Kstakli kʼakgtum ni lu lanka kachikin kxkilhtun xpupunu Turku. Kintlat tlajanalh akxni boxeador xwanit, akit chu kintala xaʼaktsujku na xaklimakgatokgayaw. Akxni xakan kʼescuela xaktalachipa tiku xkintalatlawa. Chu akxni tlakg kstakli xakmakgtapakgsi kʼakgtum pandilla nema lu xlakgapaskan, chu tlakg ktsukulh makgchipanan. Nachuna ktsukulh kmakgtlakga tuku wanikan heavy metal, nema kimalakpuwanilh pi makgat xakama chan.

Akxni ktamawalh akgtum batería, kmatsukilh akgtum grupo chu alistalh akit ktsukulh kilhtli. Lu katuwa xaklakgati xaktlawa akxni xakkilhtli. Grupo tlakg xlakgapastilhakan xlakata lu lakluku xtasiyakgo. Ktsukuw ktlakgnanaw kxlakatinkan lhuwa latamanin chu kgrabarliw makgapitsi discos, chu xaʼawatiya disco nema ktlawaw lu tlan lichuwinanka. Akxni xchamaja kata 1990 klakalhuwa xkachikinin kEstados Unidos kkaw xlakata xkinkalakgapaskan. Makglhuwa kkitlakgnaw kNueva York, kLos Ángeles chu kkatalakkaxlaw lhuwa tiku liskujkgo tatlakgni akxni nina xaktaspitaw kFinlandia.

Maski lu xaklakgati xakmakgtlakgnan, xakpaxuwaputun kkilatamat. Lu nitlan klimakgkatsilh la nitlan xlalikatsinikgo tiku xliskujkgo tatlakgni, nachuna ni xaklipaxuwa la xaklin kilatamat. Xaklakpuwan pi lu nitlan xaklikatsi xakpekuan komo xkimalakgachaka kpupatin. Kputsalh xtakgalhtin kintakgalhskinin kmakgapitsi libros nema xlichuwinan takanajla chu liwana xakskini Dios pi xkimakgtayalh, maski xakmakgkatsi pi nikxni xakmakgapaxuwalh.

Xlakata xakkgalhilh tuku xakmaklakaskilh, xakskuja niku xmalakgachakan correos. Akgtum kilhtamaku kiwanika pi chatum tiku xaktaskuja xtatayana Jehová xwanit. Lhuwa takgalhskinin ktlawanilh. Xlakata kilikgalhtilh Biblia uma tlawalh pi tlakg xakkatsiputulh, wa xlakata ktsukulh ktalikgalhtawakga.  Ni lhuwa semana xtitaxtunit akxni ktsukulh kkgalhtawakga, kigrupo makglhtinalh akgtum contrato xlakata xgrabarlinalh chu malaknunika pi max na xtastalh uma disco kEstados Unidos. Klakpuwa pi wa uma tuku xkimakgapaxuwalh kkilatamat.

Kwanilh tiku xkimakgalhtawakgema pi xakgrabarliputun aʼakgtum disco, chu kwanilh pi alistalh liwana xakama liskuja xlakata xaktlawalh tuku wan Biblia. Ni kiwanilh tuku xlakpuwan wata kiskinilh pi xaklikgalhtawakgalh xtachuwin Jesús nema tatsokgnit kMateo 6:24. Anta wan: «Ti nilay lakgachixkuwiy nchatuy malana». Kaks kimalakawanilh akxni kkatsilh tuku Jesús xwamputun. Wa kimakgalhtawakgena tiku kaks lilakawa alistalh akxni kwanilh pi xakmakgxtakgnit grupo xlakata xakstalaniputun Jesús.

Biblia la akgtum espejo xwanit nema xkimasiyani tuku nitlan xaktlawa (Santiago 1:22-25). Kkatsilh pi lu lixkajnit xaklikatsi: tlankajwa xakwanit chu lhuwa tuku xakkgalhiputun, lixkajnit xakchuwinan, xaktalachipanan, xakxkuli chu lhuwa xakwa kuchu. Akxni kakxilhli pi nichuna xaklima kilatamat la wan Biblia, lu nitlan klimakgkatsilh. Pero xaklakpuwanit pi xakama talakgpali (Efesios 4:22-24).

Lu nitlan xaklimakgkatsi tuku nitlan xaktlawanit makgasa. Pero, kimakgalhtawakgena lhuwa kimakgtayalh. Kimasiyanilh tuku wan Biblia kIsaías 1:18: «Maski mintalakgalhinkan xtachuna la escarlata xwankgolh, snapapa nakatlawakan la miki». Uma texto chu amakgapitsi liwana kimasiyanilh pi kinTlatkan xalak akgapun xalakgalhamanina chu kamakgtayaputun tiku nitlan limakgkatsikgo xtalakgalhinkan.

Akxni klakgapasli chu kpaxkilh Jehová, kimakgtayalh xlakata xaktamakamastanilh (Salmo 40:8). Ktamunulh kkata 1992 kʼakgtum tamakxtumit xaʼakgtati kilhtamaku xla xtatayananin Jehová nema tlawaka kSan Petersburgo (Rusia).

Lhuwa amigos kkatekgsnit kxkachikin Jehová. Min kilhtamaku ktamakxtumiyaw xlakata naktlakgaw xatlan tatlakgni chu klipaxuwayaw uma xtamaskiwin Dios (Santiago 1:17). Akgtum tasikulunalin kimpuskat, Kristina. Lhuwa tuku ktitaxtunitaw; kpaxuwanitaw chu klakgaputsanitaw, chu kwani tuku kmakgkatsi kkinaku.

Komo ni xtatayana Jehová xaktiwa, max xaknilha. Lhuwa taʼakglhuwit xakkgalhi xapulana. La uku xlikana xatapaxuwan kkgalhi kilatamat chu lu tlan kmakgkatsi.