UMA tatsokgni nema lu lanka xtapalh tekgska xlisputni papaʼ diciembre kata 1922, akxni Ivané Javakhishvili xlakputsananima la xtsokgkan georgiano. Uma chixku xlakputsananima maktum copia xla Talmud xla Jerusalén chu akxilhli pi tutsu tatsokgni xahebreo xwi tatsokgni georgiano nema kxapakanit. *

Uma tatsokgni nema «kxapakanit» chu xtasiyajku anta kxtakilhtinit kxlibro Jeremías nema xtsokgkanit ksiglo V. Akxni nina xtekgskan uma tatsokgni xkgalhikan amaktum nema xtekgskanit ksiglo IX. Ni makgas kilhtamaku titaxtulh tekgsparaka makgapitsi tatsokgni xla Biblia ksiglo V, chu nema tlakg xamakgan. ¡Kalakpuwanti tekgska tatsokgni nema tsokgka akxni nina lhuwa siglos xtitaxtunit akxni latamalh Jesús chu xʼapóstoles!

¿Tiku matitaxtilh uma tatsokgni? ¿Kaj chatum tiku tlawalh o lhuwa latamanin tlawakgolh tiku xlakgatikgo xTachuwin Dios? Asta la uku ni takatsi tiku tlawakgolh. Maski ni takatsi tiku tlawalh, liwana katsiyaw pi ksiglo IV xanana Biblia ktachuwin georgiano, maski ni maktuminika, chu akxnitiya uma kilhtamaku georgianos kgalhikgolh xTachuwin Dios.

Libro Martirio de Shushanik, nema max tsokgka ksiglo V, kgalhi akgtum tatsokgni nema limasiya pi georgianos xlakgapaskgo xTachuwin Dios. Akxni lichuwinan tuku nitlan titaxtulh mapakgsina Shushanik, tiku tsokgli uma lichuwinan tuku limin Salmos, Evangelios chu atanu libros xalak Biblia. Na lichuwinalh tuku tlawalh xlakata namakgoxamixa malananin xalak Persia, Shushanik xchixku xwanikan Varsken, chatum lu xlakaskinka chixku xalak Georgia xalak Karthli, tiku na xmapakgsinan, nialh kanajlanilh Jesús, chu tsukulh kanajla zoroastrismo chu mafuerzajnilh xpuskat. Chuna la wan uma tatsokgni xla ni makgxtakgli la xkanajlani Jesús, wa xlakata makgnika, pero lu makgapaxuwalh tuku katsinilh xTachuwin Dios.

 Lata siglo V chuntiya matitaxtimaka xTachuwin Dios kʼgeorgiano chu copiaxtumaka. Xlakata lhuwa matitaxtimaka Biblia kʼgeorgiano litasiya xtaskujutkan tiku matitaxtimakgo chu copiaxtumakgo. Kaʼakxilhwi pulaktiy tuku tatlawalh: la matitaxtika chu la imprimirlika Biblia.

«Akit, Giorgi, kaj chatum monje, kmatitaxtinit uma Salmo kʼgeorgiano chu kmaklakaskinit xagriego chu lhuwa kliskujnit.» Uma wa xtachuwin monje Giorgi Mtatsmindeli xalak Georgia, ksiglo XI. ¿Tuku xlakata xtalakaskin xtlawaka Biblia kʼgeorgiano maski xtlawakanita akglhuwata siglos?

Ksiglo XI ni lhuwa xʼanan Biblia ktachuwin georgiano; makgapitsi libros xtsankgakgonit. Nachuna tachuwin xtalakgpalinit, wa xlakata tuwa xakgatekgskan uma tuku xtsokgkganit xalak Biblia. Maski lhuwa tiku tlawaputumparakgolh Biblia kʼgeorgiano, tuku tlawalh Giorgi wa tlakg talakgapasa. Xla tamalakxtumilh tuku xʼanan kʼgeorgiano chu tuku xʼanan xagriego, chu matitaxtilh nema ni xtatlawanit, chu asta nema putuminika xtsankga. Tuku taskujut tuku xtlawa: kakuwani xla kskuja kpusikulan chu katsisni xmatitaxti Biblia kʼgeorgiano.

Ephrem Mtsire, tiku na latamalh kxkilhtamaku Giorgi, atanu tuku tlakg xlakaskinka tlawalh: tlawalh maktum libro nema xkamakgtayalh tiku xmatitaxtikgolh katanu tachuwin Biblia. Pulaktu tuku xlichuwinan wa pi tiku xmatitaxtikgo Biblia xlimaklakaskinat tachuwin nema xapulana tsokgka Biblia chu ni xlakgpalika tuku anta xtatsokgtawilanit, pero xtalakaskin pi tlan xtakgaxmatli. Nachuna, Ephrem wa tiku pulana maklakaskilh notas chu referencias kBiblia kʼgeorgiano chu matitaxtilh xasasti libros xalak Biblia. Xtaskujut Giorgi chu Ephrem kamakgtayalh amakgapitsin na chuna xtlawakgolh.

Siglo XII, lhuwa tsukuka tlawakan libros kʼGeorgia. Kkachikin xla Gelati chu kʼIkalto tlawaka laklanka escuelas. Lhuwa tiku lakputsananikgo Biblia wankgo pi Biblia xla Gelati, nema wi Centro Nacional de Manuscritos de Georgia, wankan pi uma xasasti tatsokgni tlawalh chatum skgalala chixku xalak Gelati o Ikalto.

¿La kamakgtayalh uma Biblia latamanin xalak Georgia? Ksiglo XII, poeta xalak Georgia Shota Rustaveli tsokgli obra El caballero de la piel de tigre. Uma libro tuku tlawalh lu xlakaskinka akxilhkanit wa xlakata limapakuwikan xlimakgtiy Biblia xla georgianos. Filólogo georgiano xalak siglo XX K. Kekelidze, wa pi maski uma poeta ni maklakaskilh Biblia, «tasiya pi tuku tsokgli wa tuku wan Biblia». Uma poema lichuwinan  xkata kilhtamaku, xlakata la tlan latalalinkan, lakgalhamanankan, maxkikan kakni puskat chu kapaxkikan tiku ni kalakgapaskan, o atanu. Uma xtastakyaw Biblia kamakgtayanit lhuwa latamanin xalak Georgia, nema chuntiya lu xlakaskinka akxilhkgo umakgolh talakapastakni.

Xlikgalhsputni siglo XVII xfamilia mapakgsina xalak Georgia lu xlakaskinkgo maktum Biblia. Wa xlakata mapakgsina Vakhtang VI matlawinalh akgtum imprenta kkachikin wanikan, Tiflis. Pero, tatsokgni ni xtalakkaxwilinit xlakata xʼimprimirlika. Tlan nawanaw pi Biblia kʼgeorgiano «xmatsekgparakanit». Kaj watiya xʼanan makgapitsi tatsokgni kʼgeorgiano xala makgasa. Pero ni xatakgatsin xwi tatsokgni chu tachuwin nema xtatsokgtawilanit nialh lu xmaklakaskinkan. Sulkhan-Saba Orbeliani, chatum lingüista tiku lu skgalala mapakgsika pi xtlawakgolh chu xmasputulh uma tatsokgni xalak Biblia.

Oberliani lu liwana tlawalh uma taskujut. Xlakata xkatsini griego chu latin, chu atanu tachuwin, tlan tamalakxtumilh atanu tatsokgni ni kajwatiya ktachuwin georgiano. Pero tuku xlakpuwan ni lakgatilh Iglesia Ortodoxa xalak Georgia: sacerdotes wankgolh pi xlakgmakganit Iglesia chu makanajlilh mapakgsina xlakata nialh xmaxkilh talakaskin natsokga Biblia. Xlakata tuku wankgo makgapitsi likgalhtawakga georgianas, sacerdotes tlawakgolh pi Orbeliani lhkuyulh Biblia nema akglhuwa kata xliskujnit.

Akgtum copia xla tatsokgni xalak kachikin Mtskheta (Mcxeta) nema na lilakgapaskan xBiblia Saba asta la uku wi chu kgalhi makgapitsi tuku xtsokgnit Orbeliani. Pero makgapitsin lakpuwankgo pi niwa uma Biblia nema masputukgolh tiku xpulalinkgo takanajla. Kajwatiya tatakgatsin wankan pi Orbeliani tlawalh.

Maski lhuwa tuku tlawaka xlakata ni xʼimprimirlika Biblia, makgapitsi xla xfamilia mapakgsina chuntiya lu xlakaskinka xʼakxilhkgo. Kata 1705 chu 1711, imprimirlika makgapitsi libros xalak Biblia xlakata lu makgtayanankgolh príncipes Bakari chu Vakhushti xatakgatsin taimprimirlilh kkata 1743. Nialhla xʼama «matsekgkan».