«Nema lu tuwa kmakgkatsi kkilatamat wa pi akit nitu xlilaka.» Chuna wa chatum puskat tiku xmakgkatsi pi Jehová ni xlilakgaputsa. ¿Milh kilhtamaku nachuna makgkatsinita la uma puskat? Komo chuna max nakgalhskinkana: «¿Xlikana kililakgaputsa Dios?». Lilakgaputsanan, chuna limasiya xtachuwin Jesús. (Kalikgalhtawakga Juan 6:44.)

Niti lakgapasa xtayat chu xtalakaskin Jehová, kajwatiya Jesús (Lucas 10:22). ¿La lichuwinalh Jesús xlakata uma? «Tini la nkilakgmin, lapi ni wa xaTlat nti nkimalakgachalh, ni xkiliminilh.» Xlikana, xlakata tlan kstalaninanin Cristo nawanaw chu xlakskujni kintlatkan xalak akgapun nawanaw, talakaskin pi wa Jehová nakinkaliminan (2 Tesalonicenses 2:13). Komo nakatsiyaw tuku wamputunkgo uma tachuwin, xlikana nakatsiyaw pi Jehová kinkalilakgaputsayan kinchatunukan.

¿Tuku wamputun tachuwin pi Dios kinkaliminan? Tachuwin xagriego nema tamatitaxti kxatotonaco «liminkan» na wa kilhchani naxwatakutuya tsalh xla skiti o tamakgnin (Juan 21:6, 11). ¿Wamputun pi Jehová fuerza kinkaliminan natlawayaw xtalakaskin? Ni chuna. Xla kinkamaxkiyan talakaskin nalaksakaw tuku lakaskinaw; ni mafuerzajni kinakujkan (Deuteronomio 30:19, 20). Chatum chixku tiku putsanani Biblia wa: «Xnaku chatum chixku nila malakikan, xakstu xlitalakit». Jehová kaputsama kxlakgstipankan akglhuwa mil millón latamanin tiku xlikana malakiniputunkgo xnakujkan (1 Crónicas 28:9). Chu akxni tekgsa chatum lataman, lu lilakgatit la makgtaya.

Akxni tekgsa akgtum naku nema skujnaniputun, Jehová tasani chu lu stlan la limin niku wi (Hechos 13:48). ¿La tlawa? Limaklakaskin xalakwan xalaksasti, uma tlawa pi nachan kxnaku lataman, chu limaklakaskin xʼespíritu santo, nema limakgatekgsni xaxlikana xla xTachuwin chu nalilatama (1 Corintios 2:11, 12). Komo ni xkinkamakgtayan Dios nikxni xmatlaniw xlakskujnin xlitaxtuw, nachuna nila kstalaniw xKgawasa.

Wa xlakata, ¿tuku kinkamasiyaniyan xtachuwin Jesús xlakata Jehová, nema wi kJuan 6:44? Uma limasiya pi xla kalimin latamanin akxni akxilha pi wi tuku tlan kxnakujkan chu chatunu kalilakgaputsa. Akxni akgatekgsli uma puskat nema lichuwinaw niku litsuku uma takgalhtawakga la likatsi Jehová, lu tlan limakgkatsilh. Xla wan: «Skujnanikan Jehová lu nitu xtachuna. Komo kilaksakli xlakata akit kskujni xakwa, uma wamputun pi lu xlakaskinka kiʼakxilha». Klakaskinaw pi uma xaxlikana tuku katsini xlakata Jehová natlawa pi namalakiniya mi naku.