«Akxni mapakgsinan tiku lixkajni likatsi, kachikin patinan.» (Proverbios 29:2.)

Lhuwa mapakgsinanin tiku titaxtukgonit nitlan kalikatsinikgonit latamanin chu lhuwa kamakgapatinankgolh xkachikinkan. Pero, makgapitsi mapakgsinanin tlan likatsikgonit: xlikana kamakgtayaputunkgo xkachikinkan. Maski lhuwa limapakgsin kgalhikgo, akxilhkgo pi nila lakkaxtlawakgo taʼakglhuwit xlakata anan tapitsit kkachikin chu makgapitsin tlakg kgalhiputunkgo limapakgsin. Makgapitsin katlawanikgo tuku nitlan xkachikinkan xlakata kaj xakstukan tlan nakakitaxtunikgo. Henry Kissinger tiku secretario xwanit xalak Estado de Estados Unidos wa: «Putum tuku lanit kaj litasiya pi nitlan kitaxtunit tuku tlawanit chixku chu ni kgantaxtunit tuku xlakpuwanit».

Biblia wan: «Ni lakgchan chatum chixku xakstu napulalin xtatukit» (Jeremías 10:23). Chatum lataman tiku makglakgalhina ni kgalhi liskgalala chu ni katsi pulalin xtatukit, wa xlakata nila katipulalilh akgtum lanka kachikin. ¿Akgatekgsa tuku xlakata wanaw pi tiku pulalinkgo kachikinin la uku nila masputukgo tapatin? Asta lakgachunin wa wilikgo taʼakglhuwit.

«Wa yuma nakalilakgapaskgoyan xlipaks amakgapitsin mpi wixin, nkilimakgalhtawakgat, lapi xlakgalhinitit ntapaxkit.» (Juan 13:35.)

Tiku xpulalinanin takanajla lichuwinankgo tapaxkit chu akxtum nalakan. Pero, nila tlawakgo xlakata kanajlanin nakgalhikgo tapaxkit nema natlawa nialh nalaksakpaxkinankgo. Takanajla ni masiya tapaxkit, wata kaj tlawa xlakata latamanin katuwa nitlan natlawakgo xlakata xtakanajlakan, natapitsikgo latamanin chu kachikinin. Xʼawatiya página xlibro teólogo Hans Küng nema wanikan El cristianismo y las grandes religiones, wan: «Latamanin tlawakgo katuwa tuku nitlan akxni laksakkan chatum mapakgsina, tiku kalimapakgsi pi chuna natlawakgo wa xpulalinanin takanajala».

Nachuna, lhuwa sacerdotes kamaxki talakaskin nakgalhikgo talakgxtumit latamanin maski ni tamakgaxtokgkgonit, chu mastakgo talakaskin nalatatamakgaxtokgkgo lakchixkuwin chu lakpuskatin. Uma tlawanit pi naʼanan lhuwa tajatat, makgankan skgata, kgalhikan skgata nema ni xlakaskinkan, kalakxtlawa familias chu tawila lhuwa takatsanajwat.

«Wampi chatunu litatokglhnit watu watiya xtaxkgonalakankan liʼakgskgawiliyankgo nkalawaj tayat. Wantaxkgonalakan; akxni wintu likilhtsukunit, talakgalhin nkitaxtuniy, chanchu ntalakgalhin, mpi kgantaxtunitta, linin nkitaxtuniy.» (Santiago 1:14, 15.)

Xlakata talakgalhin nema kinkamatitaxtinikgon kinatlatnikan, kimputumkan lakgalhinanaw. Nachuna talachipamaw kimaknikan xlakata ni nakinkamatlawiyan tuku tlawaputun (Efesios 2:3). Lu tuwa tamakgkatsi namakgatlajakan akxni tlawaputunaw tuku nitlan, chu max kgalhiyaw kilhtamaku xlakata natlawayaw tuku nitlan, pero komo namaxkiyaw talakaskin nakinkamatlawiyan tuku lakaskinaw lu nitlan nakitaxtu.

