Akit kstakli kʼaktsu kachikin wanikan Warialda (Nueva Gales del Sur). Lu  lhuwa  kgalhikgokan animales la borregos, wakax, chu lhuwa tachanan makgalakan. Ni lu anan basura chu ni lu anan tiku nitlan likatsikgo.

Akit xapuxku chu kkgalhi kgalhnajatsa kinatalan, ktsukulh skuja akxni xakkgalhi akgkututu kata xlakata xakkamakgtayalh kifamilia. Xlakata ni lhuwa takgalhtawakga xakkgalhi xakskuja niku xkakuentajtlawakan animales. Akxni xakkgalhi akgkukitsis kata xakskuja niku kakuentajtlawakan wakax, chu xakkamamansojli kawayu.

Taskujut nema xaktlawa xkgalhi tuku tlan chu tuku ni tlan. Lu klakgatilh uma taskujut, chu niku xakskuja. Xakmapasi lhkuyat katsisni, xakakxilha papaʼ chu staku chu la xmuksun kakiwin. Xaklakpuwan pi max wi tiku tlawalh umakgolh nema lu stlan xtasiya. Pero niku xakskuja na xʼanan tuku nitlan. Tiku xakkataskuja lixkajni xchuwinankgo chu lhuwa kxkulikgo chu akit nachuna ktsukulh tlawa.

Akxni kmakgatsilh akgkutsayan kata kkalh kSydney. Soldado xakwamputun pero ni kimakgamakglhtinanka xlakata ni lhuwa xakkgalhtawakganit. Ktekgsli taskujut kSydney, chu akgtum kata kskujli anta. Uma kilhtamaku akxni xapulana kkatachuwinalh xtatayananin Jehová. Tlan ktlawalh chu kkataʼalh kxtamakxtumitkan, tunkun kkatsilh pi tuku xmasiyakgo xaxlikana.

Ni lhuwa kilhtamaku titaxtulh, ktaspitpa kpukuxtu. Kkalh kGoondiwindi (Queensland). Ktekgsli taskujut chu ktamakgaxtokgli, pero ktsukulh wa kuchu.

Kkgalhiw chatiy kamanan. Akxni lakachinkgolh kinkamanan, liwana ktsukulh lakpuwan tuku xaktlawama kkilatamat. Ktsukulh lakapastaka tuku xakkgaxmatnit kxtamakxtumitkan xtatayananin Jehová kSydney, chu klakpuwa pi wi tuku kilitlawat xwanit.

 Ktekgsli xamakgan Makatsinina, niku xlimin dirección xla sucursal xalak Australia xla xtatayananin Jehová, kmalakgachalh maktum carta niku kskilh xkimakgtayaka. Kinkgalhtika, chu milh chatum xtatayana Jehová tiku lu tlan xlikatsi, tunkun tsukulh kilimakgalhtawakge Biblia.

Chuna la kkgalhtawakgatilhalh Biblia, kkakxilhli pi xtalakaskin lhuwa tuku xaklakgpalilh kkilatamat. Akgtum versículo xalak Biblia lu chalh kinaku 2 Corintios 7:1 uma versículo kinkawaniyan pi «kachakgamakgaw mpaks ntu xlakgalhilh nkintiyatliwakan».

Liwana klakpuwa pi nialh nakxkuli chu nialh nakwa kuchu. Tuwa kmakgkatsilh nakmakgxtakga kintayat xlakata makgasata chuna xaklin kilatamat. Pero xaklatamaputun la lakgati Dios. Texto nema tlakg kimakgtayalh wa tuku wan Romanos 12:2: Hua Xasasti Talaccaxlan, 1999. «Nialh chuna kalatapatit la lamakgo katiwa tachixkuwitat xala katuxawat [...] wata kalakgpalitit mintalakapastaknikan». Kkatsilh pi xlakata xaklakgpalilh kintayat xtalakaskin xaklakgpalilh kintapuwan chu nachuna xakakxilhli la lixkajni kaliʼakxilha Dios. Dios kimakgtayalh xlakata nialh nakxkuli chu nialh nakwa kuchu.

Nema tlakg tuwa kmakgkatsilh wa nakmakgxtakga lixkajni la xakchuwinan. Xakkatsi xtastakyaw Biblia nema wi kʼEfesios 4:29: «Nitu mpala tu nitlan tachuwin nataxtuy kminkilhnikan», maski chuna, nila lakapala kmakgxtakgli la lixkajni xakchuwinan. Texto nema lu kimakgtayalh wa Isaías 40:26. Niku wan: «Kalakapitit kʼakgapun chu kaʼakxilhtit. ¿Tiku katlawanit tuku anankgo? Wa Tiku akgatunu staku kamaxtu, putum kalimapakuwi xtukuwani. Xlakata Xla kgalhi lhuwa litliwakga, nipara akgtum tsankga». Wa xlakata komo Dios kgalhi litliwakga chu tlawalh lanka akgapun, xla tlan xkimaxkilh litliwakga xlakata tlan xaklakgpalilh kilatamat chu xakmakgapaxuwalh. Kliskujli nialh nakwan lixkajni tachuwin chu kskinilh tamakgtay Dios kʼoración.

Xlakata niku xakskuja la xkuentajtlawana animales ni la lhuwa tiku xakkatachuwinan xlakata ni lhuwa tiku anta lamakgolh. Pero, anta ktamakxtumit xla xtatayananin Jehová, kkatsinilh la nakkatachuwinan latamanin. Kkatsinilh la nakkalitachuwinan amakgapitsin xalakwan xalaksasti xlakata  xtamapakgsin Dios (Mateo 6:9, 10; 24:14).

Nina akglhuwa kata titaxtunit kilakgayawaka taskujut ktamakxtumit la kgolotsin. Lu lanka talakgalhaman kakxilha xlakata nakkamakgtaya kinatalan tiku na watiya takanajla kgalhikgo.

Kpaxtikatsini Jehová pi maski ni lhuwa kanit kʼescuela xla kimaxkilh talakaskin naklakgapasa (Isaías 54:13). Nachuna klakpuwan tuku wan Proverbios 10:22: «Xtasikulunalin Jehová... lhuwa tuku kinkamaxkiyan».