NOÉ chu xfamilia makxtum wilakgolh. Kilhtin wi lanka munkaklat. Ni lu tasiya xlakan Noé chu xfamilia xlakata ni lu maxkgakgenan lámpara xla aceite. Lu kaks kamalakawani, o lhputut lakawankgo. Takgaxmata kxakgstin chu kxpaxtunin arca la lu lhuwa senama. Lu tliwakga makasan la mima sen.

Noé kalakaʼakxilha xfamilia tiku ni makgxtakgkgolh chu lu kapaxki: xpuskat, kgalhtutu xlakgkgawasan chu kgalhtutu xnapuwitin, o xnataskinan. Lu paxuwa xnaku. Ama lu tuwa kilhtamaku Noé lu max lipaxuwa xlakata katawi tiku lu kapaxki. Max asta akxtum katatlawa oración xfamilia, lu lhuwa jilima kilhtin wa xlakata pixlanka chuwinan.

Noé lu lhuwa takanajla xkgalhi, wa xlakata Jehová lakgmaxtulh, nachuna xfamilia (Hebreos 11:7). Pero, ¿nialh xtalakaskin nakanajla xlakata kaskakni niku xwilakgolh? Ni chuna, xlakata kilhtamaku nema aku xmima tlakg xtalakaskin xkgalhilh takanajla. Akinin nachuna talakaskin natlawayaw, xlakata lu katuwa lamaw. Kaʼakxilhwi tuku kinkamasiyaniyan xtakanajla Noé.

Milh sen «tipuxum kilhtamaku chu tipuxum katsisni» (Génesis 7:4, 11, 12). Chuchut tlakg tsukulh tapulhmani. Uma kilhtamaku Noé akxilhli la Jehová kalakgmaxtu tiku akgstitum chu nachuna kamalakgaxokge tiku nitlan likatsikgo.

Munkaklat masputulh tuku nitlan tlawakgolh ángeles. Satanás tlawalh pi xtlawakgolh tuku ni tlan, lhuwa ángeles «makgaxtakgkgolh xputawilhkan» kʼakgapun xlakata xlatamakgolh kKatiyatni chu tatamakgaxtokgkgolh lakpuskatin, tiku takgalhikgolh kamanan nema kalilakgapaska nefilim (Judas 6; Génesis 6:4). Satanás max lu paxuwalh, xlakata tlawalh pi latamanin tlakg xtlawakgolh tuku nitlan, nema Jehová xtlawanit chu ni anan tuku xtachuna.

Pero, munkaklat tlawalh pi ángeles tiku ni kgalhakgaxmatnankgolh xmakgxtakgkgolh xmaknikan nema xkgalhikgo, chu taspitparakgolh kʼakgapun; nikxnila xtlawaparakgolh xmaknikan la xla latamanin. Makgxtakgkgolh xkamankan chu xlakpuskatinkan, tiku muxtukgolh chu putum latamanin xalak ama kilhtamaku.

Kxkilhtamaku Enoc, max akgtujun siglo akxni nina xmin munkaklat, Jehová xwanit pi xʼama kamasputu tiku nitlan xlikatsikgo (Génesis 5:24; Judas 14, 15). Pero latamanin tlakg nitlan xkgalhikgo xtayatkan, lu nitlan tuku xtlawanimakgolh Katiyatni chu xlatlawanikgo tuku nitlan. Xchanita kilhtamaku xlakata nakamasputukan. ¿Lipaxuwalh Noé chu xfamilia tuku xlama?

Ni. Na nilipaxuwalh xapaxkina Dios (Ezequiel 33:11). Jehová tlawalh tuku xtalakaskin xlakata xkalakgmaxtulh lhuwa latamanin. Malakgachalh Enoc xlakata xkamakatsinilh latamanin, nachuna limapakgsilh Noé pi xtlawalh akgtum arca. Noé chu xfamilia akglhuwa kata tlawakgolh uma taskujut chu xʼakxilhkgo amakgapitsi. Asta Dios limapakuwilh Noé «xlichuwina [...] wantuku xaʼakgstitum», chuna la Enoc kamakatsinilh latamanin pi xtalakatsuwinita kilhtamaku akxni xʼama kamasputukan tiku nitlan xlikatsikgo (2 Pedro 2:5). ¿La kgalhtinankgolh  latamanin? Jesús, tiku akxilhli tuku xlama akxni xwilacha kʼakgapun, wa: «Wampi akxni ni pala tsinu xliʼakatsiwilakgo, tawilachi tlanka sen, lalh munkaklat, chu putum muxtukolh» (Mateo 24:39).

