Dios wanilh kskujni Abrahán pi «kam» anta xʼama min kxfamilia. Putum latamanin xʼamakgolh makgamakglhtinankgo tasikulunalin xlakata uma «kam» (Génesis 22:18). Titaxtulh kilhtamaku, Jacob, xtanat Abrahán alh latama kʼEgipto. Anta tsukulh staka xfamilia nema lilakgapaska kachikin Israel.

Pero, chatum faraón tiku lixkajni xlikatsi kskujnin katlawalh israelitas. Xlakata Dios nakalakgmaxtu kʼEgipto, tlawalh pi palakachuwina Moisés xmapitsilh xaSpinini pupunu. Alistalh, kamaxkilh xlimapakgsin xlakata nakapulalin chu nakakuentajtlawa. Anta xtatekgsa Pulakkaw xLimapakgsin Dios, niku xkalimapakgsikan namastakgo tamakamastan xlakata nakatapatikan xtalakgalhinkan. Dios malakpuwanilh Moisés chu kawanilh israelitas pi Dios xʼama malakgacha chatum palakachuwina. Uma palakachuwina wa «kam» tiku xlichuwinankanit.

Akgtati siglo xtitaxtunita Dios wanilh mapakgsina David pi kxfamilia xʼama min «kam» chu putum kilhtamaku xʼama mapakgsinan. Uma «kam» wa tiku lilakgapaska Mesías, Dios laksakli xlakata nakalakgmaxtu latamanin chu akgtum paraíso natlawa Katiyatni.

Dios maklakaskilh David chu atanu palakachuwinanin, xlakata tuku xʼama lilakgapaskan Mesías. Lichuwinankgolh pi ni tlanka xmakgkatsikan chu lu xapaxkina xʼama wan. Xtamapakgsin xʼama masputu tatsinkstat, tuku ni xaʼakgstitum chu guerra, chu putum kskujnin xatapaxuwan xlatamakgolh chu tlan xtalalinkgolh animales. Tajatat, tapatin chu linin nema Dios ni xlakaskin pi xʼanalh putum namalakgsputu. Nachuna, tiku nikgonita nalatamaparakgo.

Dios malakpuwanilh palakachuwina Miqueas pi Mesías xʼama lakachin kBelén, chu Daniel lichuwinalh pi xʼamaka makgnikan. Pero, Dios xʼama malakastakwani chu Mapakgsina xʼama tlawa kʼakgapun. Daniel tsokgli pi xTamapakgsin Mesías xʼama masputu putum mapakgsinanin xalak Katiyatni. Pero, ¿milh Mesías chuna la xlichuwinankanit?

(Takilhtinit kʼGénesis 22 asta 50,chu kʼÉxodo, Deuteronomio, 2 Samuel, Salmos, Isaías, Daniel, Miqueas chu Zacarías 9:9.)