ATSINU ni kimputumkan, min kilhtamaku  lakaskinaw wi tiku xkinkamakgtayan akxni tuwa titaxtumaw. Lakganaw chatum amigo tiku katsi nakinkatalakkaxtlawayan taʼakglhuwit chu kinkaʼakgatekgsniyan. Tiku lu tlan amigo kgalhi uma pulaktiy tayat: tlan lakkaxtlawa taʼakglhuwit chu xalakgalhamana.

Tiku tlawakgo oración putsakgo la uma amigo. Xlakata Dios lu lanka chu nila talakglakatsuwikan, tlakg tlan makgkatsikgo akxni tlawanikgo oración santos. Lakpuwankgo pi komo titaxtukgonit taʼakglhuwit nema titaxtukgo latamanin, tlakg nakaʼakgatekgsnikgo. Akgtum liʼakxilhtit, komo wi tiku makgatsankgalh tuku lu xpaxki, tlawani oración san Antonio de Padua, talismanin wan pi wa makgtayanan natekgskan tuku tsankganit o tuku kgalhankanit. Makgapitsi tlawanikgo oración san Francisco de Asís akxni kgalhikgo tantum animal nema tatatla, o wa san Judas Tadeo akxni titaxtumakgolh lu tuwa chu nialhla  lakkaxtlawakgo. 

Pero, ¿wan Biblia pi tlan nakatlawaniyaw oración santos? ¿Kgaxmata Dios umakgolh oraciones? ¿Tuku lakpuwan Dios xlakata katlawanikan oración santos? Xlakata lakaskinaw pi Dios nakinkakgaxmatniyan kilikatsitkan la lakpuwan xlakata uma.

Talismanin xlakata katlawanikan oración santos, takilhtinit ktakanajla xla católicos wankgo pi kinkapalakachuwinankgoyan, masiyakgo pi santos «putum kilhtamaku kinkapalakachuwinankgoyan kxlakatin xaTlat» «xlakata, kalakgchan chuna natlawakgo» (Catecismo de la Iglesia Católica). Wa xlakata tiku katlawani oración santos lakpuwan pi namaxkikan tuku lakaskin kaj xlakata santos tlan talalinkgo Dios.

¿Masiya Biblia uma tamasiy? Makgapitsin wankgo pi masiya, chu wankgo pi anta talichuwinan kxtatsokgni apóstol Pablo. Anta kilhtikgo tuku katsokgnanilh kstalaninanin Cristo xalak Roma: «Akit kkatasaskiniyan, kinatalan, xpalakata Kimpuchinakan Jesucristo chu tapaxkit nema kinkamaxkiyan Espíritu Santo, pi lhuwa kinpalakaskintit kmioracionkan kxlakatin Dios» (Romanos 15:30, Traducción en lenguaje actual). ¿Xkaskinima Pablo xnatalan pi xpalakachuwinankgolh kxlakatin Dios? Ni, nichuna. Tuku xkawanima Pablo wa pi chatum kstalanina Cristo tlan naskini achatum pi akxni natlawa xʼoración na kaskilh xpalakata. Pero Pablo ni wamputulh pi xtlawaniw oración chatum santo chu xkinkapalakachuwinan kxlakatin Dios. ¿Tuku xlakata ni kilitlawanitkan oración santos?

 Anta kxʼEvangelio Juan, Jesús wa: «Kit wa ntiji, chu wa xlikanaj, chu wa latamat; tini katilakgalh xaTlat lapi ni kit nkimpalakata» (Juan 14:6). Chu nachuna: «Tuku naskiniyatit xaTlat kkintukuwani xla nakamaxkiyan» (Juan 15:16, La Biblia de Nuestro Pueblo). Jesús ni wa pi wa xtlawaniw oración chu xkinkapalakachuwinan kxlakatin Dios. Xlakata nakinkakgaxmatnikanan kioracionkan, wa kilitlawanitkan Dios chu kxtukuwani Jesús natlawayaw chu niti achatum.