Kalakpuwanti, ¿tuku makgkatsikgolh Noé chu xfamilia akxni Jehová malakchuwalh arca? Akxni xtitaxtuma tipuxum kilhtamaku chu chuntiya xlawi tlanka sen, max lakkaxlakgolh: la kuenta xlatlawakgolh, la xkuenta tlawakgolh xasasti xchikkan chu nachuna xkuentajtlawakgolh animales... Max akxni xtitaxtunita akglhuwa kilhtamaku, arca tsukulh talakchiki. ¡Tsukulh tatsuwi! Xlakata lhuwa ksenama tlawalh pi arca xtatsuwilh chu «xlawaka kxokgspun katiyatni» (Génesis 7:17). ¡Lu limasiyalh pi wa tiku lhuwa kgalhi litliwakga!

Noé lu max paxtikatsinilh Jehová, ni kajwatiya xlakata lakgmaxtuka chu kalakgmaxtuka xfamilia, wata wa xlakata kamaklakaskilh nakamakatsinikgo latamanin tiku ni tanukgolh kʼarca. Max lu tuwa xmakgkatsikgo taskujut, akxni xtlawamakgolhku arca. ¡Latamanin lu ni xkgaxmatputunkgo! Kalakpuwaw tsinu: max Noé xkgalhikgo xnatalan laktsuman, kamanan chu xnapuxnimatna, pero niti kgaxmatnilh kaj watiya tiku xtawilakgolh kxchik (Génesis 5:30). Akxni xtanumakgolha kʼarca, max tlan xmakgkatsikgo xkgalhtsayankan, xlakata kamakatsinikgolh putum latamanin xlakata xlakgtaxtukgolh.

Jehová ni talakgpalinit (Malaquías 3:6). Jesucristo wa pi kkinkilhtamakujkan nachuna xʼama wan «xtachuna akxni xkilhtamaku Noé» (Mateo 24:37). Lamaw kxaʼawatiya kakilhtamaku, lu katuwa, nema nakgalhsputa akxni namasputukan uma niku kxakalixkajni kakilhtamaku. La uku, xkachikin Dios kamakatsinima putum tiku kgaxmatputunkgo. ¿Nakgaxpata wix tamakatsinin nema lakgmaxtunan? Komo makgamakglhtinanitata xaxlikana xtamakatsinin nema lakgmaxtunan, ¿na nakalitachuwinana amakgapitsin? Noé chu xfamilia kinkawilinikgon liʼakxilhtit.

Akxni arca xlawaka kxokgspun ama lanka chuchut, max tiku xtanumakgolh kgaxmatkgolh la xlaksanan arca. ¿Xlilakgaputsa Noé la xlilanka takgayawana o komo xtayanilh arca? Ni. Tiku  ni kanajlanikgo Dios la uku, wankgo pi ni xlikana xtayanilh, pero Noé nikxni chuna lakpuwa. Biblia wan: «Wa xpalakata xtakanajla, Noé [...] tilikaxtlawalh mpakglhat» (Hebreos 11:7). ¿Tuku kanajlalh? Xlakata tuku xtalakkaxlanit Jehová. Dios xwaninit pi xʼama kuentajtlawa Noé chu xfamilia akxni xʼama min munkaklat (Génesis 6:18, 19). ¿Nila xtlawalh tiku tlawalh putum tuku anan kʼakgapun, Katiyatni chu putum tuku anan, xlakata nitu xlanilh arca? ¡Xlikana pi tlan xkuentajtlawalh! Noé liwana lipawa Jehová xlakata xkatsi pi xlikana xʼama makgantaxti xtachuwin chu chuna lalh: Noé chu xfamilia «nkaj tsinu ntipulakgtaxtukgolh kchuchut» (1 Pedro 3:20).

