Akxni xtitaxtunita akgtujun siglo akxni tsokgkanita kgantaxtulh tuku xlichuwinanit palakachuwina Miqueas: Jesús, tiku Mesías, lakachilh kBelén. Kata 29 akxni xminita Jesús na kgantaxtulh tuku xlichuwinanit palakachuwina Daniel. Jesús tamunulh chu Dios lilaksakli xʼespíritu santo. Wa xlakata, «kam» o Mesías nema xwankanit pi xʼama min, lu akxni tasiyalh akxni xwankanit.

Jesús, tunkun tsukulh lichuwinan «xasasti xtapakgsit» Dios (Lucas 8:1, Hua Xasasti Talaccaxlan, 1999). Chuna la xlichuwinankanit, limasiyalh pi lu tlan xlikatsi chu xalakgalhamana, lu xkamakgtaya amakgapitsin. Xatapaxuwan kamasiyanilh latamanin tuku xlitlawatkan xwanit chu kamakuchilh lhuwa latamanin «xlipaks xtajatatkan», uma limasiyalh pi Dios xmakgtayama (Mateo 4:23). Latamanin tiku kstalanikgo nachuna wankgolh la wa chatum kstalanina: «¡Ktakgsnitaw Mesías!» (Juan 1:41).

Jesús lichuwinalh pi akxni xʼama mapakgsinan kKatiyatni xʼama tasiya guerras, xʼama tachiki Tiyat chu lhuwa atanu taʼakglhuwit. Wa xlakata mastalh uma tastakyaw: «Skgalalh katawilatit» (Marcos 13:37).

Maski Jesús ni xkgalhi talakgalhin chu putum kilhtamaku kgalhakgaxmatli Dios, na xwilakgolh tiku ni xpaxkikgo chu asta makgnikgolh. Xlakata nilh, kinkamaxkin talakaskin nakgalhiparayaw tuku Adán chu Eva makgatsankgakgolh: latamat nema ni kgalhi xlisputni xakastlan paraíso.

Xlakata Jesús nilh chu lakastakwanalh kkalinin xliʼakgtutu kilhtamaku la chatum espíritu nema lhuwa litliwakga kgalhi, makgantaxtilh tuku xlichuwinankgonit palakachuwinanin. Akxni lakastakwanalh, katasiyanilh liwaka akgkitsis ciento kstalaninanin. Akxni nina xʼan kʼakgapun, kamaxkilh limapakgsin kstalaninanin pi nalichuwinankgo xtukuwani chu xtamapakgsin putum «xlipaks akgmakgat chixkuwin» (Mateo 28:19). ¿La makgantaxtikgolh uma limapakgsin?

(Takilhtinit kMateo, Marcos, Lucas, Juan chu 1 Corintios.)