KATALAKATSUWINI DIOS
Xla kinkamaxkiyan tuku maklakaskinaw
¿Xlikana kinkalilakgaputsayan Jehová o ni kuentaj tlawa komo patinanaw? Lu tlan limakgkatsiyaw takgalhtin nema masta Biblia. Dios xlikana kinkalilakgaputsayan chu lakaskin pi xatapaxuwan kalatamaw. Chali chali kamaxki tuku maklakaskinkgo latamanin, asta tiku ni paxtikatsinikgo lu tlan kakitaxtuni xlakata Dios lu xapaxkina. Kalakpuwaw tuku wa apóstol Pablo. (Kalikgalhtawakga Hechos 14:16, 17.)
Latamanin xalak Listra tiku ni kskujnanikgo Dios, Pablo kawanilh: «Wanti xalipulana lantla mintilhanit nkilhtamaku, limakgaxtakgkgolh natlawakgoy ntu ntlawaputunkgoy xlipaks nchixkuwin. Ni wa ntilimakgaxtakgkgolh mpala kaj ni xanalh ntu nalilakgapaskgoy lantla tlan xla ntu ntlaway sampi kinkamakaminiyan sin xala kʼakgapun, chu [kinkamaxkiyan tuku maklakaskinaw], chu ntapaxuwan kkinakukan». ¿La akgatekgskgolh latamanin uma tachuwin?
Latamanin xalak Listra xkatsikgo tuku xkalitachuwinama Pablo, xlakata kpukuxtu kskujkgo chu putum xmakgalakgo tuku xchankgo. Pablo kawanilh pi Dios wa Tiku masta sen chu tachanan putum kilhtamaku. Wa xlakata lhuwa tuku xmakgalakgo chu tuku xlipaxuwakgo, putum tuku xmakgalakgo xtasikulunalin Dios.
Umakgolh versículos lu tlan liʼakxilhtit kinkamasiyanikgoyan xlakata Jehová Dios.
Jehová kinkamaxkiyan talakaskin nalaksakaw tuku natlawayaw. Kalakapastakwi pi Jehová kamaxkilh talakaskin tiku ni Judíos xwankgonit «naʼankgo niku xlakan na amputunkgo». Maktum libro nema maklakaskikgo tiku matitaxtikgo atanu tachuwin wankgo pi uma tachuwin wamputun «natlawakgo tuku xlakan xlakpuwankgonit» o «nalaksakkgo tlakg xatlan tiji». Chuna la akxilhaw, Jehová ni kamafuerzajni latamanin xlakata nakakninanikgo, kinkamaxkinitan talakaskin nalaksakaw tuku natlawaputunaw (Deuteronomio 30:19).
Jehová lakaskin kalakgapaswi. Pablo wa: «Ankgalhin limakatsiniputunkgolh». Libro nema lichuwinawa wan pi uma tachuwin kilhtchani pi «Jehová nikxni matsekgli la kgalhi xtayat». Putum tuku tlawanit nema akxilhaw limasiya xtayat «ntu ni tasiyuy» la uma, tlan likatsi, xliskgalala, xlitliwakga chu xtapaxkit (Romanos 1:20). Biblia lhuwa kinkamasiyaniyan xlakata Jehová Dios (2 Timoteo 3:16, 17). ¿Ni xlikana pi Jehová lakaskin pi kalakgapaswi?
Chali chali Dios kamaxki latamanin xtasikulunalin asta tiku ni paxtikatsinikgo
Jehová lakaskin pi kapaxuwaw. Pablo wa pi «[kinkamaxkiyan tuku maklakaskinaw], chu ntapaxuwan kkinakukan». Asta tiku ni tlawa xtalakaskin Dios makglhtinan tasikulunalin chu tlan makgkatsi kxnaku chu xatapaxuwan tawila kxlatamat. Pero, Dios lakaskin pi xatapaxuwan katawilaw putum kilhtamaku, uma tlan nakgantaxtu komo nakatsiyaw xaxlikana xlakata Dios, nakgalhakgaxmataw (Salmo 144:15; Mateo 5:3).
Kimputumkan chali chali litamakgtayayaw xtasikulunalin Jehová. ¿Katsiputuna la napaxtikatsiniya Dios xlakata makgapaxuwayan kminaku chu maxkiyan liwat?
Textos xalak Biblia nema tlan nalikgalhtawakgaya uma papaʼ:
