¿Tlan lipawankan takanajla? Tumin
Estelle, * xkataʼan xkamanan kxpusikulan, wanilh tiku xpulalin xtakanajla pi xaʼakgatekgsniputun Biblia, xlakata tiku pulalin xtakanajla ni makgtayalh, nialh alh. Estelle wan: «Tiku xpulalinkgo kintakanajla kintsokgnanikgolh, kiwanikgolh komo nialhla xakalh, tlan kaj xakkamalakgachanilh kintumin. Kkakgatekgsli pi kaj kintumin xlakaskinkgo».
Angelina, tiku lu makgasa kanajla wa: «Takanajla niku xakan makgtutu xmatitaxtikan niku mujukan tumin, chu akxni makgatunu xmatitaxtikgo xlakaskinkgo pi xakmujuw kintuminkan. Makgatunu xaktamakxtumiyaw kskinkgo tumin. Klakpuwa pi “ni xkgalhikgo xʼespíritu Dios”».
La likatsikgo takanajla nema wix lakgapasa, ¿kamafuerzajni latamanin xlakata namastakgo xtuminkan? ¿Masiya Biblia pi chuna xlitatlawat?
¿TUKU MASIYA BIBLIA?
Jesús, tiku makilhtsukilh xapulana kstalaninanin Cristo wa: «Kaj chunata makgamakglhtinantit, pus na kaj chunata nkamastatit» (Mateo 10:8). Tuku masiya Biblia ni la stakan chu uma putum tlan namakglhtinanaw.
¿La kxokgokgo tuku xmaklakaskinkgo congregación xapulana kstalaninanin Cristo?
Xmastakgo «lantla nchatunu mpuwa namastay kxnaku, chuna nkamastalh; ni kaj chalipuwana namastay, chu na ni kaj fuerzaj; sampi wa Dios, paxkiy wanti xlipaks xtapaxuwan limastay» (2 Corintios 9:7). Apóstol Pablo xtlawa laktsu chiki xla xuwa xlakata nalixokgo tuku xmaklakaskin akxni kskujnanima Dios (Hechos 18:2, 3). Xla wa: «Kxakskujaw ntantaku tantaskaka, lakimpi tini chatum wixin nti xakkamamakgatsankganin lantla kkaliʼakgchuwinanin xatlan xtamakatsinin Dios» (1 Tesalonicenses 2:9).
¿NA MATAJINANKGO XTATAYANANIN JEHOVÁ?
Niku tamakxtumikgo xtatayananin Jehová, ni laktapalaxla tuku litlawakanit. ¿La taxokgo tuku maklakaskinkgo? Nikxni matitaxtikgo niku mujukan tumin chu ni skinkgo tumin. Tiku masta tumin kaj xlakata paxtikatsini tuku masiyanikan chu kaj xakstu muju xtumin kʼakgtum caja nema wi kxpukgalhtawakgakan.
¿La xlitaxokgot tuku maklakaskinkan ktakanajla?
Xlikana pi imprimirtlawakan chu linkan alakatanu kachikin uma revista, talakaskin tumin. Pero kirevistaskan nitu tatsokgnit pi wix milimastat tumin. Tiku tlawakgo uma revista kaj watiya lakaskinkgo natakatsi xaxlikana xla Biblia.
¿La lakpuwana xlakata xtatayananin Jehová? ¿Tatalakxtumi tuku lichuwinalh Jesús xlakata tumin, chu xliʼakxilhtitkan xapulana kstalaninanin Cristo?
^ párr. 2 Talakgpalikgonit makgapitsin tukuwani.