Akgtum kilhtamaku, kstalaninanin Jesús skinikgolh pi xkamasiyanikgolh la xtlawakgolh oración, xla kgalhtinalh: «Akxni natlawayatit mioracionkan, nawanatit: “KinTlatikan nti wilapi nkʼakgapun, katamasantujlilh mintukuwini”» (Lucas 11:2). Wa xlakata akxni makgatunu natlawayaw oración, wa natlawaniyaw Dios, ni wa Jesús chu niti achatum. Chuna la wa Jesús, liwana likatsiyaw pi kioracionkan wa kilitlawanitkan Dios, kxtukuwani Jesucristo.

Nachuna, oraciones lu xlakaskinka xlakata likakninaniyaw Dios, kakninanikan tiku ni wa Dios ni xtamasiy Biblia (Juan 4:23, 24; Apocalipsis [Revelación] 19:9,  10).

Anta kxTakgalhchuwin xalak Sipi, Jesús wililh xaliʼakxilhtit xla chatum aktsu kgawasa tiku skini liwat xtlat. ¿Xatlat namaxki xkgawasa akgtum chiwix chu ni kaxtalanchu o tantum luwa chu ni wa skiti? (Mateo 7:9, 10.) Nipara chatum tlat tiku kapaxki xkamanan chuna xtlawalh.

Kaʼakxilhwi akgtum liʼakxilhtit chuna la lakpuwan chatum tlat. Kalakpuwanti pi wix lu liskujnita xlakata tlan natalalipina minkgawasa chu putum kilhtamaku kgaxpatniya. Chu wi tuku skiniputunan nema lu xlakaskinka; pero xlakata lakpuwan pi max ni katimaxki pekuaniyan, chu atanu tiku wani xlakata naskiniyan. ¿La xmakgkatsi? ¿Chu komo putum kilhtamaku xwanilh uma lataman xpalakachuwinalh xkxni tuku xlakaskilh? ¿Tlan xʼakxilhti uma? Xlikana pi ni. Chatum tlat tiku tlan  likatsi lakaskin pi wa xkamanan katalatsuwinikgolh chu ni napekuanikgo akxni wi tuku naskinikgo.

Kalichuwinamparaw liʼakxilhtit xla aktsu kgawasa tiku skini liwat xtlat, Jesús kamalakpuwanilh tiku xkgaxmatnimakgolh: «Pus wampala pi wa wixin nchuna ni lakwan chixkuwin, katsiyatit lantla ntu ntlan maxkikgoyatit lakwan xtatakinkan milakgskgatankan, pus ¿tu xaliwaka minTlatkan nti wi nkakgapun, wantu lakwan namaxkikgoy nkatuwaj, wanti kskinikgolh?» (Mateo 7:11). Xlikana pi chatum tlat tiku tlan likatsi kamaxkiputun xkamanan tuku tlan. Wa xlakata kinTlatkan xalak akgapun lu kgaxmatputun chu kgalhtiputun kioracioneskan.

Dios lakaskin pi wa lakatitum nakilhaniyaw maski lu nitlan limakgkatsiyaw kintalakgalhinkan nema tlawayaw. Xla niti liyawanit atanu pi kakgaxmatli kioracioneskan. Biblia kinkawaniyan: «Para la tsinka takuka makglhkatsiya mintalipuwan y tu makgatuyiyan, kamaxki Kintikukan Dios, xla namakgtayayan xlakata tlan natalaya» (Salmo. 55:22). Ni wa natlawaniyaw oración santos chu niti achatum wata wa natalakatsuwiniyaw Jehová komo chuna tlakg tlan natalakatsuwiniyaw koración.

Kintlatkan xala kʼakgapun kinkalilakgaputsayan kinchatunukan. Xla kinkamakgtayaputunan kintaʼakglhuwitkan chu kinkawaniyan pi katalakatsuwiniw (Santiago 4:8). ¡Lu paxtikatsiniyaw pi tlan talakatsuwiniyaw kiDioskan chu kintlatkan Tiku kgaxmata oración! (Salmo 65:2.)