KALAKPUWANTI pi chatum mi amigo nema tlan akxilha, wi tuku tlawa nema wix ni akgatekgsniya. Max wi tiku nitlan lichuwinankgo chu wankgo pi nitlan tuku tlawalh. ¿Nachuna nalakpuwana, o nakgalhkgalhiya xlakata nawaniyan tuku xlakata chuna tlawalh? Komo xla ni anta wi akxni lichuwinamaka, ¿nakgalhkgalhiya xlakata nakatsiya xaxlikana chu nalimasiyaya pi tuku lama kaj taʼakgsanin?

Talakaskin pulana nakgalhskinkana: «¿La xlilhuwa klakgapasa kiʼamigo? ¿Tuku xlakata klakpuwan pi kiʼamigo tlan likatsi?». Uma lu tlan komo wix xkgalhskinka ¿ni xlikana? ¿Na tlan chuna kiakstukan nakinkakgalhskinkanan komo Dios lixkajni likatsi o ni?

Max tuwa namakgkatsiya tuku Dios tlawanit o mastanit talakaskin kalalh. Max lhuwa tiku nawanikgoyan pi Dios nitlan likatsi chu namalakpuwaniputunkgoyan pi kalakputsanani tuku tlawa Dios. ¿Namastaya talakaskin pi tuku limawakamaka Dios wata kaj nalitasiya pi ni xaxlikana? Uma chuna natlawaya komo wix xlikana lakgapasa Dios. Kakgalhskinka: «¿Tlan amigo kakxilha Dios?».

Komo lu tuwa titaxtunita kmilatamat, max nakgalhtinana pi Dios ni mi amigo. Pero kalakpuwanti tsinu: ¿xkuenta Dios taʼakglhuwit nema titaxtunita o wa maxkiyan tasikulunalin? Chuna la akxilhnitawa «xapuxku yunu nkatuxawat» wa Satanás (Juan 12:31). Xkuenta makgapitsi tapatin nema lama kkatuxawat. Chu ¿ni xlikana pi lhuwa taʼakglhuwit nema kgalhiyaw kinkuentajkan kaj xlakata akinin makglakgalhinanin chu nachuna kaj lakapala tuku kinkaʼakgspulayan?

Pero ¿Tuku tlawanit Dios? Biblia wan pi wa Malakatsukilh akgapun chu kaTiyatni kinkamalakapastakayan pi kimaknikan lu tlan la tatlawanit, nachuna asta wan pi kijaxanatkan, kilatamatkan, kxmakan wi (Salmo 124:8; Daniel 5:23). ¿Tuku wamputun uma?

Wamputun pi wa kinkamaxkinitan kilatamatkan (Hechos 17:28). Xlakata tuku stlan anan kkakilhtamaku, tapaxkit chu tiku kiʼamigoskan, tuku likgalhwananaw liwat, kimakankan, kintakgenkan, kinkankankan..., putum uma xtamaskiwin Dios (Santiago1:17). ¿Ni xlikana pi kiʼAmigokan litaxtu Dios xlakata lhuwa tasikulunalin kinkamaxkinitan, chu uma tlawa namaxkiyaw kintapaxkitkan chu nalipawanaw?

Maski chuna, max tuwa namakgkatsiya nalipawana Dios. Max nalakpuwana pi ni lu lakgapasa, chu xlikana la makgkatsiya. Kʼuma artículos nila putum lichuwinanaw pi ni xlikana tiku wankgo pi Dios nitlan likatsi. Pero ¿nixlikana pi tlakg tlan nakinkakitaxtuniyan komo tlakg nalakgapasaw? * Xlikana kkatsiyaw pi komo chuna natlawaya, nakatsiya tuku xaxlikana xpalakata Dios. Dios tlan likatsi. Xlikana: «Dios tapaxkit» (1 Juan 4:8).