Akit xalak Texcoco. Akxni klakachilh, Texcoco kaj aktsu kachikin xwanit chu nitu xʼanan pavi-mento. Klakapastaka pi latamanin tiku lakatsu kachikinin xwilakgolh xliminkgo kxburrojkan xlistatkan. Klakachilh kʼakgtum familia nema nitu xkgalhi tumin, kinkgalhnajatsakan xakwanitaw akit xlikgalhtujun. Kintlat, xkaxtlawa huaraches (tatunu xla xuwa), nilh akxni akgtujun kata xakkgalhi. Kintse lhuwa xskuja xlakata xkinkamakgastakni.

Kintata xtlakga violin chu xpulalin akgtum orquesta nema xtlakgkgo tatlakgni xla takanajla. Atsinu ni putum kifamilia xtlakgkgo akgtum litlakgni; kintse xmakgkilhtli kpusikulan, kinkuku xkilhtli kʼakgtum ópera chu xtlakga piano. Xaklakgatiyaw kintakanajlakan. Akit monaguillo xakwanit chu misionero católico xakwamputun. Pero nachuna lu xaklakgati lilakgastanan karate, chu akxni tlakg xakakxilha tlakg xaklukujnan.

Ktanulh pukgalhtawakga xla takanajla nema xwi kkachikin Puebla niku xmasiyakan la cura nawana. Cura xakwamputun, kaj akgtum kata xtsankga xlakata xakmakgalhsputulh nialh klakgatilh tuku xmasiyakan kpusiculan. Nachuna, chatum tsumat monja xkintatalakgxtumiputun, maski ni ktlawalh tuku xlakaskin, ktsukulh makgkatsi pi xaktamakgaxtokgputun. Na kakxilhli pi lhuwa curas nitlan tuku xtlawakgo. Alh kilhtamaku klakpuwa pi nialh cura xakwamputun.

Klakpuwa pi nakkgalhtawakga la tlakgnankan anta Conservatorio Nacional de Música de la Ciudad de México. Akxni kmakgalhsputulh, kintakgalhtawakga ktamakgaxtokgli  chu kkgalhiw kgalhtati kinkamankan. Xakkilhtli kmisa chu xkimaskgawikan.

Akxni ktamakgaxtokgwi ni makgas alh kilhtamaku ktsukuw kgalhiyaw taʼakglhuwit. Kimpuskat chu akit lu lixkajni xaklalikatsiniyaw, tlakg chuna xwanit xlakata xaklalakgsitsiyaw. Pulana kaj xaklakilhniyaw, pero alistalh tsukulh klawiliniyaw. Klamakgxtakgwi akxni akgkututu katata xaklatawilaw.

Akxni pulana kkalakgapasli xtatayananin Jehová ni xaka-makgxtakga kimpuskat. Chatiy lakgatlakgkgolh kimalakcha chu kimalaknunikgolh takgalh-tawakga xalak Biblia. Xlakata xaklakpuwan pi lhuwa xakkatsini xla takanajla, tlan ktlawalh xlakata xakkalimasiyanilh pi ni xlikana tuku xmasiyakgo. Kkatlawanilh laktuwa takgalhskinin nema akit xaklakpuwan pi ni xkgalhi takgalhtin, pero kaks klilakawa akxni kilikgalhtikgolh Biblia, tsukulh kakxilha pi ni lhuwa xakkatsi. Maski chuna, kimpuskat lu lixkajni xlikatsinikgo xtatayananin Jehová chu akit xlenkgalhin xakskuja, wa xlakata nialh kkamakgamakglhtinalh.

Titaxtulh akgkitsis kata, kkatatanokglhpa xtatayananin Jehová. Tama kilhtamaku xaktawi Elvira, pero xla ni xkasitsini xtatayananin Jehová akxni xminkgo kkinchik, wa xlakata ktsukulh kgalhtawakgapara. Lhuwa kata titaxtulh xlakata xaklakgpalilh kilatamat.

Kakxilhli pi komo xlikana xakskujnaniputun Jehová, xtalakaskin lhuwa tuku xaklakgpalilh kkilatamat. Pulana, xtalakaskin nialh xakskujli kpusikulan chu xakputsalh atanu taskujut (Apocalipsis [Revelación] 18:4). Nachuna xtalakaskin pi xaktatamakgaxtokgli Elvira kpumapakgsin.

Xlakata xaluku xakwanit, tlakg tuwa kmakgkatsilh naktalakgpali. Wi akgtiy versículo xalak Biblia nema lu kimakgtayakgolh. Salmo 11:5 kimasiyanilh pi Jehová ni akxilhputun tiku lixkajni likatsi, chu anta 1 Pedro 3:7 kimasiyanilh pi komo klakaskin pi Dios nakgaxmata kiʼoración, tlan naklikatsini kimpuskat. Klilakpuwa umakgolh akgtiy versículos chu kskinilh tamakgtay Jehová; chu tsinu tsinu nialh lu ksitsilh.

La uku lu xata-paxuwan wi kifamilia. Lu kliskujma xlakata tlan nakkatalalin kinkamanan tiku ktakgalhilh xapulana kimpuskat, chu kkamakgtayama kinkamanan nema ktakgalhilh Elvira xlakata natatliwakglha xtakanajlakan.

Akxni aktsujku xakwanit cura xakwamputun xlakata nakkamakgtaya latamanin; la uku kkatsi la xlikana nakkamakgtaya, chu uma lu kimakgapaxuwa. La uku kintaskujut kmasiya la tlakgnankan. Lu kpaxtikatsini Jehová xlakata kilakgalhamalh, kimaxkinit talakaskin naklakgpali kilatamat chu tlakg tlan naklikatsi.