¿Minit kilhtamaku nitu liʼakxilhkanita? ¿Milh kilhtamaku max ni maxkika tamakgtay nema mastakgo mapakgsinanin xlakata xalak atanu kachikin wix, xlakata max ni kgalhiya tumin? Chuna, wi lakwan tamakatsin: maski chuna xtayatkan lhuwa latamanin, Dios nichuna likatsi. Apóstol Pedro wa: «Dios, ni tlaway ntastokgopitsin». (Kalikgalhtawakga Hechos 10:34, 35.)

Pedro lichuwinalh uma kxchik chatum chixku tiku xwanikan Cornelio. Uma lu xlakaskinka xlakata Pedro judío xwanit chu Cornelio ni. Ama kilhtamaku, judíos nitu liʼakxilhkgo tiku ni judíos xwankgonit chu ni xkatalalimputunkgo. Wa xlakata, ¿tuku xtlawama Pedro kxchik Cornelio? Alh kaj xlakata Jehová mapakgsilh. Dios tachuwinalh Pedro chu wanilh: «¡Xlipaks wantu Dios wanit pi ni namaxkajwaliyan, chu xla matlaninit, wix ni lixkajnit kalimaxtu!». Pedro ni xkatsi pi Jehová na xtachuwinanita Cornelio chu xlimapakgsinit pi xtasanilh Pedro (Hechos 10:1-15). Wa apóstol Pedro akgatekgsli pi uma tamakxtumit xlakkaxwilinit Dios.

Pedro wa: «Xlikana nkit nkukxilha mpi wa Dios, ni tlaway ntastokgopitsin» (Hechos 10:34). Tachuwin griego nema tamatitaxti «ntastokgopitsin» kilhchanima «tiku kaj ni putum paxkikgo latamanin» (Nueva Concordancia Strong Exhaustiva). Chatum chixku tiku lakputsanani Biblia lichuwinalh la talimaklakaskin uma tachuwin: «Kilhchani chatum juez tiku lakaʼakxilha chatum chixku tiku tlawanit tuku nitlan chu anta katsi la namalakgaxokge. Kajwatiya akxilha xlakan chu uma tlawa komo nalakputsanani o ni». Dios ni chuna, ni kaj akxilha la tasiyakgo latamanin, xkachikin, komo kgalhikgo tumin o ni, o atanu.

Jehová akxilha tuku wi kkinakujkan (1 Samuel 16:7; Proverbios 21:2). Pedro wa: «Wampi kaxanikawa xala, wanti mpikuaniy Dios, chu na wantu xlilat ntu ntlaway, tlan tlaway» (Hechos 10:35). Pekuanikan Dios kilhchani maxkikan kakni, lipawankan chu ni tlawakan tuku xla ni lakgati. Tlawakan tuku akgstitum wamputun xatapaxuwan tlawakan tuku skin Dios. Jehová tlan akxilha latamanin tiku tlawakgo tuku xaʼakgstitum xlakata xnakujkan chuna kamatlawi (Deuteronomio 10:12, 13).

Komo milh kilhtamaku nitu liʼakxilhka o laksakpaxkika lu tlan namamakgkatsiniyan tuku wa Pedro. Jehová kalimin latamanin maski tanu tanu xkachikinkan xlakata naskujnikgo (Juan 6: 44; Hechos 17:26, 27). Xla kgaxmata chu kgalhti xoraciones tiku xlakskujnin maski tanu tanu xkachikinkan o komo kgalhikgo tumin o ni (1 Reyes 8:41-43). Akinin tlan lipawanaw pi akxni Jehová lakamin kkatiyatni kaj pulaktu akxilha: latamanin. ¿Makgtayanitan uma tuku katsinita xlakata tlakg nalakgapasa Dios tiku ni laksakpaxkinan?