Biblia pulaktiy lichuwinan tuku xlakata. Xapulana wa pi, maski latamanin lhuwa tuku tlawakgonit, ni kinkatlawakan xlakata kiakstukan nakinkapulalinkanan. Xlipulaktiy wa pi «kxlitliwakga akgskgawini wilakgo, xlipaks ntachixkuwitat». Wa xlakata lakchixkuwin ni la tlawakgo kaʼanalh takaksni. (Kalikgalhtawakga Jeremías 10:23 chu 1 Juan 5:19.)

Latamanin ni lapaxkikgo chu lhuwa tuku kgalhiputunkgo, uma tlawa pi ni kaʼanalh takaksni. Xlakata na anan takaksni xlikalanka katiyatni talakaskin kaj chatum mapakgsina naʼanan, akgtum nema nakamasiyani latamanin napaxkikgo tuku xatlan chu nakalilakgaputsa amakgapitsin. (Kalikgalhtawakga Isaías 32:17 chu 48:18, 22.)

Dios tiku kgalhi xliputum litliwakga lichuwinanit pi nawili akgtum tamapakgsin xpalakatakan latamanin chu nakamasputu mapakgsinanin xalak katuxawat (Daniel 2:44). Tiku mapakgsina nalitaxtu wa xKgawasa Dios, Jesús, Biblia limapakuwi «xaPuxku tiku masputu Taʼakglhuwit». Xla namasputu tuku nitlan chu nakamasiyani latamanin tiji xla takaksni. (Kalikgalhtawakga Isaías 9:6, 7 chu 11:4, 9.)

La uku anan lhuwa millones latamanin, xlakata xtamakgtay Jesucristo chu xla Biblia, kamasiyanimakgolh amakgapitsin la tlan nalatalalinkgo. Nialh makgas xlikalanka Katiyatni na anan takaksni. (Kalikgalhtawakga Isaías 2: 3,  4 chu 54:13.)