¿Minit kilhtamaku tasanita xlakata lhuwa takatsanajwa makgkatsinita?... * Kimputumkan minit kilhtamaku chuna makgkatsinitaw. Pero lakgachunin ni wa katsan kimakxpankan o kinchaxpankan. Akgtum liʼakxilhtit, wi tiku nawan taʼakgsanin kimpalakatakan, chu uma lu nitlan nalimakgkatsiyaw, ¿ni xlikana?... Akxni wankan takgsanin xlakata Dios na nitlan limakgkatsi. Kalichuwinaw xlakata uma chu la natlawayaw xlakata namakgapaxuwayaw.

Biblia lichuwinan makgapitsi latamanin tiku xwankgo pi lu xpaxkikgo Dios pero nitlan xmamakgkatsinikgo, o xmakgalipuwankgo. Kalakpuwanti, xtlawakgo pi nitlan xmakgkatsilh Dios. ¿La xtlawakgo? Kaʼakxilhwi tuku xlakata nitlan limakgkatsi Dios akxni ni kgalhakgaxmataw.

Xapulana chatiy tiku katlawalh Jehová kKatiyatni nitlan mamakgkatsinikgolh, lu makgalipuwankgolh. Xla xkawilinit kʼakgtum paraíso xwanikan «jardín xaʼEdén». ¿Katsiya xtukuwanikan?... Adán chu Eva. Kaʼakxilhwi tuku tlawakgolh.

Akxni Jehová kamaxkilh Adán chu Eva jardín xaʼEdén, kawanilh pi kuenta xtlawakgolh. Na kawanikgolh pi tlan anta xkgalhikgolh xkamanankan. Pero, akxni nina xkgalhikgo xkamanankan wi tuku lu nitlan lalh. ¿Katsiya tuku lalh?... Chatum ángel tlawalh pi Eva ni xkgalhakgaxmatkgolh Dios. Alistalh Adán na ni kgalhakgaxmatli Dios. Kaʼakxilhwi tuku kitaxtulh.

Ama ángel tachuwinalh Eva, pero malakpuwanilh pi wa luwa tiku xtachuwinama. Eva lakgatilh  tuku xkgaxmatma: pi «xtachuna Dios xwa». Alistalh, luwa wanilh tuku xtlawalh, chu Eva chuna tlawalh. ¿Katsiya tuku tlawalh?...

Walh xtawakat kiwi nema Jehová xkawaninit pi ni xwakgolh. Akxni nina xtlawakan Eva, Dios xwaninit Adán: «Tlan nawaya xtawakat putum kiwi nema wilakgolh kJardín asta nakgalhkgasa. Pero kiwi nema lilakgapaskan tuku xatlan chu nixatlan, ni nawaya, xlakata kilhtamaku akxni nawaya xlikana pi naniya».

Eva xkatsi uma limapakgsin, pero tsukulh akxilha kiwi chu «akxilhli pi [xtawakat] kiwi lu tlan xwanit xlakata nawakan, chu liwaputu xtasiya [...]. Tsukulh tiya xtawakat chu tsukulh way». Alistalh maxkilh Adán «chu xla na tsukulh wa». ¿Katsiya tuku xlakata walh?... Xlakata tlakg xpaxki Eva chu ni lu xpaxki Jehová, wa xlakata walh xtawakat kiwi. Pero tlakg xlakaskinka kgalhakgaxmatkan Dios, ¿ni xlikana?

¿Lakapastaka luwa nema tachuwinalh Eva? Xtasiya pi wa luwa xchiwinama pero ni wa xchiwimama. Kaj la akgtum muñeco litaxtulh nema machuwini chatum chixku. ¿Tiku machuwinilh luwa?... Wa «xamakgan luwa wanti wanikan Akgskgawini, xa wa Satanás».

¿Katsiya la namakgapaxuwaya Dios?... Naliskuja xlakata putum kilhtamaku nakgalhakgaxmata. Satanás wan, pi mat tlan kamatlawi putum latamanin xtalakaskin chu ni nakgalhakgaxmatkgo Dios. Wa xlakata, Jehová kinkamaxkiyan uma tastakyaw: «Xaskgalala kawanti, kinkgawasa [o kintsumat], chu kamakgapaxuwa kinaku, xlakata tlan naktalakgalhti tiku lixkajni kiwanima». Satanas «lixkajni [...]wanima» Jehová, wamputun pi Satanás likgalhkgamanan Jehová. Wan pi mat tlan natlawa pi putum latamanin ni naskujnanikgo Dios. Komo nakgalhakgaxmata Jehová chu naskujnaniya namakgapaxuwaya. ¿Naliskuja xlakata chuna natlawaya?...