«AKIT kkgalhi akgtum tamanixnit.» Uma  tachuwin wa maklakaskilh Martin Luther King, xakgawasa 28 xla agosto kata 1963, tiku xkamakgtayakgo latamanin, limaklakaskilh uma nema tlakg lakgapaskan xtaʼakgchuwin. Makglhuwa maklakaskilh uma tachuwin xlakata xlakpuwan xʼama min kilhtamaku akxni nialh xʼanalh talaksakpaxkit. Maski tiku xkawanima xalak Estados Unidos, uma tuku xlakaskin chixku, putum latamanin lakaskinkgo.

Akxni akgtutu papaʼ xtitaxtunita xtaʼakgchuwin, 20 xla noviembre kata 1963 liwaka 100 países tatayakgolh tuku lichuwinalh ONU xlakata nialh xʼanalh talaksakpaxkit kaj xlakata tanu xcolorkan chu xalak atanu país, nachuna tlawakgolh atanu tiku na kamakgtayakgo latamanin. Titaxtunita tipuxamakaw kata pero xlakaskina nakinkatlawanikanan uma takgalhskinin: ¿la kitaxtunit?

Xtitaxtuma 21 xla marzo kata 2012 Secretario General xalak ONU Ban Ki-moon wa: «Lhuwa anan tatsokgni lu xlakaskinka nema tlan nakalimakgtayakan latamanin xlakata namasputukan, tiku nitu liʼakxilhkgo amakgapitsin, talaksakpaxkit xlakata tanu xcolorkan, xenofobia chu atanu tuku nitlan tatlawa. Pero talaksakpaxkit chuntiya kamakgapatinama lhuwa millón latamanin xlikalanka kakilhtamaku».

Maski klakalhuwa países niku nialh lu anan talaksakpaxkit chuntiya tawila uma takgalhskinin, uma tuku tatlawalh: ¿tlawanit pi nialh nakgalhikgo talaksakpaxkit latamanin? o ¿chuntiya kgalhikgo kxnakujkan? Maski uma tlawanit pi latamanin ni nalimasiyakgo pi nitu liʼakxilhnankgo chuntiya laksakpaxkinankgo. ¿Tuku xlakata? Nitu liʼakxilhkan achatum lataman tlawa pi nalitamaknukana kpulachin, pero laksakpaxkinankan anta minacha kkinakujkan. Chu nila akxilhkan,xlakata anta min kkintapuwankan chu uma tuwa namapanuya.

Xlakata namasputukan uma talakapastakni talakaskin nalakgpalikan xtalakapastaknikan latamanin o la kaʼakxilhkgo amakgapitsin latamanin, na talakaskin nalakgpalikan xtapuwankan chu la makgkatsikgo. ¿Xlikana tlan nalakgpalikan? Komo chuna, ¿la natlawakan? Kaʼakxilhwi akgtutu liʼakxilhtit xlakata la talakgpalikgonit makgapitsin latamanin chu tuku kamakgtayanit.

Linda: Akit klakachilh kSudáfrica chu lhmumukgo akit. Xaklakpuwan pi chatum lataman tiku ni lhmumokgo xwanit kaj nitu xliʼakxilhkan chu nitu katsi, kaj kskujnin tiku xalakglhmumokgon. Xaklaksakpaxkinan chu nipara xakkatsi pi nitlan tuku uma xakmakgkatsi. Uma tuku xaklakpuwan tsukulh talakgpali akxni ktsukulh kgalhtawakga Biblia. Kkatsinilh pi «Dios, ni tlaway ntastokgopitsin [o laksakpaxkinan] kxlakgstipan chixkuwin» chu tuku tlakg xlakaskinka wa xnaku ni wa xcolor o tuku tachuwin kgalhi (Hechos 10:34, 35; Proverbios 17:3). Filipenses 2:3 kimakgtayalh nakʼakgatekgsa pi ni naklaksakpaxkinan. Uma textos xalak Biblia kimasiyaninit nakʼakgatekgsa pi kilipaxkit amakgapitsin maski tanu xcolorkan. La uku tlan kmakgkatsi xlakata nialh klaksakpaxkinan.

 Michael: Akit xalak Australia. Kstakli niku ni lhuwa latamanin lakglhmumokgon chu lu xaklaksakpaxkikgo xalak Asia pero tlakg xakkasitsini tiku xalak China. Akxni xakmatlawani kimputlaw komo xakakxilha tiku xalak Asia xakmalaki xventana kimputlaw chu xakwani pi: «¡Kataspiti kmimkachikin!». Akxni ktsukulh likgalhtawakga Biblia tsukulh kakxilha latamanin la kaʼakxilha Dios. Xla kapaxki latamanin maski tanu tanu tasiyakgo. Uma tapaxkit kilakgpalinit chu la uku kkapaxki amakgapitsin. Xlikana pi nila kanajlakan la talakgpalilh kintapuwan. La uku lu klipaxuwa xlakata lu tlan kkatalalin latamanin xala alakatunu países. La uku putum kkatalalin latamanin, uma tlawanit pi lu nakpaxuwa.

Sandra: Kintse xalak Umunede kDelta tapakgsini Nigeria, xfamilia kintlat xalak Edo chu chuwinankgo esán. Xlakata kintse xalak Umunede lu patinalh xlakata xfamilia kintlat lu xlaksaskpaxkinankgo asta akxni nilh. Wa xlakata klakpuwa pi ni xakama katalalalin tiku xchuwinan esán, chu ni xakama tatamakgaxtokga tiku xalak Edo. Pero akxni ktsukulh kgalhtawakga Biblia tsukulh talakgpali kintapuwan. Biblia wan pi Dios ni laksakpaxkinan chu xla makgamakglhtinan tiku kgalhakgaxmatni, wa xlakata ¿tiku akit xlakata nakkasitsini latamanin xala alakatanu kachikin o atanu tachuwin? Klakgpalilh kintapuwan chu ktsukulh katalalin xfamilia kintlat. Xlakata ktlawalh tuku wan Biblia tlan klimakgkatsilh kkilatamat. Chu uma kimakgtayanit putum nakkatalalin latamanin maski tanu xlakatsukutkan o xtachuwinkan. ¡Chu tiku ktatamakgaxtokgli xalak Edo chu chuwinan esán!

¿Tuku xlakata Biblia kamakgtayanit lhuwa latamanin xlakata nialh nalaksakpaxkinankgo? Xlakata Biblia wa xTachuwin Dios. Kgalhi litliwakga xlakata nakalakgpalini xtapuwankan chu tuku makgkatsikgo xlakata amakgapitsin. Biblia na wan tuku talakaskin xlakata namasputukan putum talaksakpaxkit.

Maski xtamasiy Biblia makgtayanan xlakata namasputukan talaksakpaxkit, na wi pulaktiy taʼakglhuwit nema talakaskin xlakaskinka namasputukan pulana. Pulana, wa talakgalhin nema kgalhikgo latamanin. Biblia wan: «Xlakata ni anan chixku tiku ni tlawa talakgalhin» (1 Reyes 8:46). Na wa kgalhiyaw taʼakglhuwit nema xkgalhi apóstol Pablo: «Maski ktlawaputun wantu xatlan, ktakgsa yuma ntu [kimatlawiputun] ntu nitlan» (Romanos 7:21). Min kilhtamaku kinakujkan «anta ntaxtuy ntu nitlan talakapastakni» (Marcos 7:21).

Xliʼakgtiy taʼakglhuwit wa Akgskgawini tiku kinkamatlawiputunan tuku nitlan. Biblia lichuwinan pi wa makgnina chu wan pi «akgskgawi xlipaks ntachixkuwitat» (Apocalipsis [Revelación] 12:9; Juan 8:44). Wa xlakata lhuwa anan talaksakpaxkit, chu wa xlakata latamanin nila masputukgo tiku malakatsalikgo akxni wi tuku stalanikgo, nitu liʼakxilhnan, kamakgnikan lhuwa latamanin chu atanu la kalaksakpaxkikan latamanin xlakata xtakanajlakan o kalakgmakgankan xlakata ni kgalhikgo tumin.

Wa xlakata talakaskin pulana namasputukan talakgalhin chu Akgskgawini chu alistalh talaksakpaxkit. Biblia masiya pi xTamapakgsin Dios namakgantaxti uma.

Jesucristo kamasiyanilh kstalaninanin pi chuna natlawakgo oración: «Kamilh milimapakgsin. Wa nkatatlawalh ntu mintalakaskin, xtachuna lantla nkʼakgapun, nachuna kawa nkatiyatna» (Mateo 6:10). Dios nalimaklakaskin xTamapakgsin xlakata namasputu tiku tlawakgo tuku nitlan chu putum tiku laksakpaxkinankgo.

Akxni namin xTamapakgsin Dios chu namapakgsinan kKatiyatni, Akgskgawini nachikan «lakimpi nialh naʼakgskgawikgo ntachixkuwitat» (Apocalipsis 20:2, 3). Alistalh natawila «xasasti katiyatni» chu anta «ntatlawa ntalulokgtat» (2 Pedro 3:13). *

Tiku nalatamakgo kKatiyatni nialh katikgalhikgolh talakgalhin (Romanos 8:21). Wa natapakgsinikgo xTamapakgsin Dios, «ni katitlawakgolh tuku nitlan chu ni katimasputunankgolh». ¿Tuku xlakata? Xlakata «Katiyatni nalitatsama xtamasiy Jehová» (Isaías 11:9). Ama kilhtamaku putum latamanin nakatsikgo xlakata Dios chu nachuna nalikatsikgo la likatsi Dios. Ama kilhtamaku ni katiʼanalh «ntapapitsit, wa kxlakatin Dios» (Romanos 2:11).