KATALAKATSUWINI DIOS
Dios paxki tiku xatapaxuwan masta
¿Tuku tamaskiwin lu paxtikatsiniya? ¿Nema xatapaxuwan maxkikana, o nema maxkikana kaj xlakata xlakgchan namaxkiyan achatum? Katsiyata xatakgalhtin. Akxni wi tiku nakinkamaxkiyan akgtum tamaskiwin, xlakaskinka xatapaxuwan natlawa, ¿ni xlikana? Komo akinin chuna lakaskinaw, Jehová tlakg chuna lakaskin. Kaʼakxilhti tuku tsokgli apóstol Pablo 2 Corintios 9:7.
¿Tuku xlakata tsokgli Pablo uma tachuwin? Xlakata xkamakgpuwantiniputun kstalaninanin Cristo xalak Corinto, xlakata xkamaxkikgolh tamakgtay xnatalan xalak Judea, tiku lu xlakaskinkgo tamakgtay. ¿Xkamafuerzajnima xalak Corintio? Ni. Kawanilh: «Wa lantla nchatunu mpuwa namastay kxnaku, chuna nkamastalh; ni kaj chalipuwana namastay, chu na ni kaj fuerzaj; xampi wa Dios, paxkiy wa nti xlipaks xtapaxuwan limastay». Tlakg liwana kalichuwinaw uma tastakyaw.
«Lantla nchatunu mpuwa namastay kxnaku.» Pablo wa pi tiku xaxlikana kstalanina Cristo masta xlakata chuna lakpuwanit kxnaku. Nachuna lakpuwan tuku lakaskinkgo xnatalan. Chatum tiku lakputsanani Biblia wan pi tachuwin xagriego «mpuwa» wamputun «lakpuwanit tuku natlawa chu liwana lakkaxwilinit». Uma wamputun pi chatum kstalanina Cristo lakpuwan xlakata tuku maklakaskinkgo xnatalan chu putsa la liwana nakamakgtaya (1 Juan 3:17).
«Ni kaj chalipuwana namastay, chu na ni kaj fuerzaj.» Pablo lichuwinan pulaktiy tayat nema ni xlikgalhitkan kstalaninanin Cristo: kaj xasitsin natlawakan chu kaj xafuerzaj natlawakan. Tachuwin xagriego nema unu tamatitaxti «chalipuwana» wamputun «nitlan limakgkatsikan (o xasitsi mastakan)». Maktum libro wan pi akxni wi tiku kgawa akxni wi tuku masta «lipuwan, o lilakgaputsa xlakata namasta xtumin». Lataman tiku mafuerzajnikan xlakata namasta, nitlan limakgkatsi. ¿Tiku makglhtiputun tamaskiwin tiku kgalhi la uma tapuwan?
«Dios, paxkiy wa nti xlipaks xtapaxuwan limastay.» O chuna la wan La Biblia de Nuestro Pueblo: «Dios paxki tiku xatapaxuwan masta». Kstalanina Cristo chuna xlikgalhit tapuwan akxni nakamakgtaya amakgapitsin. Tiku xliputum xnaku masta xatapaxuwan tawila (Hechos 20:35). Tiku chuna tlawa liwana tasiya xtapaxuwan. Tachuwin tapaxuwan tlan limaklakaskinkan xlakata la makgkatsi chatum lataman chu la tasiya. Tiku xatapaxuwan masta tamaskiwin lu tlan mamakgkatsini tiku maxki chu nachuna makgkatsi Dios.
«Dios, paxkiy wa nti xlipaks xtapaxuwan limastay»
Xtachuwin Dios nema tsokgli apóstol Pablo limasiyalh pi chuna xlitlawat chatum kstalanina Cristo akxni wi tuku namasta. Maski kinkilhtamakujkan, kilitliwakgakan o tuku kgalhiyaw, xatapaxuwan chuna katlawaw, uma tlawa pi napaxuwayaw akxni kamakgtayayaw amakgapitsin, tlakg chuna makgkatsiyaw akxni kamakgtayayaw tiku lakaskinkgo tamakgtay. Komo chuna natlawayaw nakinkamakgapaxuwayan chu namakgapaxuwayaw Dios, Xla paxki tiku xatapaxuwan masta.
Textos xalak Biblia nema tlan nalikgalhtawakgaya uma papaʼ:
