Komo wi akgtum takanajla nema tlawanit pi ni tlan namakgkatsiya, wa xlakata max nialh katilipawanti atanu takanajla. Pero, kkawaniputunan pi wi akgtum takanajla nema wix tlan nalipawana. Akxni Jesús latamalh unu kKatiyatni laksakli kstalaninanin chu kamasiyanilh nalatamakgo chuna la wan Dios. La uku wilakgolhku tiku xlikana kstalaninanin Cristo, xlikana putum xnakujkan lilatamakgo tuku masiya Biblia. ¿Tiku umakgolh latamanin?

Estelle, tiku lichuwinawa, wan: «Akxni kimakgalhtawakgekgolh xtatayananin Jehová, ktsukulh akgatekgsa. ¡Lu xlikana tuku wan tachuwin nema wi kJuan 8:32: “Nalakgapasatit ntalulokgtat [o tuku xaxlikana], chu na wa ntalulokgtat, nakamalakgtaxtiyan”!».

Ray wan: «Xtatayananin Jehová kilimasiyanikgolh Biblia pi Dios ni wa kamapatini latamanin. Xla katsi tuku xlakata mastama talakaskin kaʼanalh tapatin pero nialh makgas namasputu».

Xlikana pi tuwa tamakgkatsi natlawayaw tuku xaʼakgstitum chu ni nakgalhiyaw tayat nema kgalhikgo lhuwa latamanin, pero tlan natlawayaw tuku tlan. Lhuwa latamanin lakaskinkgo tamakgtay xlakata naʼakgatekgskgo Biblia chu natlawakgo tuku masiya. Wa xlakata, akgatunu semana xtatayananin Jehová makgalhtawakgekgo lhuwa millones latamanin kxchikkan xlikalanka Katiyatni. Lhuwa latamanin katsinimakgolh tuku xlikana masiya Biblia, chu talakglakatsuwimakgolh Malakatsukina chu xatapaxuwan lamakgolh. *

Alimakgtum akxni natachuwinankgoya, kakgalhskinkgo tuku xlakata lipawankgo xtakanajlakan. Kaʼakxilhti xtakanajlakan chu xtayatkan, kalakpuwanti komo wi takanajla nema tlan nalipawana.