¿KAKS lilakawana takgalhskinin nema wi kʼuma revista? Lhuwa kaks lilakawankgo. Pero tlakg talhuwitilha latamanin tiku tlawakgo uma takgalhskinin o lakpuwankgo pi Dios ni tlan likatsi.

Makgapitsi tiku lakgtaxtuxtukgolh akxni milh tuku ni tlan akstu kakgalhskinkan: «¿Tuku xlakata masta talakaskin Dios chuna kalalh? ¿Max ni kinkalilakgaputsayan o nitlan likatsi?».

Makgapitsin latamanin lu nitlan akxilhkgo tuku likgalhtawakgakgonit kBiblia, la Munkaklat nema lalh kxkilhtamaku Noé. Kakgalhskinkan: «¿Tuku xlakata chatum Dios xapaxkina makgnikgolh lhuwa latamanin? ¿Kaj xlakata nitlan likatsi?».

¿Milh kilhtamaku miʼakstu tlawanika uma takgalhskinin? ¿Tuwa makgkatsiya nakakgalhtiya tiku tlawakgo uma takgalhskinin? Komo chuna titaxtunita o ni, namakgtayayan naʼakxilha tuku wan uma likgalhtawakga.

Xlakata katsiyaw tuku tlan chu tuku nitlan, akinin ni chuna la animales, Dios kinkatlawan «xtachuna la Dios» (Génesis 1:27). Uma wamputun pi limasiyayaw tayat nema kgalhi, katsiyaw tuku tlan chu tuku nitlan: xtayat, chu tuku wan kxTachuwin. Komo akinin ni akxilhputunaw tuku nitlan, Dios tlakg ni akxilhputun.

Xlakata ni akxilhputun Dios, xlikana tuku wan nema lichuwinanit kxTachuwin: «Chuna la akgapun tlakg talhman nixawa tiyat, nachuna kintiji ni xtachuna la mintijikan, chu kintalakapastakni nixtachuna la mintalakapastaknikan» (Isaías 55:9). Komo xlakpuwaw pi Dios nitlan likatsi xlimasiyaw pi ni kanajlayaw tama tachuwin, chuna xlimasiyaw pi kintijikan tlakg talhman ni chuna la xla Dios. Xlakata ni chuna nalakapastakaw talakaskin tlakg nakatsiyaw la likatsi Dios. Ni talakaskin nakinkakgalhskinkanan tuku xlakata nitlan likatsi Dios, wata max tlakg tlan nakitaxtu nakinkakgalhskinkanan tuku xlakata nitlan tasiya tuku tlawa. Kaʼakxilhwi tuku kilhchani nitlan likatsikan.

Akxni wanaw pi chatum lataman nitlan likatsi kaj lakputsananimaw tuku xlakata chuna tlawalh. Tiku nitlan likatsi lipaxuwa akxni patinankgo amakgapitsin o nitu makgkatsi akxni akxilha pi patinamakgolh. Akgtum liʼakxilhtit, komo chatum xatlat akgastakyawa xkgawasa kaj xlakata nitlan mamakgkatsiniputun, nitlan likatsi. Pero komo akgastakyawa kaj xlakata masiyaniputun chu kuentajtlawaputun, tlan likatsi. Tuku tlawa achatum lu lakapala lakpuwankan pi nitlan tuku tlawalh, max wix katsiya uma komo milh kilhtamaku nitlan lichuwinanka.

Tlakg kalakputsananiw pulaktiy nema wi xlitsuku uma likgalhtawakga nema tlawa pi makgapitsi nalakpuwankgo pi Dios nitlan likatsi: xlakata anan tuku malakgsputunan chu taʼakgastakyawan xla Dios nema wi kBiblia. ¿Tekgsaw anta pi Dios nitlan likatsi?