Akxni titaxtulh tipuxum kilhtamaku chu tipuxum katsisni, nialh senalh. Chuna la wan kinkalendariojkan, nialh milh sen papaʼ xla diciembre kata 2370 akxni nina aʼxmin Jesús. Pero lhuwaku kilhtamaku xtsankga xlakata xtaxtukgolh kʼarca. Ama arca nema lhuwa latamat xlin xakstu xlawaka kxokgspun lanka pupunu, kxokgspun xtitaxtuma niku xwilakgolh lu laklanka sipi (Génesis 7:19, 20). Kalakpuwanti la Noé katalakkaxtlawama laktuwa taskujut xkamanan, Sem, Cam chu Jafet, xlakata nakamawikgo animales, nakaxakanikgo chu naʼakxilhkgo ni natatatlakgo. Dios, tiku tlawalh pi umakgolh animales xalakluku nitu xlatlawanikgolh xlakata xtanukgolh kʼarca, asta xtitaxtukgolh munkaklat. a

Noé tsokgwililh putum kilhtamaku akxni tsukulh munkaklat chu akxni kgalhsputli. Nachuna lichuwinan pi katiyatni xlitatsamanit chuchut 150 kilhtamaku. Alistalh chuchut tsukulh skaka. Chalh uma kilhtamaku nema lu talakapastaka papaʼ xla abril kata 2369, arca tawi kkatiyatni «kxokgspun sipi Ararat», la uku anta wi kTurquía. Kjunio, alistalh titaxtulh 73 kilhtamaku, tsukukgolh tasiyakgo xakgspun laklanka sipi. Akxni xtitaxtunita akgtutu papaʼ, xla septiembre, Noé tsukulh maktini xakgstin arca. Max lu tlan limakgkatsikgolh akxni akxilhkgolh kxkgakganat chichini chu tsukukgolh lijaxanankgo xaskgawiwi un. Noé, pulana tsukulh akxilha komo tlana xlatamakan kkatiyatni: malakgachalh pulana cuervo, xkgosa tsinu chu xtaspitpara xlakata ni xtekgsa niku natamakgxtakga; alistalh malakgachalh tantum paloma; xapulana taspitli, alistalh tekgsli niku natawila kkatiyatni (Génesis 7:24–8:13).

Pero tuku tlakg xlakaskinka xakxilha Noé wa xtakanajlakan. Tlan nalakpuwanaw pi xfamilia lu xtamakxtumikgo xlakata natlawakgo oración, nachuna nalichuwinankgo xtlatkan xalakʼakgapun, tiku lu xkakuentajtlawa. Noé lu xlakaskinka xakxilha Jehová akxni wi tuku xtlawa kxlatamat. Asta akxni akxilhli pi katiyatni xkaskaknita akxni xtitaxtunita akgtum kata la xtanumakgolh kʼarca, ni lakapala malakkilh malakcha o xpuwilhta arca chu ni lakapala taxtukgolh (Génesis 8:14). Nichuna tlawalh, wata kgalhkgalhilh tuku xʼama kawani Jehová.

Tiku pulalinkgo la uku familias lhuwa tuku kamasiyanikgo Noé tiku nikxni makgxtakgli Dios. Xla liwana xlakkaxwili tuku natlawa, skulujwa xwanit chu xkgalhkgalhinan, chu kuentaj xtlawa tuku xmaklakaskinkgo xfamilia. Pero pulana xwili xtalakaskin Jehová. Komo nachuna nakgalhiyaw la xtakanajla, kifamiliajkan lu nalitamakgtayakgo.

Alistalh Jehová wanilh: «Kataxtu kʼarca, wix chu mimpuskat chu minkamanan chu xlakpuskatin minkamanan». Kgalhakgaxmatnankgolh chu taxtukgolh, alistalh taxtukgolh animales. Pero ni nalakpuwanaw pi lakapala taxtukgolh. Biblia lichuwinan xlakata animales: «Chuna la xfamiliajkan taxtukgolh kʼarca» (Génesis 8:15-19). Akxni antiya xlamakgolh kkilhtin chu xlijaxanamakgolh skgawiwi un, nema xmin niku xwilakgolh sipi chu xtiyat Ararat, Noé chu xfamilia xakxilhmakgolh stlan tiyat: niku nialhtu xʼanankgo nefilim, chu nialhtu xʼanankgo tiku xlatlawanikgo tuku nitlan, nialhtu xʼanankgo ángeles tiku ni kgalhakgaxmatnankgolh, nialhti xʼanankgo tiku nitlan xlikatsikgo. b Latamanin tlan xtsukuparakgolh la komo xapulana.

