
3. JESÚS XKAPAXKI LATAMANIN.
«Ti ni chatum mpala tlakg tlanka nkgalhiy ntapaxkit lantla yuma mpala wi nti napalakamastaniy xlatamat nti mpaxkiy xʼamigo.» (Juan 15:13.)
Xlakata makglakgalhinanin akinin kilhtamaku nema aku mima ni lu lipaxuwakan. Biblia wan: «Ntsukulh ntalakgalhin nkatuxawat nkaj xpalakata nchatum nchixku, pus wa linin nkitaxtunilh ntalakgalhin; cha nchu linin, chuna nkgalhikgolh xlipaks nchixkuwin sampi paks lakgalhinankgolh» (Romanos 5:12). Ni anan tuku natlawayaw xlakata natsalaniyaw tuku makgala talakgalhin wa: linin (Romanos 6:23).
Xlakata Jehová lu kinkapaxkiyan, mastalh tuku nakinkalilakgmaxtuyan. Xlakata xkinkalakgmaxtun ktalakgalhin chu klinin mastalh talakaskin pi xKgawasa tiku ni xkgalhi talakgalhin, xpatinalh chu xmakgnika kimpalakatakan. Xlakata Jesús paxki xTlat chu latamanin, xatapaxuwan mastalh xlatamat nema ni xkgalhi talakgalhin kimpalakatakan (Romanos 5:6-8). Uma tapaxkit nema limasiyalh lu lipaxuwalh kxlatamat. *
4. JESÚS XKATSI PI XTLAT XPAXKI CHU TLAN XAKXILHA TUKU XTLAWAMA.
«Wa yuma nkinKam nti luwa kpaxkiy, wanti luwa klimakgapaxuwakan.» (Mateo 3:17.)
Wa uma xtachuwin Jehová takgaxmatli akxni tamunulh Jesús. Chuna limasiyalh pi xpaxki chu tlan xakxilha xKgawasa; wa xlakata Jesús tlan wa: «Luwa kilipaxkiy Kintlat» (Juan 10:17). Xlakata xkatsi pi xTlat xpaxki chu tlan xakxilha, Jesús ni pekualh chu tayanilh akxni nitlan likatsinikgolh chu nitlan lichuwinankgolh tiku ni xʼakxilhputunkgo. Chu nachuna maski xʼama makgnikan ni xlajwanalh chu ni lilipuwa (Juan 10:18). Xlakata liwana xkatsi pi xTlat xpaxki chu tlan xakxilha lu makgapaxuwalh kxlatamat.
Xlikana pi Jesús paxuwalh kxlatamat. Akinin lhuwa tuku tlan katsiniyaw xlakata tuku tlawalh. Kʼartículo nema aku naʼakxilhaw lichuwinan makgapitsi tastakyaw nema xla kamaxkilh xtamakgalhtawakgen xlakata la tlan xpaxuwakgolh kxlatamatkan.
^ párr. 6 Anta kBiblia wan pi Jehová wa xtukuwani Dios.
^ párr. 15 Xlakata tlakg nakatsiya la xlilhuwa xtapalh talakgmaxtut nema mastalh Jesús, kaʼakxilhti capítulo 5 xla libro ¿Tuku xlikana masiyay Biblia?, nema tlawakgonit xtatayanin Jehová.
