Xapulana libro xalak Biblia, Génesis, kinkawaniyan la kilhtsukulh xlikalanka kakilhtamaku: «Kxapulana, Dios tlawalh akgapun chu katiyatni» (Génesis 1:1). Akxni Dios xkatlawanita laktsu kiwi chu animales, katlawalh Adán chu Eva, xapulana latamanin. Xlakan ni chuna xwankgonit la animales, xlakata Dios katlawalh chuna la xla, kamaxkilh talakaskin nalaksakkgo tuku natlawakgo. Wa xlakata xkatsikgo tuku xtlawakgo. Komo xkgalhakgaxmatkgolh xMalakatsukinakan, natlatni xwankgolh tiku ni xkgalhikgolh talakgalhin, chu nachuna xkamanan nikxni xnikgolh chu ni xkgalhikgolh talakgalhin chu xʼanalh takaksni kKatiyatni, chuna la Dios xlakaskin.

Pero, chatum ángel katlawanilh tuku nitlan latamanin. Chuna litaxtulh Satanás, uma wamputun «Lakatayana». Maklakaskilh tantum luwa xlakata naʼakgskgawi Eva. Wanilh pi tlan xʼama kitaxtuni komo ni xkgalhakgaxmatli Dios. Adán chu Eva kgalhakgaxmatkgolh Satanás chu makgxtakgkgolh Dios. Xlakata nitlan tuku laksakkgolh, xapulana kinatlatnikan makgatsankgakgolh latamat nema ni xkgalhi xlisputni chu kinkamatitaxtinikgon talakgalhin chu linin.

Dios tunkun wa xlakata nalakkaxtlawa uma tuku nitlan lalh, chu kamaxkilh talakaskin xkamanan Adán nakgalhikgo latamat nema ni kgalhi xlisputni. Lichuwinalh pi «kam», unu kaj chatum tiku xtalichuwinama, xʼama malakgsputu Satanás chu xʼama masputu tapatin nema Adán chu Eva, tlawakgolh pi nakgalhiyaw (Génesis 3:15). * ¿Tiku uma talichuwinama? Xtasiyalh chuna la xtitaxtutilhalh kilhtamaku.

Pero, Satanás chuntiya xliskujma xlakata ni xlakaskin pi xkgantaxtulh xtalakaskin Dios, talakgalhin chu tuku ni tlan lakapala talakgatumilh. Wa xlakata, Dios kalimalakgspututulh munkaklat latamanin tiku nitlan xlikatsikgo. Wanilh Noé pi xtlawalh akgtum arca, akgtum lanka caja nema tlan xlatawakalh kxakgspun chuchut, xlakata tlan xlakgtaxtulh chu xfamilia, nachuna animales nema xʼamakgolh katamaknukgo.

Akxni xtitaxtunita akgtum kata Noé chu xfamilia taxtukgolh kʼarca. Nialhtu xʼanan tuku nitlan kKatiyatni pero nina xtasiya «kam».

(Takilhtinit kʼGénesis capítulos 1-11, Judas 6, 14 chu 15 chu Apocalipsis [Revelación] 12:9.)