Akxni xakkgalhi akgtutu kata, kintlat, kinkuku, chu kintata kalinkgoka kpulachin niku lu lhuwa xkamaskujukan, xlakata xtakanajlakan. Kintata chu kinkuku nikgolh, kintlat taspitli kata 1947, akxni sputli xliʼAkgtiy Lanka Guerra Xlikalanka Kakilhtamaku, chu nitlan lanilh kstipulukut. Maski nitlan la kitaspitli, pero nikxni makgxtakgli xtakanajla.

Akxni xakkgalhi akgnajatsa kata, lhuwa ciento xtatayananin Jehová moldavos chu kifamilia kalinka kSiberia. Akgchaxan xla julio kata 1949 kinkalinkan kvagones niku xkalinkan wakax, chu akgkutiy kilhtamaku xaktanumaw, nipara tsinu jaxli tren, 6,400 kilómetros asta chalh kkachikin wanikan Lebyazhe. Anta niku chalh tren xkinkakgalhkgalhimakgon mapakgsinanin. Kinkamapapitsikan chu tanu tanu niku kinkamalakgachakan. Akinin kinkalakgchan naktawilayaw kʼakgtum escuela nema nialh xmaklakaskinkan. Lu xaktlakgwanitaw chu lu xaklipuwamaw. Chatum tala puskat tiku xlina kata tsukulh likilhtli akgtum takilhtlin nema xtlawakgonit natalan akxni xlama xliʼAkgtiy Lanka Guerra Xlikalanka Kakilhtamaku. Chu alistalh kimputumkan xatapaxuwan ktsukuw kilhtliyaw:

«¡Lhuwa natalan makgat kalinka!

Knorte chu kʼeste kalinka.

Xlakata xtlawakgo xtaskujut Dios katlawanika tuku nitlan chu lhuwa tuku tuwa titaxtukgolh nema kalipekua wililh xlatamatkan.»

Titaxtulh kilhtamaku chu tlan ktsukuw anaw tamakxtumiyaw domingo nema xtatlawa 13 kilometros niku xakwilaw. Tsisa xaktaxtuyaw ama kilhtamaku akxni lu xlonkgnan chu kkintampulakgnikan xchan miki akxni xakkanaw ktamakxtumit, xchan 40 grados bajo cero. Akxni xakchanaw, xaklalakxkitiyaw xlakata tipuxamakaw o liwaka xaktanuyaw, chu xakkilhtliyaw akgtum o akgtutu takilhtlin, alistalh xtlawakan akgtum oración nema xchan kkinakujkan chu akgtum hora o liwaka xaklikgalhtawakgayaw Biblia. Alistalh xakkilhtliparayaw chu chuntiya xaklikgalhtawakgayaw Biblia. ¡Lu lhuwa tatliwakglhli ama kilhtamaku kintakanajlakan!

Kata 1960, xtatayananin Jehová tiku xkinkatamakxtukanit kkinkachikinkan tlakg tlan xaktlawayaw tuku xaklakaskinaw, chu maski ni xakkgalhi tumin, tlan kkalh kMoldavia. Anta klakgapasli Nina, xnatlatni, xtata chu xnana na xtatayananin Jehová xwankgonit. Ni lhuwa kilhtamaku titaxtulh ktamakgaxtokgwi chu  kaw kSiberia, kata 1964 lakachilh Dina chu Viktor kata 1966. Akgtiy kata titaxtulh kkaw kʼUcrania. Xakwilaw kʼakgtum aktsu chiki kkachikin nema wanikan Dzhankoy, max 160 kilómetros xlimakgat niku xwi Yalta, kxpenínsula Crimea.

Anta kCrimea na ni xkinkamaxkikanan talakaskin naklichuwinanaw Dios chuna la amakgapitsin kʼUnión Soviética. Pero xmastakan tsinu talakaskin chu ni xkinkaliputsastalanikanan wa xlakata makgapitsin xtatayananin Jehová taxtlajwanilh xtakanajlakan. Xlakpuwankgo pi komo lu lhuwa xpatinankgonit kSiberia, ni talakgalhin xwanit lhuwa kskujkgolh xlakata xkgalhikgolh tuku xmaklakaskinkgolh.

