«Kxkilhtamaku tama mapakgsinanin wa Dios xala kʼakgapun nawiliy akgtum tamapakgsin nema nikxni katisputli. Chu tama tamapakgsin ni katimatitaxtinika atanu kachikin. Nakalakxpulay chu nakamasputuy putum tamapakgsin chu tama tamapakgsin xliputum kilhtamaku natawilay.» (Daniel 2:44.)

Xtamapakgsin Dios xala kʼakgapun, tiku namapakgsinan wa Jesucristo. Mapakgsinanin xalak kakilhtamaku nialh katimapakgsinankgolh, wa Jesús namapakgsinan chu natlawa pi nakgantaxtu xtalakaskin Dios unu kKatiyatni chuna la kʼakgapun (Mateo 6:9, 10). Nialh chatum lataman namapakgsinampara, xlakata «xaliʼankgalhin namapakgsinan nKimpuchinakan, na kiMakgaputaxtinakan Jesucristo». Uma wamputun pi naʼanan takaksni (2 Pedro 1:11).

«Sampi watiya Satanás ntapalaja, xʼangel xkgakganat litaxtuy. Chuna mpi ni luwa tuwa yuma lapi nachuna ntapalajkgoy kskujnin, xtachuna xtaskujnin talulokgtat wamputunkgoy. Wa cha ntu xalan nalitakgastakyawakgoy wa lantla mininiy xtatlawkan.» (2 Corintios 11:14, 15.)

Ni xaxlikana takanajla nakalilakgapaskan pi xtatlaw Akgskgawini. Chu putum nakamasputukan, tiku katlawanikgo tuku nitlan xlakata xtakanajlakan chu tiku makgninankgo. Tiku paxkikgo «Dios xastakna [chu xaxlikana]» tlan nalikakninanikgo “xtakanajlakan” xliputum «espíritu chu xaxlikana». ¡Natawila takaksni chu akxtum natawilakgo! (1 Tesalonicenses 1:9; Efesios 4:5; Juan 4:23.)

«Na wa natatawilakgo, na paks naxakanikgo Dios xlakgpixtajatkan; na nialh katiʼanalh linin; chu na nialh katiʼanalh ntalipuwan, ni mpala wa ntatasa, chu na ni mpala wa ntakatsanajwat; xampi wa xlipaks nkatuwaj, wa ntu xʼanan xakgasiyaj, paks lakgsputli.» (Apocalipsis o [Revelación] 21:3, 4.)

 Jehová namakgantaxti uma xlakata xKgawasa mastalh xlatamat kimpalakatakan (Juan 3:16). Kxtamapakgsin Jesús putum latamanin nialh katikgalhikgolh talakgalhin. Nialh naʼanan tapatin, xlakata Dios «na wa natatawilakgo» chu naxapa putum «xlakgpixtajatkan». Nialh makgas talakgalhin chu tapatin nialh katilakapastakka. «Xalaktankswa, ixlakan nawan ama lipaxaw pulataman [...] kanikxniwa natalatama ana.» (Salmo 37:29.)

«Pus chi [Jesús] tichipalh ntlanka luwa ntu nkgalhiy xpakgan, wa yama xamakgan luwa, wa cha Akgskgawini, chu wa wanikan Satanás, na akgtum milh kata nchilh [...]. Anta nchu ntitamakgajulh mpulhman [...], na luwa tlan tilakgachinulh, lakimpi nialh naʼakgskgawikgo ntachixkuwitat.» (Apocalipsis [Revelación] 20:2, 3.)

Demonios nialhla katikamatlawikgolh latamanin tuku nitlan, nakachiwilikan chu nakawilikgokan niku «mpulhman», niku nila katitlawakgolh tuku nitlan. Nialhla katikamatlawikgolh latamanin tuku nitlan. ¡Lu tlan nawan Katiyatni xlakata Satanás chu xdemonios nialh katikamatlawikgolh latamanin tuku nitlan!

