Michelle: Skgalhen, uma kilhtamaku kkamakgxtakgnimaw latamanin maktum tratado. Nema wanikan: ¿Katsiputuna tuku xaxlikana? Uma mila.

Sofía: ¿Lichuwinan takanajla?

Michelle: Chuna. Limin akgchaxan takgalhskinin. Kiwani nema lakgatiya...

Sofía: Ni kkatsiputun. Ni kmakgalhtiputunan minkilhtamaku.

Michelle: ¿Tuku xlakata chuna wana?

Sofía: Xlakata akit klakpuwan pi max ni anan Dios.

Michelle: Kpaxtikatsiniyan pi kiwanipat. ¿Putum kilhtamaku chuna lakpuwanita?

Sofía: Nichuna xaklakpuwan, akxni aktsujku xakwanit xakan kpusikulan, pero makgasata nialh kan.

Michelle: Haaa..., kintukuwani Michelle.

Sofía: Kiwanikan Sofía.

Michelle: Lu kpaxuwa pi klakgapasman Sofía.

Sofía: Nachuna akit.

Michelle: Ni xafuerza naklitachuwinan kintakanajla, pero ktlawaniputunan akgtum takgalhskinin: ¿tuku tlawanit xlakata nalakpuwana pi nitu Dios?

Sofía: Xlakata kintse chocarlilh kxputlaw akgkutujuna kata.

Michelle: Kgoxita. ¿Lu nitlan tuku lanilh mintse?

Sofía: Nialhla tlawan.

Michelle: Lu lilakgaputsa tuku akgspulalh. Max lu nitlan makgkatsi.

Sofía: Chuna, chali chali klakpuwan: «Komo Dios anan, ¿tuku xlakata mastalh talakaskin chuna xlalh? ¿Tuku xlakata masta talakaskin kapatinaw?».

Michelle: Taʼakgatekgsa tuku makgkatsiya chu tuku takgalhskinin tlawaya. Akxni patinanaw tlawayaw uma takgalhskinin. Makgapitsi lakchixkuwin chu lakpuskatin tiku kskujnikgo Dios na tlawakgolh uma takgalhskinin.

Sofía: ¿Xlikana?

Michelle: Chuna. ¿Tlan nakmasiyaniyan akgtum liʼakxilhtit xalak Biblia?

Sofía: Tlan.

Michelle: Kaʼakxilhti takgalhskinin nema palakachuwina Habacuc tlawanilh Dios. Kalikgalhtawakgaw tuku wan Habacuc capítulo 1, versículos 2 chu 3 «¿Asta tuku kilhtamaku Jehová naktasaskiniyan tamakgtay chu wix ni kgaxmata? ¿[Asta tuku kilhtamaku] naktasaskiniyan tamakgtay xlakata lhuwa lachipakan, chu ni kilakgmaxtuya? ¿Tuku xlakata kimakxilhniya tuku nitlan?». ¿Xtachuna takgalhskinin nema wix tlawaya?

Sofía: Xtachuna.

Michelle: Dios ni kilhnilh Habacuc xlakata tlawalh uma takgalhskinin, chu na ni wanilh pi xlakaskin tlakg xkgalhilh takanajla.

Sofía: Ni xakkatsi.

Michelle: Biblia na kinkawaniyan pi Dios makgkatsi kintapatinkan chu kinkalakgkatsalakaminan.

Sofía: ¿Tuku wamputun uma?

Michelle: Nakmasiyaniyan akgtum liʼakxilhtit  anta kʼÉxodo 3:7, kalikgalhtawakga katlawa litlan.

Sofía: Tlan. «Chu Jehová wa: “Kakxilhnit la kamapatinimaka kinkachikin nema wi kʼEgipto, chu kkgaxmatnit la kinkilhminikgo xlakata lu kamaskujumaka; xlakata kkatsi la patinamakgolh”».

Michelle: Paxtikatsinilh. Chuna la akxilhwi kBiblia ¿Dios akxilha akxni patinankgo latamanin?

Sofía: Xlikana, chuna tasiya.

Michelle: Ni kaj watiya akxilha tuku lama. Kaʼakxilhpara awatiya tuku wan uma versículo. Dios wa: «Kkatsi la patinamakgolh». ¿Limasiya uma tachuwin, pi Dios nitlan likatsi?

Sofía: Ni.

Michelle: Ni watiya wamputun, akxilhkan chatum lataman akxni patinama chu ni xtachuna makgkatsikan la patinama.

Sofía: Xlikana.

Michelle: Kalakapastakwi tuku lichuwinaw, kaʼakxilhparaw atanu liʼakxilhtit akxni xkachikin Dios xpatinama. Uma anta wi kʼIsaías 63:9. Xapulana uma versículo wan: «Putum kilhtamaku akxni xpatinankgo xla na xpatinan». Tlan nawana pi Dios nitlan xlimakgkatsi akxni xpatinan xkachikin.

Sofía: Xlikana tuku wana.

Michelle: Dios kinkalilakgaputsayan chu ni lakaskin napatinanaw. Akxni patinanaw na nitlan limakgkatsi.

Michelle: Kmasiyaniputunan awatiya texto.

Sofía: Tlan.

Michelle: Kaʼakxilhwi tuku masiya Biblia xlakata xlitliwakga Dios kʼJeremías 10:12, kalikgalhtawakga katlawa litlan.

Sofía: Wan: «Xla xTlawana katiyatni xlakata kgalhi litliwakga, Tiku lakatum wililh katiyatni nema makgalanan xlakata xliskgalala, chu xlakata xliskgalala lanka tlawalh akgapun».

Michelle: Paxtikatsinilh. Kalakputsananiw tsinu uma texto. ¿La xlilhuwa litliwakga maklakaskilh Dios xlakata tlawalh katiyatni chu putum tuku anan?

Sofía: Lhuwa litliwakga.

Michelle: Komo Dios kgalhi lhuwa litliwakga, ¿ni xlikana pi tlan natlawa tuku natalakaskin xlakata tlan natawila tuku malakatsukinit?

Sofía: Xlikana.

Michelle: Kalakpuwanti xlakata mintse. ¿Tuku xlakata nitlan limakgkatsiya akxni akxilha pi patinama?

Sofía: Xlakata kintse chu lu kpaxki.

Michelle: Komo wix xkgalhi litliwakga xlakata tlan xmapaksa, ¿xmapaksa?

Sofía: Chuna xaktlawalh.

Michelle: Kalakpuwanti tuku wamputun uma. kBiblia akxilhnitaw pi Dios na nitlan limakgkatsi akxni patinanaw chu kgalhi litliwakga xlakata namasputu kintapatinkan. Maski Dios lu masputuputuna kintalakgalhinkan lu tayanima xlakata ni tunkun namasputu. ¿ni xlikana?

Sofía: Ni makgtum chuna xaklakpuwanit.

Michelle: Max nakinkakgalhskinkanan: ¿Tuku xlakata nitu tlawanit? ¿Lakpuwana pi wi tuku xlakata Dios nina masputu kintapatinkan? *

Sofía: Ni kkatsi, max wi tuku xlakata.

Michelle: Takgaxmata minteléfono, komo lakaskina atanu kilhtamaku naktaspitpara chu nalichuwinamparayaw uma tema.

Sofía: Tlan, paxtikatsinilh. *