¡LU XLIKANA umakgolh tachuwin! Kʼuma kakilhtamaku latamat «alitakgalan y snun tapatij». Wa xlakata kinkakgalhskinkanan pi komo xlikana tlan nalipaxuwayaw latamat.

Kalichuwinaw la akgtum liʼakxilhtit tuku titaxtulh Maria. Xla chatum puskat xwanit tiku ankgalhin lu kskuja; pero uku, kgalhiya 84 kata chu nialhla taxtu kxchik. Maski lu tlanku lakapastaknan, pero xmakni nialh tliwakga. ¿La tlan xlipaxuwalh akgtum latamat la uma?

¿Nachuna akgspulayan? Max milh akgtum kilhtamaku akxni miʼakstu kgalhskinkanti komo kmilatamat wi tuku natlawaya. Max kgalhiya akgtum taskujut niku watiya tlawaya chu makgatlakgwanan, maski niti akxilha mintaskujut. Maski tsinu tlan kitaxtuninitan, max lakpuwana tuku nala kilhtamaku nema aku mima; o lu lipuwana, o makgkatsiya pi miʼakstu wila, o wi taʼakglhuwit kmifamilia. Max nilh tiku lu xpaxkiya. Uma wa tuku akgspulalh chatum chixku wanikan André. Kaj lakapala chipalh tajatat chu nilh xtlat, tiku lu tlan xtalalin. Xla lu nitlan limakgkatsilh chu xmakgkatsi pi nialhla xpaxuwalh.

Maski katuwa tuku nalipatinanaw chu nitlan tuku natitaxtuyaw, katsiputunaw komo wijku tuku nalipaxuwayaw kkilatamatkan. Xatakgalhtin tekgsaw kxlatamat chatum chixku tiku latamalh kKatiyatni liwakaya akgtiy mil kata: Jesucristo. Maski lhuwa tuku nitlan titaxtulh kxlatamat, tlawalh tuku tlan chu lipaxuwalh. Komo nachuna natlawayaw, na nalipaxuwayaw latamat.