KATALAKATSUWINI DIOS
«Kaskintit, na nakamaxkikanatit»
«Kimpuchinakan kakinkamasiyuni lantla naktlawayaw nkioracionkan.» (Lucas 11:1, Hua Xasasti Talaccaxlan, 1999.) Wa uma tuku skinilh chatum kstalanina Jesús. Akxni kgalhtilh Jesús, limaklakaskilh akgtiy liʼakxilhtit xlakata namasiya la natlawayaw oración xlakata nakinkakgaxmatniyan Dios. ¿Kgalhskinkanita komo Dios kgaxmata mioración? Komo chuna, nakatsiputuna la kgalhtinalh Jesús. (Kalikgalhtawakga Lucas 11:5-13.)
Xapulana liʼakxilhtit lichuwinan tiku tlawa oración (Lucas 11:5-8). Jesús lichuwinan chatum chixku nema wi tiku lakgapaxialhnan itat tsisni chu nitu kgalhi tuku natawa. Uma chixku lu xlakaskinka akxilha chu maski lu katsisnita, lakgan xchik chatum xʼamigo chu an skini maktutu kaxtalanchu. Xapulana, xʼamigo ni takiputun xlakata ni nakamastakwani xfamilia. Pero uma chixku makglhuwa wani asta akxni xʼamigo taki chu maxki tuku lakaskin. *
¿Tuku kinkamasiyaniyan uma xlakata oración? Pi chuntiya; naskinaw, naputsayaw chu natlakgaw (Lucas 11:9, 10). ¿Xwamputun Jesús pi akxni tlawayaw oración xtachuna nalakgatlakgaw xmalakcha chatum Dios tiku ni kinkakgaxmatniputunan? Ni chuna. Dios nichuna la amigo xala liʼakxilhtit, Dios kgalhtiputun tiku tlawani oración xlakata kanajlani chu komo tlawa xtalakaskin. Limasiyayaw takanajla komo makglhuwa tlawayaw oración. Akxni wi tuku makglhuwa skinaw, limasiyayaw pi xlikana maklakaskinaw chu liwana katsiyaw pi Dios nakinkamaxkiyan (Marcos 11:24; 1 Juan 5:14).
Xliʼakgtiy liʼakxilhtit lichuwinan tiku “kgaxmata oración” Jehová (Salmo 65:2). Jesús kgalhskininalh: «Xati xatlat akxni naskiniy tantum skiti, ¿pi naliʼakgskgawiy tantum luwa? Usuchi akxni naskiniy akgtum kgalhwat, ¿pi wata namaxkiy tantum [alacrán]?». Xtakgalhtin ni lu tuwa: ni chatum tlat tiku kapaxki xkamanan namaxki tuku natlawani tuku nitlan. Alistalh wan pi komo natlatni tiku kgalhikgo talakgalhin “katsikgo lantla tu tlan namaxkikgo lakwan xtatakinkan xlakgskgatankan, ¿pi xaliwaka chu mintlatikan Dios wanti wi kʼakgapun ni katimaxkikgolh xlitliwakga espíritu santo [tlakg xatlan tamaskiwin] wanti naskinikgoy?” (Lucas 11:11-13, Hua Xasasti Talaccaxlan, 1999; Mateo 7:11). *
Dios kakgalhtiputun tiku tlawanikgo oración xlakata kanajlanikgo
Kʼuma liʼakxilhtit, Jesús kinkalimasiyaniyan pi Jehová wa tiku “kgaxmata oración”, la chatum Tlat xapaxkina tiku kamaxkiputun tuku maklakaskinkgo xkamanan. Wa xlakata, tiku kakninanikgo Jehová tlan nawanikgo tuku wi kxnakujkan. Nachuna, xlakata katsikgo pi Dios lakaskin tlan kakakitaxtunilh, xatapaxuwan makglhtinankgo tuku kalikgalhtikan xoracionkan, maski ni wa tuku xlakpuwamakgo. *
Textos xalak Biblia nema tlan nalikgalhtawakgaya uma papaʼ:
^ párr. 4 Xliʼakxilhtit Jesús limasiya la xwilaka makgasa. Judíos lu xlakaskinka xʼakxilhkgo lu tlan nakamakgamakglhtinankgo amakgapitsin. Xlakata familias kajwatiya xtlawakgo kaxtalanchu nema xmaklakaskinkgo akgatunu kilhtamaku, komo xmakgasputkgo, xmakgpawakgo tsinu xtalakatsukan. Nachuna, familias tiku nitu xkgalhikgo tumin, putum klhtatakgo kʼakgtum cuarto, xtikat xlaktamakgo kkatutsu, wa xlakata komo wi tiku xtakilh xkamastakwanilh amakgapitsin.
^ párr. 6 Jesús xkalimaʼakgatekgsni amakgapitsi akxni xmaklakaskin tachuwin “xaliwaka”. Chatum putsana wan: «Komo A xlikana, B tlakg xaxlikana».
^ párr. 7 Komo tlakg katsiputuna xlakata la natlawaya oración xlakata Dios nakgaxmatniyan, kaʼakxilhti capítulo 17 xla libro ¿Tuku xlikana masiyay Biblia?, nema tlawakgonit xtatayananin Jehová.