Marzo 27 xla kata 1991 Unión Soviética nema la uku nialhtu wi, kinkamaxkin talakaskin xlakata naklichuwinanaw Dios. Tunkun tsukuka lakkaxwilikan xlakata natatlawa akgtujun laklanka tamakxtumit xaʼakgtiy kilhtamaku lakgatum kpaís. Akinin kinkalakgchan nakkanaw kachikin Odesa (Ucrania), xʼama tsuku 24 xla agosto. Akit kkalh akxni xtsankga akgtum papaʼ natsuku tamakxtumit, xlakata nakkakaxtlawayaw kʼestadio niku xkgamanankan fútbol.

Tantaku kskujwi, chu katsisni lakgachunin xaklhtatayaw niku xwilakgolh laktawilh. Lakpuskatin kapalhnankgolh kparque nema xlimakgstili estadio. Kmaxtuw basura max 70 toneladas. Tiku xputsakgo niku natamakgxtakgkgo natalan, putsakgolh kputum kachikin xlakata nakamakgamakglhtinankan 15,000 natalan tiku xʼama minkgo. Pero, kinkawanikan nitlan tamakatsinin.

Papaʼ 19 xla agosto akxni kaj akgkitsis kilhtamaku xtsankga kintamakxtumitkan, mapakgsina xla Unión Soviética, Mijaíl Gorbachov, chipaka akxni xpaxialhnama lakatsu kʼYalta, chu lakgachinuka kchiki, chu nialh kinkamaxkikan talakaskin naktlawayaw kintamakxtumitkan. Tiku xʼama minkgo xala alakatanu kachikinin xkgalhskininamakgolh kteléfono tuku xʼama tlawakgo, xlakata xtamawakgonita xboletoskan xla autobús chu tren. Akxni lhuwa oración xtatlawanita natalan kawanikgolh «¡katantit!».

Chuntiya xlakkaxwilimaka chu chuntiya xtlawamaka oración. Putum tiku xkalakgayawakanit naputsakgo niku natamakgxtakgo natalan, xʼankgo katiyakgo putum tiku xchintilhamakgolh xalak lakgatuminika Unión Soviética chu xkalinkgo niku natamakgxtakgkgo. Chali chali, natalan tiku xpulalimakgolh tamakxtumit xkalakgankgo mapakgsinanin chu ni xkamaxkikan talakaskin.

Viernes 23 xla agosto akxni xtsankga akgtum kilhtamaku tiku xpulalimakgolh uma lanka tamakxtumit lu tlan tamakatsin liminkgolh, ¡kinkamaxkikan talakaskin! naktlawayaw tamakxtumit. Lichali, akxni tsukulh tamakxtumit chu xakkilhtlimaw lu xakpaxuwamaw. Akxni kgalhsputli tamakxtumit, ktamakgxtakgwi asta katsisni, xlakata xakkatachuwinamaw kiʼamigoskan tiku makgasa xakkalakgapasaw. Xakkatawilaw natalan tiku nikxni makgxtakgkgolh xtakanajlakan maski lhuwa tuku nitlan xtitaxtukgonit.

Titaxtunita liwaka puxamatiy kata akxni titatlawalh ama tamakxtumit, xtatayananin Jehová kakxilhnitaw la ktalhuwinitaw: tatlawanit Pukgalhtawakga xla xTatayananin Jehová klakalhuwa kʼUcrania chu tiku lichuwinankgo Dios talhuwinit, kata 1991 xwi 25,000 pero la uku 150,000.

Kifamilia chuntiya wilakgolh kʼaktsu chiki nema wi kachikin nema wanikan Dzhankoy, la uku wilakgolh 40,000 latamanin. Akxni ktaspitwi kDzhankoy kata 1968 xlakata kSiberia xaklamaw, ni lhuwa familias xtatayananin Jehová xwankgonit, pero la uku wi akgchaxan congregaciones.

Kifamilia na staknit. La uku kinkamanan, kinatanatna, chu kixuyatanatna o lhtanatna, kimputumkan kskujnanimaw Jehová.