Kdibujo akxilhaw Jesús tachuwinama chatum makglakgalhina. Uma chixku nitlan limakgkatsi xlakata putum tuku nitlan tlawanit chu wani: «Nakilakapastaka akxni wilapi nawan kmintapakgsin». ¿Katsiya tuku kgalhtima Jesús? *... Wa uma tuku malaknunima: «Xlikana kwaniyan uku: Nakintatawilayapi kParaíso».

¿La lakpuwana nawan Paraíso?... Xlakata nakatsiyaw komo xlikana tuku lakpuwanaw xlakata paraíso, kalichuwinaw tsinu paraíso nema xkatlawaninit Dios xapulana kinatlatnikan, Adán chu Eva. ¿Niku xwi? ¿Kʼakgapun o katiyatni?...

Anta kkatiyatni xwi. Wa xlakata akxni lakapastakaw pi makglakgalhina nalatama «kparaíso», kililakapastakatkan pi unu nalatama kKatiyatni, niku stlan nawan. ¿La nawan?... Kaʼakxilhwi.

Biblia wan pi Dios tlawalh akgtum «jardín kʼEdén» chu anta kawililh Adán chu Eva. ¿Lakpuwana la xlistlan xwanit?... Max lu stlan xwanit chu nitu xtachuna nema anan la uku.

¿La lakpuwana? ¿Anta natalatama Jesús makglakgalhina kKatiyatni tiku tapatika xtalakgalhin?... Ni, Jesús natawilayacha kʼakgapun chu namapakgsinan kKatiyatni niku lu stlan paraíso nawan. Akxni Jesús wa pi anta natalatama xwaniputun pi xʼama malakastakwani chu xʼama maxki putum tuku xlakaskilh. Pero ¿tuku xlakata Jesús namaxki talakaskin nalatama chatum makglakgalhina kParaíso?...

Xlikana pi uma chixku lhuwa tuku nitlan tlawalh. Pero ni kaj xakstu chuna tlawalh. Lhuwa millones latamanin latamakgonit kKatiyatni chu tlawakgonit  tuku nitlan. Chuna tlawakgolh xlakata niti kamakgtayalh nalakgapaskgo Jehová chu niti kawanilh xtalakaskin Jehová.

Wa xlakata lhuwa makglakgalhinanin nalakastakwanankgo unu kKatiyatni, chu nalakastakwanan makglakgalhina nema tachuwinalh Jesús akxni xʼamaja niy. Tama kilhtamaku nakatsi tuku xtalakaskin Jehová chu anta nalimasiya komo paxki o ni paxki.

¿Katsiya la nalimasiyakgo pi paxkikgo?... Nakgalhakgaxmatkgo. ¡Lu stlan na wan natawilayaw kparaíso akxni putum latamanin nalapaxkikgo chu napaxkikgo Jehová!