¿Lakpuwana pi wi Dios? Komo chuna, ¿tlan nalimasiyaya? Putum tuku akxilhaw litasiya pi wi chatum Malakatsukina tiku lu skgalala, tliwakga chu lu xapaxkina. ¿Tuku limasiya pi chuna? ¿Tlan kalipawankan? Xlakata natekgsaw xtakgalhtin, kaʼakxilhwi tuku katsokgnanilh apóstol Pablo xapulana kstalaninanin Cristo xalak Roma.

Xla wa: «Xampi asta lantla nkilhtsukunit nkatuxawat, wa nkatuwa ntu ni tasiyuy xla xpalakata, mpi ni anan xtamaktat xlitliwakga, chu lantla xla [...]Dios, lu wa lakatanks litakatsi wa xpalakata ntu ntlawanit. Chuna mpi nila ntamatsankgananikgoy» (Romanos 1:20). Chuna la lichuwinalh Pablo, putum tuku anan litasiya pi anan chatum Malakatsukina. Tlakg kalakputsananiw umakgolh tachuwin.

Pablo tsokgli pi tlan akxilhkan la likatsi Dios «asta lantla nkilhtsukunit nkatuxawat». Tachuwin xagriego nema tamatitaxti xatotonaco wan pi «nkatuxawat» kilhchani latamanin, ni wa Katiyatni. a Pablo xlichuwinama pi akxni kamalakatsukika latamanin, xlakan akxilhkgonit la kgalhi xtayat Dios xlakata tuku tlawanit.

Tuku litasiya ni tsekg wi, wata «lakatanks litakatsi» chu tlan akxilhaw. Tuku anan nema tlakg xalanka chu asta tlakg xalaktsina litasiya pi wi chatum Malakatsukina tiku kgalhi lu stlan tayat. Akgtum liʼakxilhtit, kalakapastakwi la litasiya xliskgalala putum tuku anan. ¿Ni xlikana pi uma limasiya xliskgalala Dios? ¿La lhuwa anan staku kʼakgapun? ¿Chu akxni tliwakga takgayawa pupunu? ¿Ni xlikana pi litasiya xlitliwakga Dios? ¿Chu lhuwa tuku tanu tanu la takgalhwanan tuku wayaw, chu la lu stlan tasiya akxni xkgakgama chu akxni tatsekga chichini kakgotanun? ¿Ni xlikana pi litasiya la Dios lu kapaxki latamanin? (Salmo 104:24; Isaías 40:26.)

Lhuwa anan tuku litasiya pi wi Dios chu wantiku ni akxilhkgo chu ni kanajlaputunkgo «nila ntamatsankgananikgoy». Chatum tiku lakputsanan wili xaliʼakxilhtit. Kalakpuwanti pi chatum tiku matlawanima xputlaw akxilha kcarretera akgtum letrero niku wan «Kapit pakgxwiki», pero ni tlawa tuku wan letrero. Akxni policía machokgo xlakata namultarli, tiku matlawanima putlaw wan pi ni akxilhli letrero. Policía ni kanajlani xlakata letrero lu liwana tasiya chu tiku matlawanima putlaw stalanka lakawanan. Tiku matlawaninama xliʼakxilhat putum letreros chu xlikgalhakgaxmatat. Tuku anan kkakilhtamaku litasiya pi anan Dios chu putum kilhtamaku tlan akxilhaw. Chu akinin tiku kgalhiyaw talakapastakni, tlan akxilhaw. Nila nawanaw pi ni tasiya.

Putum tuku anan kkakilhtamaku lhuwa tuku kinkamasiyaniyan xlakata kiMalakatsukinakan. Pero wi atanu libro nema tlakg kinkamasiyaniyan xlakata Dios, wa Biblia. Anta kxpáginas takgalhti uma lu xlakaskinka takgalhskinin: ¿Tuku lakpuwanit natlawa Dios xlakata Katiyatni chu latamanin? Akxni katsiyaw xtakgalhtin uma takgalhskinin kinkamakgtayayan tlakg tlan natalalinaw Dios, nema «nkatuwa ntu ni tasiyuy [...] lu wa lakatanks litakatsi» kʼuma kakilhtamaku.