Chatum tiku lakputsanan tiku wanikan P. D. Mehta tsokgli: «Atsinu ni putum kintapatinkan nema kgalhiyaw kinkuentajkan xlakata lhuwa talakgxtumiputunaw, lhuwa putsayaw nema tlan nalimakgkatsiyaw chu lhuwa tuku kgalhiputunaw maski ni maklakaskinaw, lhuwa kgalhiputunaw tumin». Akxni lhuwa tuku lakaskinkan chu talismanin nema nila makgxtakgkan la kuchu, drogas, takgaman, tlawakan talakgxtumit, chu atanu, uma tlawanit pi nitlan nakakitaxtunikgo kxlatamatkan lhuwa latamanin tiku nichuna xwankgonit, uma tlawanit pi lhuwa tapatin nakgalhikgo xfamiliajkan chu xʼamigoskan. Xlakata akinin makglakgalhinanin, xlikana uma tachuwin xalak Biblia nema wan: «Xlipaks ntamalakatsukun [o latamanin], makxtum jalhpanikgoy, chu makxtum tatlakgajkgoy asta chu» (Romanos 8:22).

Biblia wan pi Satanás wa «xmalana katuxawat» chu makgtayamakgolh lakgtliwakgan espíritus tiku lixkajni likatsikgo nema kalilakgapaskan demonios (2 Corintios 4:4; Apocalipsis [Revelación] 12:9).

Chuna la Satanás, demonios kamatlawiputunkgo latamanin tuku lakaskinkgo. Apóstol Pablo wa: «Sampi ni wa ntalatlawayaw mpala xman wa nkinkasokgaliyan nchixku nti nkgalhi xkgalhni, chu xliwa; wampi wanti ni tasiyu malanankgoy, chu nti nkgalhikgoy ntlanka xlitliwakga, chu laktlanka napuxkun xla kapakglhtuta ntu anan yunu nkatuxawat, chu lilhuwa ni lakwan spiritu ntu lamakgo nkaunin» (Efesios 6:12).

Maski demonios lu lakgatikgo kasakgalikgo latamanin, uma ni wa xtaskujutkan. Tuku lu lakaskinkgo wa ni natalakatsuwinikgo Dios xala Talhman, Jehová (Salmo 83:18). Astrología, magia, skuwanankan chu tiku wan tuku aku nala, wa uma makgapitsin tuku limaklakaskinkgo xlakata nakaliakgskgawikgo latamanin chu kamatlawikgo tuku lakaskinkgo. Wa xlakata Jehová kinkawaniyan pi kuenta natlawayaw chu kamaxki tamakgtay tiku ni tlawaputun xtalakaskin nitlan espíritus (Santiago 4:7).

Max akgtiy milh kata, Biblia lichuwinalh:«Akxni sputmaja nawan [...] [kakilhtamaku, NM], luwa skalajwa namin nkilhtamaku».

Chu alistalh wa tuku xlakata: «Na naʼanankoy nchixkuwin nti nkaj nakstupaxkikan, chu wa nti xman wa lakgatikgoy ntumin chu xalakapakxnin chu natlankakatsikoy [...]. Chu ntlanka xtalakapastaknakan chu ni namakgantaxtikgoy ntu nawankgoy, chu nakgalhtampumaxtunankgoy ni namakgaxtakgtayaputunkgo wa ntu ni tlan, ni tsinu kgayaj nakatsankgoy, chu wa nti naxkajnikgoy ntu ntlan. Tsekg xalekgaman natlawanankgoy, chu nkalawa laktlawanin, chu lakapakxnin, na wata wa ntlakg nalakpaxkikgoy wa ntu nkaj nalilakgastanankgoy, ni xawa wa ntu xla Dios». Liwana tasiya pi kxlisputni [«kakilhtamaku», NM] lamaw xlakata anan lhuwa tapatin» (2 Timoteo 3: 1-4).

Chuna la akxilhaw tuku tatsokgnit unu, liwana tasiya pi chixku nila masputu tapatin, maski xlikana kamakgtayaputun amakgapitsin. Wa xlakata, ¿tiku naskiniyaw tamakgtay? Wa kimalakatsukinakan. Xla wanit pi «namalakgsputuy xtatlaw akgskgawini» chu tiku makgtayamakgolh (1 Juan 3:8). Kʼatanu artículo nakinkawaniyan tuku natlawa Dios xlakata namasputu nema tlawa pi kaʼanalh tapatin.