CHUNA la akxilhwi artículo nema titaxtulh, Jesús xatapaxuwan latamalh. Komo akinin nachuna latamaputunaw xlakaskinka nachuna natlawayaw la tlawalh chu nakgaxmataw xtastakyaw.

Chuna la wan 1 Juan 2:6, Jehová kinkawaniyan nalatamayaw la Jesús, wamputun lilatamakan xliʼakxilhtit chu xtamasiyat. Komo chuna natlawayaw, Dios tlan nakinkaʼakxilhan chu nakgalhiyaw xalipaxuw latamat.

Xlakata tlan natlawayaw la tlawalh Jesús masiyalh lhuwa tastakyaw, makgapitsi katekgsaw kxTaʼakgchuwin xalak Sipi. Pulaktutu kalichuwinaw chu kaʼakxilhwi la kinkamakgtayayan.

LA KINKAMAKGTAYAYAN UMA UMA TASTAKYAW: Jesús wa pi putum akinin wi tuku kanajlaputunaw.

Katsiputunaw xtakgalhtinkan umakgolh takgalhskinin: ¿Tuku xlakata wilaw unu? ¿Tuku xlakata anan lhuwa tapatin? ¿Kinkalilakgaputsayan Dios? ¿Wi niku anaw akxni niyaw? Komo nakatsiyaw umakgolh xtakgalhtin xatapaxuwan nalatamayaw. Jesús xkatsi pi kajwatiya lakatum niku wi xtakgalhtin umakgolh takgalhskinin anta kxTachuwin Dios. Kʼoración nema tlawanilh xTlat, wanilh: «Mintachuwin, talulokgtat» o xaxlikana (Juan 17:17). ¿Tlan kinkamakgtayayan Biblia xlakata kintakanajlakan?

TUKU XLIKANA LALH:

Chatum kgawasa wanikan Esa tiku xkilhtli kʼakgtum grupo xla rock nema xtasiya pi lu tlan xʼama kitaxtuni. Maski chuna, xmakgkatsi pi wi tuku xkitsankgani. Xla wan: «Maski lu xaklakgati xakmakgtlakgnan, xakpaxuwaputun kkilatamat». Titaxtulh kilhtamaku lakgapasli chatum xtatayana Jehová. Xla wan: «Lhuwa takgalhskinin ktlawanilh. Xlakata kilikgalhtilh Biblia uma tlawalh pi tlakg xakkatsiputulh, wa xlakata ktsukulh ktalikgalhtawakga Biblia». Tuku katsinilh lakgchalh kxnaku chu tlawalh pi xmakamaxkilh xlatamat Jehová. Wan: «Lhuwa taʼakglhuwit xakkgalhi xapulana, la uku xlikana xatapaxuwan kkgalhi kilatamat». *

LA KINKAMAKGTAYAYAN UMA TASTAKYAW: Tiku lakgalhamanan lu tlan kalikatsini amakgapitsin chu kuentajtlawa tuku makgkatsikgo.

Jesús xkalakgalhamanani tiku xpatinamakgolh. Xlakata lu kalakgalhamalh latamanin kamakglhtilh xtajatatkan maski nitu kskinikanit (Mateo 14:14; 20:30-34). Akxni chuna tlawayaw la tlawalh, makgkatsiyaw pi wi tuku tlan tlawamaw kkilatamatkan (Hechos 20:35).Tlan nakalakgalhamanaw tiku maklakskinkgo tamakgtay xlakata nakawaniyaw lakwan tachuwin chu tlan nakalikatsiniyaw. Max wi tiku nakgalhskinkan: «¿Tlakg tlan nakmakgkatsi komo xalakgalhamana nakwan?».

TUKU XLIKANA LALH: Maria chu Carlos akgtum tamakgaxtokgat tiku lu xalakgalhamananin.

Komo xtlat María nialhtu kgalhi xpuskat chu nialhla taki kxputama, linkgolh kxchik xlakata tlan nakuentajtlawakgo. Lu lhuwa katsisni ni lhtatakgonit chu ni kaj makgtum lakapala linkgonit kʼhospital xlakata tasnuni xdiabetes. Maski wankgo pi min kilhtamaku lu tlakgwankgo, paxuwakgo, xlakata chuna la wa Jesús, lu  tlan limakgkatsikgo xlakata kuentajtlawamakgo xtlat Maria chuna la xlilat.