 Noé xkatsi tuku xlitlawat xwanit. Pulana kakninanilh Jehová: tlawalh akgtum pumakamastan chu maklakaskilh makgapitsi animales nema xaskulunku xkaʼakxilha Dios nema tantujunan xtamaknunit kʼarca xlakata xmastalh xtamakamastan xalhkun (Génesis 7:2; 8:20). ¿La makgkatsilh Dios?

Biblia likgalhtinan lakswan tachuwin: «Jehová tsukulh kankgawanan la tuku xamuksun chu skaya xlimakgkatsi». Chuna, takatsanajwa nema lu nitlan xlimakgkatsi lhuwa kilhtamaku akxni latamanin limatsamakgolh katiyatni tiku lixkajni xlikatsikgo, uma lakgpalilh akxni akxilhli akgtum familia tiku ni makgxtakgkgolh chu liwana xlakapastakkgonit natlawakgo xtalakaskin Dios unu kKatiyatni. Pero Dios xkatsi pi makglakgalhinanin xwankgonit, xlakata chuna la wan uma texto, katsi pi «tuku lakpuwan xnaku chatum chixku nitlan lata aktsujku» (Génesis 8:21). Kaʼakxilhwi la ni lakapala kasitsinilh latamanin chu kalakgalhamalh.

Dios xwanit pi nialh tlan xʼama makgalanan Katiyatni akxni Adán chu Eva nialh kgalhakgaxmatnankgolh, uma xtlawa pi nila xchanananka. Pero ama kilhtamaku ksputnita, xtlat Noé, Lamec xwanit pi xkgawasa xʼama limini tajaxni latamanin. Xtukuwani nema xkgalhi Noé max xwamputun: «skaya xlimakgkatsi» o «makgoxomixi». Noé max lu paxuwalh akxni katsilh pi xʼama akxilha la xʼama kgantaxtu tuku tiwanka chu tlakg ni tuwa xʼamaka chananankan kkatiyatni. ¡Wa xlakata tunkun tsukulh chananan! (Génesis 3:17, 18; 5:28, 29; 9:20.)

Jehová kamaxkilh xkamanan Noé ni laktuwa limapakgsin chu liwana xwan la xlinkgolh xlatamatkan, limapakgsin nema xkamaxkinit xwan pi ni xlimakgninatkan xwanit chu ni lixkajni xlimaklakaskinkgolh kgalhni. Nachuna katatlawalh akgtum talakkaxlan latamanin: kawanilh pi nialh xʼama limasputu munkaklat tuku staknan kKatiyatni. Chu tuku kinkalimalakapastakayan kinkamaxkin akgtum lu stlan chamakxkulit. Asta la uku akxni akxilhaw chamakxkulit kʼakgapun, lu tlan limakgkatsiya chu lakapastakaw tuku wa Jehová (Génesis 9:1-17).

Komo kaj akgtum cuento xwa, ni xʼanalh chamakxkulit. Pero Noé xlikana latamalh, chu lu tuwa xwanit xlatamat. Ama kilhtamaku tlakg akglhuwa kata xlatamakgo latamanin ni xawa la uku, chu Noé akglhuwa kata latamalh: akgtutu ciento tipuxamakaw kata latamalh akxni xtitaxtunita Munkaklat..., pero lhuwa taʼakglhuwit xʼanan akxni xlama. Akgtum liʼakxilhtit, makgtum tlawalh tuku nitlan, kgachilh. Xtanat, Canaán, tlawanilh tuku nitlan xtata, uma nitlan tuku kaliminilh xkamanan. Noé latamalh chu akxilhli tuku nitlan xtlawakgo latamanin kxkilhtamaku Nemrod, chu akxilhli la lhuwa xnatanatni xtlawakgo talakgalhin, la kakninanikan imágenes. Pero na analh tuku tlan. La Sem, lu tlan liʼakxilhtit kawilinilh xfamilia, xlakata lu xlipawan Jehová (Génesis 9:21-28; 10:8-11; 11:1-11).

Chuna la Noé, akinin nachuna talakaskin nakgalhiyaw takanajla. Maski anankgo latamanin tiku ni kgalhakgaxmatkgo Dios o asta makgxtakgkgo, akinin nikxni namakgxtakgaw. Jehová lu lhuwa xtapalh akxilha xlakata ni makgxtakgaw chu chuntiya skujnaniyaw. Chuna la wa Jesús: «Wampi wa nti ntliwakglh natawilay kxtakanajlani asta kxlikgatsputni, wa yuma naʼakgaputaxtuy» (Mateo 24:13).