«Xaʼawatiya kilhtamaku» nasputa akxni namin «ntlanka takatsanajwat», nema tilichuwinalh Jesús. Xla wa: «Ntlanka takatsanajwat, wa ntu ni ukxni analh xtachuna asta akxni kxkilhtsukut katuxawat asta chu, asta ni ukxni katianalh» (Mateo 24:21).

Takatsanajwat lu lanka nawan xlakata nala nema nikxni chuna lanit, uma natlawa pi namin «ntlanka kilhtamaku xliminat Dios nti mpaks kgalhiy xlitliwakga», lilakgapaskan «Armagedón» (Apocalipsis [Revelación] 16:14, 16).

Xpaxkinanin tuku xaʼakgstitum lu xatapaxuwan kgalhkgalhimakgolh xlisputni uma lixkajni kakilhtamaku. Kaʼakxilhwi makgapitsin tasikulunalin nema kakgalhkgalhimakgolh akxni namin xTamapakgsin Dios.

«Lhuwa ntachixkuwitat» nalatamakgo kxasasti kakilhtamaku niku naʼanan takaksni: Xtachuwin Dios wan pi «lhuwa ntachixkuwitat» nema nila taputlakga nalakgtaxtukgo «ntlanka takatsanajwat» chu nalatamakgo niku kxasasti kakilhtamaku niku naʼanan tuku xaʼakgstitum (Apocalipsis [Revelación] 7:9, 10, 14; 2 Pedro 3:13). Uma latamanin nawankgo pi wa Jesús tiku kalakgmaxtukgolh, «xKalhnilu Dios, nti namapanuniy xtalakgalhin ntachixkuwitat» (Juan 1:29).

Lhuwa tasikulunalin nalimin xtamasiyat Dios: Kxasasti kakilhtamaku, «katiyatni nalitatsama xtamasiy Jehová» (Isaías 11:9). Uma tamasiy xla Malakatsukina, nawan la natlawayaw xlakata tlan nakatalalinaw amakgapitsin chu la nakuentajtlawayaw Katiyatni. Dios wan: «Akit, Jehová, akit mi Dios, Wantiku masiyaniyan xlakata wix tlan nakitaxtuniyan, Wantiku masiyaniyan tiji niku wix natlawana» (Isaías 48:17).

Kifamiliajkan nalatamaparakgo: Akxni xlama kKatiyatni Jesús, malakastakwanilh Lázaro (Juan 11:1, 5, 38-44). Tuku tlawalh limasiyalh tuku natlawa akxni mapakgsina nawan kxTamapakgsin Dios (Juan 5:28, 29).

Naʼanan takaksni chu tuku xaʼakgstitum putum kilhtamaku: Akxni mapakgsina nawan Jesucristo nialh katiʼanalh tuku ni xaʼakgstitum. Jesús, katsi tuku wi kxnaku chatum lataman, chu nakatsi tiku tlan likatsi chu tiku nitlan likatsi. Tiku ni namakgxtakgputunkgo nitlan xtayatkan nila katilatamakgolh kxasasti xkakilhtamaku Dios (Salmo 37:9, 10; Isaías 11:3, 4; 65:20; Mateo 9:4).

Kaj makgapitsi akxilhwi kʼuma artículo, nema lichuwinanit Biblia pi natlawa Dios kkakilhtamaku nema talakatsuwima. Akxni xTamapakgsin Dios namapakgsinan kKatiyatni putum kilhtamaku «snun lipaxaw natalatamaj» (Salmo 37:11, 29). Chu putum tuku tlawanit pi napatinankgo latamanin, nakamasputukan. Dios wanit: «Kaukxilhtit, paks kmasastiy xlipaks nkatuwaj. [...] Yuma ntachuwin, kgalhiy xkakni, na xlikanaj». (Apocalipsis [Revelación] 21:5).