¿Lhuwa xtapalh akxilha Dios tiku tlawaputun xtalakaskin? Makgapitsi latamanin wankgo pi ni, xlakata lakpuwankgo pi ni kinkalilakgaputsayan. Xlakata chuna wankgo, limasiyakgo pi ni liwana lakgapaskgo. Biblia, kinkawaniyan pi Jehová lhuwa xtapalh akxilha xtaskujutkan kskujnin. Liwana kaʼakxilhwi xtachuwin apóstol Pablo nema wi kHebreos 11:6.

¿Tuku talakaskin xlakata namakgapaxuwakan Jehová? Pablo tsokgli: «Wampi lapi ni kgalhiyaw nkintakanajlakan, ni la makgapaxuwayaw Dios». Kaʼakxilhwi pi apóstol Pablo wa «tuwa» pero ni wa «nila». Tlan taʼakgatekgsa uma tachuwin, takanajla lu talakaskin xlakata namakgapaxuwaya Dios.

Pero, ¿tuku wamputun kgalhikan takanajla? Akgtiy tuku kilhchanima. Pulana talakaskin “kanajlakan pi lama”, nila namakgapaxuwayaw komo ni kanajlayaw pi lama. Pero ni kaj watiya uma talakaskin, asta demonios katsikgo pi Dios lama. (Santiago 2:19). “Kanajlakan pi lama” nakinkamatlawiyan pi chuna nalatamayaw la lakgati (Santiago 2:20, 26).

Xlipulaktiy, kilikanajlatkan pi Dios “sikulunatlawanan”, uma wamputun pi kamaxki latamanin tuku lakaskinkgo. Lataman tiku kgalhi takanajla chu makgapaxuwaputun Dios liwana katsi pi nasikulunatlawakan (1 Corintios 15:58). ¿La namakgapaxuwayaw komo ni nakanajlayaw pi nakinkamaxkiyan tuku lakaskinaw? (Santiago 1:17; 1 Pedro 5:7.) Komo nalakpuwan pi ni lakgalhaman, o komo ni xlakaskinka kinkaʼakxilhan, uma wamputun pi ni lakgapasaw.

¿Tiku kasikulunatlawa Dios? Pablo wa: «Nti mputsakgoy lakgalhamankgoy». Maktum libro wan nema maklakaskinkgo tiku matitaxtikgo atanu tachuwin Biblia, wan pi kʼuma texto verbo griego tachuwin «nti mputsakgoy» uma ni wamputun «ankan putsakan», wata wamputun «kakninanikan» Dios. Atanu likgalhtawakga na wan pi uma wamputun lu lhuwa putsakan. Jehová kamaxki tuku lakaskinkgo tiku xtakanajlakan kamatlawi pi nakakninanikgo xliputum xnakujkan (Mateo 22:37).

¿Tuku tasikulunalin nakamaxkikgo? Akgtum tamaskiwin nema nitu xtachuna nema limasiya xtalakgalhaman chu xtapaxkit: latamat nema ni kgalhi xlisputni kKatiyatni (Revelación [Apocalipsis] 21:3, 4). Asta la uku, tiku lhuwa putsakgo Dios lhuwa tasikulunalin makglhtinankgo. Xlakata xtamakgtay espíritu santo chu tastakyaw nema wi kBiblia lu lipaxuwakgo xlatamatkan (Salmo 144:15; Mateo 5:3).

Chuna la akxilhaw, Jehová chatum Dios tiku lhuwa xtapalh akxilha tiku kakninanikgo. Uma natlawa pi tlakg natalakatsuwiniyaw. ¿Katsiputuna la nakgalhiya takanajla nema Jehová sikulunatlawa?