LA KINKAMAKGTAYAYAN UMA TASTAKYAW:

Tachuwin “wanti tlawakgo takaksni” xagriego wamputun «tiku ni matsukikgo taʼakglhuwit». ¿La nakinkamakgapaxuwayan ni namatsukiyaw taʼakglhuwit? Akxni liskujaw xlakata naʼanan takaksni, lu tlan katalalinaw tiku katalamaw. Wa xlakata, lu tlan komo namakgantaxtiyaw uma tastakyaw: «Wa mpala pi tlan, nakgalhinikgoyatit ntapaxuwan xlipaks nchixkuwin, chuna nkatlawatit» (Romanos 12:18). Tachuwin «xlipaks nchixkuwin» kilhchanima kifamiliajkan chu atanu tiku max ni kanajlakgo tuku akinin kanajlayaw. Akxni ni katakgalhiyaw taʼakglhuwit «xlipaks nchixkuwin» paxuwayaw kkilatamatkan.

TUKU XLIKANA LALH:

Nair tuwa makgkatsinit ni nakatakgalhi taʼakglhuwit xfamilia xlakata lhuwa tuku nitlan titaxtunit. Max akgkukitsis kata titaxtunita akxni xchixku makgxtakgli, chu xakstu kamakgastakma xkamanan. Chatum xkgawasa nila xmakgxtakga drogas chu lu xasitsin xwanit chu xkgawasa xkawani pi xʼama kamakgni xla chu xtsumat. Nair liwana katsi pi Biblia makgtayanit xlakata ni natalatlawanan akxni nakgalhi taʼakglhuwit. Xla ni talatlawanan o ni lisitsi tuku ni lu xlakaskinka wata liskuja xlakata tlan nakalikatsini chu nakaʼakgatekgsni (Efesios 4:31, 32). Xlakata katsininit pi ni natalatlawanan makgtayanit xlakata tlan nakatalalin xfamilia chu amakgapitsi latamanin.

Komo natlawayaw xtastakyaw Jesús, napaxuwayaw kkilatamatkan. Pero xlakata nakgalhiyaw takgalhkgalhin, kilikatsitkan tuku nakinkamaxkikanan kilhtamaku nema aku mima. ¿Tlan nakgalhiyaw takgalhkgalhin xlakata la uku kajwatiya katsiyaw pi namin kilhtamaku nakgolunaw, natatatlayaw chu naniyaw? Pero chuna kilatamatkan la uku.

Pero, anan xatlan tamakatsinin. Jehová nakamaxki lhuwa tasikulunalin tiku «nalatamakgo la Jesús latamalh». Wanit pi nalimin xasasti kakilhtamaku niku latamanin nalatamakgo chuna la xlakpuwanit: putum kilhtamaku chu ni nakgalhikgo tajatat. Biblia wan: «Uwi xputawilh Dios, anta wi kxlakgstipankan nchixkuwin; na wa natatawilakgo, chi nchu xlakan x[kachikin] nawankgoy, na watiya Dios xPuchinakan nawan. Na paks naxakanikgo Dios xlakgpixtajatkan na nialh katiʼanalh linin chu na nialh katiʼanalh talipuwan, ni mpala wa ntatasa chu na ni mpala wa ntakatsanajwat; sampi wa xlipaks katuwaj wantu xʼanan xakgasiyaj, paks lakgsputli» (Apocalipsis [Revelación] 21:3, 4).

Maria, puskat tiku kgalhi 84 kata nema lichuwinaw kxapulana artículo, lu lipaxuwa xlakata naʼakxilha akxni nakgantaxtu uma tachuwin. ¿Chu wix? ¿Katsiputuna xlakata xaxlikana latamat, wantuku nakgalhiyaw akxni namapakgsinan kxTamapakgsin Dios? (1 Timoteo 6:19.) Komo chuna, kakaputsa xtatayananin Jehová xalak minkachikin o kakatsokgnani tiku tlawakgo uma revista. * ▪