LICHUWINAN TUKU WI KXMAKNI REVISTA: ¿TUKU XLAKATA ANAN LHUWA TAPATIN? ¿TUKU KILHTAMAKU NASPUTA?
¡Lhuwa latamanin nikgonit tiku nitu xlaklinkgo!
Noelle aktsu tsumat tiku lu tlan xlikatsi chu lu xlakgati tlawa dibujo. Akgtum kakgotanun xla verano taxtulh kxkilhtin xchik, akgchakgxli chu tajulh niku xwi alberca. Muxtulh, akgtiy semana xtsankga xlakata xmakgatsilh akgtati kata.
Charlotte, Daniel, Olivia, Josephine... Wa uma xtukuwanikan laktsu kamanan kgalhapuxam xwankgonit tiku xkgalhikgo akgchaxan chu akgtujun kata kʼescuela Connecticut (Estados Unidos). Ama kilhtamaku, 14 xla diciembre kata 2012 puxamachaxan latamanin nikgolh. Akxni nina xkamaknukan, o xkamujukan, mapakgsina Barack Obama likgalhtawakgalh xtukuwanikan chu kawanilh tiku xkgaxmatmakgolh wanti nitlan xlimakgkatsikgo: «Uma tuku nitlan lama nialh lakaskinaw chuna nala».
Bano, chatum tsuma xalak Irak tiku xkgalhi akgkutsayan kata, ankgolh latamakgo kNoruega kata 1996 xla chu xfamilia. Xʼamigos na xlilakgapaskgo: Chichini. Pero 22 xla julio kata 2011 na anta nilh akxni chatum chixku kamakgnilh 77 latamanin, chu uma chixku xlilitsima akxni wa: «Kakilatapatiw [...] xlakata nila chalhuwa latamanin kkamakgnilh».
Putum kKatiyatni kgaxmataw xlakata nitlan tuku kitaxtunit la uma tuku lichuwinawa. Kalilakpuwanti tuku makgkatsikan akxni nitlan tuku kinkakitaxtuniyan, lamakgkgalhanankan, kʼguerras, lamakgnikan, akxni min tuku malakgsputunan o atanu tuku nitlan tuku kitaxtu. ¡Lhuwa latamanin nikgo maski ni xlinkgo kuenta! ¡Lhuwa tapatin! Chu ni xlinkgo kuenta.
Makgapitsi wankgo pi Dios lin kuenta chu lakpuwankgo pi ni kalakgkatsan latamanin. Atanu, wankgo pi akxilha kintapatinkan pero nitu tlawaputun kimpalakatakan. Makgapitsi wankgo pi uma tuku nitlan anan xwankanita pi chuna xʼama la. Lhuwa tuku wankan xlakata uma. ¿Niku natekgsaw takgalhtin nema tlan nalimakgkatsiyaw? Kʼuma artículos naʼakxilhaw xTachuwin Dios, Biblia, xlakata nakatsiyaw niku kilhtsukulh tapatin chu la nalakkaxtlawakan.
