CHICHINI taxtupara amakgtum kJericó. Rahab talakaxtu kventana chu akxilha kachikin Israel tiku minkgonit katalachipakgo xkachikin. Anta wilikgonit xkampamentoskan niku kaxtum nema makgstili kachikin chu tlawamaparakgolh amakgtum kxkilhtin kachikin. Tasiya la soldados makgosakgo pokgxni akxni tlawamakgolh. Takgaxmatpara akxni matasikgo akgalokgot.

Jericó wa xkachikin Rahab. Kalakgapasa latamanin, xtiji, kachikin, xmercados chu xtiendas. Akxilha la stakma xtapekuakan latamanin chuna la titaxtutilhama kilhtamaku chu israelitas tlawamakgolh chali chali nema niti akgatekgsni: makgtum makgstilimakgolh kxkilhtin kachikin. Pero Rahab ni makgapekuan akxni xkgaxmata la matasikan akgalokgot chuna la kamakgapekwan amakgapitsi latamanin.

Rahab talakaxtu kxventana nema wi kxakgspun xpatsaps kachikin, chu akxilha pi Israel tsisa tsukupara makgstili xlimakgtujun Jericó. Akxilha sacerdotes tiku akxtum taʼankgo soldados chu tlakgmakgolh chu kalimakgolh arca nema xasanto nema wamputun pi wa katawilakgolh Jehová. Chipanit tasiw xaspinini nema waka kxventana. Uma tasiw malakapastaka pi xla chu xfamilia kgalhikgo akgtum takgalhkgalhin, maski xkachikin namalakgsputukan. ¿Rahab chatum stamakgana? Jehová nichuna akxilha; xla akxilha pi chatum puskat tiku kgalhi lhuwa takanajla. Kalichuwinaw xlatamat Rahab chu kaʼakxilhwi tuku kinkamasiyaniyan.

Rahab sta xmakni. Tiku lakputsananikgo Biblia uma nila kanajlakgo, wata kaj lakpuwankgo pi kaj xkuentajtlawana xwanit niku klhtatakgokan akgtum tsisni. Pero Biblia liwana kinkawaniyan tuku xaxlikana (Josué 2:1; Hebreos 11:31; Santiago 2:25). Max kCanaán taskujut nema xkgalhi Rahab tlan xʼakxilhkan. Pero maski chuna, kintalakapastaknikan nema kinkamaxkinitan Jehová kinkawaniyan tuku tlan chu tuku nitlan (Romanos 2:14, 15). Max Rahab liwana xkatsi pi taskujut nema xtlawa lu lixkajni xwanit. Max, chuna la kaʼakgspula lakpuskatin xala uku, max ni katsi tuku natlawa xlakata nakamaxki xfamilia tuku maklakaskinkgo.

Max xlakaskin tlakg tlan latamat. Niku xlama xlatlawanikan tuku nitlan chu lixkajni tayat, xtakgalhikgo talakgxtumit xfamiliaskan chu xtakgalhikgo talakgxtumit animales (Levítico 18:3, 6, 21-24). Lhuwa latamanin chuna xtlawakgo xlakata xtakanajlakan. Akxni xkakninanikgo xdioseskan kxtemploskan xkgalhikgo talakgxtumit, chu akxni xkakninanikgo dioses la Baal chu Mólek xtalakaskin pi xlhkuyikgolh xastakna laktsukamanan.

Jehová liwana xkalakgapasa la lixkajni xlikatsikgo tiku xalak Canaán. Asta Jehová wa: «Wa xlakata katiyatni lu lixkajni chu nakkamalakgaxokge tuku nitlan tlawakgonit, chu katiyatni nakalipatlanan tiku anta lamakgolh» (Levítico 18:25). ¿La xʼamaka kamalakgaxokgekan? «Jehová mi Dios xlikana tsinu tsinu nakatamakxtu  umakgolh kachikinin kmilakatin», wa uma tuku kawanilh xkachikin Dios (Deuteronomio 7:22, Reina-Valera, 1995). Xtitaxtunita akglhuwa siglo xla chuna xkawanikanit xkamanan Abrahán pi xlakan xʼama wan ama tiyat, chu «Dios wanti niʼukxni akgsaninan» (Tito 1:2; Génesis 12:7).

Pero xwilakgolh makgapitsi kachikin nema Jehová xwanit pi xʼama kamasputu (Deuteronomio 7:1, 2). Xla «Juez tiku xliputum katiyatni», xkatsi tuku xwi kxnakujkan chu xakxilha pi lu nitlan xlikatsikgo chu lu nitlan xwanit xtayatkan (Génesis 18:25; 1 Crónicas 28:9). Chuna xwanit Jericó. ¿La xmakgkatsi Rahab xlakata xlama kʼakgtum kachikin nema na xʼamaka masputukan? Kaj watiya tlan nalakpuwanaw tuku xmakgkatsi akxni xkgaxmata xlakata israelitas. Xlikgaxmatnit pi akglhuwata kata xtitaxtunit uma kachikin xkatlajakgonit soldados xalak Egipto, tiku tlakg lakgtliwakgan xwankgonit xalamakgasa. ¡Wa uma kachikin tiku xʼama katalachipa latamanin xalak Jericó, pero umakgolh latamanin ni xmakgxtakgputunkgo nitlan xtayatkan! Tamakgachakgxi pi latamanin tiku xlamakgolh kxkilhtamaku Rahab “ni kgalhakgaxmatnankgolh” (Hebreos 11:31).

Pero Rahab nichuna xwanit. Max xkgaxmatnit tuku xlichuwinankan xlakata Israel chu xDioskan. ¡Xlikana pi ni xtachuna xwanit la dioses cananeos! Uma Dios xkakuentajtlawa xkachikin xlakata nitu xkatlawanika, chu ni xkamafuerzajni natlawakgo xtalakaskin; wa tlan tastakyaw xkamaxki. Uma Dios lhuwa xtapalh xkaʼakxilha lakpuskatin, ni xkaʼakxilha la komo kaj xkalikgamanankgolh lakchixkuwin tiku tlan xtamawakgolh, kstakgolh, chu xkalikgamananka akxni xkakninanikgolh xdioseskan. Rahab kgaxmatli pi israelitas chinkgolh kxkilhtun Jordán chu xtakaxtayamakgolh xlakata xʼama katalachipakgo Jericó, max lu nitlan xlimakgkatsi tuku xʼama lani xkachikin. ¿Akxilhli Jehová uma puskat? ¿Akxilhli tuku xwi kxnaku?

La uku lhuwa latamanin makgkatsikgo la Rahab: xlakata nachuna linkgo xlatamatkan nema tlawa pi namakgkatsi pi nitu litaxtukgo chu kamakglhti xtapaxuwankan; makgkatsikgo pi niti kaʼakxilha. Xlatamat uma puskat lu tlan limakgkatsikgo, xlakata limasiya pi Dios putum kinkaʼakxilhan. Maski lu nitlan tuku tlawanitaw, xla «ni makgat kinkawilanin» (Hechos 17:27). Dios lakatsu wi, chu skgalalh wi xlakata nakamaxki takgalhkgalhin tiku lipawankgo. ¿Chuna tlawalh Rahab?

Akxni ni lhuwa kilhtamaku xtsankga xlakata israelitas xmakgstilikgolh Jericó, chatiy tiku ni xalak Jericó chankgolh kxchik Rahab. Ni lakaskinkgo nakatsikan pi ni xalak Jericó, pero latamanin skgalalh wilakgolh katsiputunkgo komo israelitas kamalakgachakgonit skgalananin. Pero Rahab lhuwa tiku kamakgamakglhtinan kxchik, pero uma chixkuwin kaj watiya lakaskinkgo niku nalhtatakgo, ni kaj tatlawaputunkgo talakgxtumit. Uma skgalala puskat lakapala katsilh tiku umakgolh chixkuwin.

 Umakgolh chixkuwin, xlikana skgalananin xalak Israel. Josué xcomandantejkan, kamalakgachanit xlakata nakatsikgo niku tliwakga wi kachikin chu ni tliwakga. Wa uma xapulana kachikin xalak Canaán tiku israelitas nakatalachipa chu max wa kachikin tiku tlakg tliwakga. Josué katsiputun tiku nakatalachipakgo. Skgalananin xkatsikgo niku nachankgo. Chatum tiku ni xalak Jericó chu natamakgxtakga kxchik chatum puskat tiku sta xmakni niti xkatsilh. Max asta tlan xkatsikgolh tuku lakaskinkgo kaj xlakata xkgaxmatkgolh tuku lichuwinankgokan.

Rahab lu tlan kamakgamakglhtinalh (Santiago 2:25). Kamaxki talakaskin natanukgo kxchik, maski liwana katsi tiku umakgolh lakchixkuwin. Max tlakg katsiputun xlakata xDioskan.

Pero, chinkgolh xmakatsinanin mapakgsina xalak Jericó. Lhuwa tiku wan pi wilakgolh skgalananin kxchik Rahab. ¿Tuku natlawa? Komo nakamakgtaya skgalananin, ¿kalipekua nawili xlatamat putum xfamilia? ¿Nakamakgnikan putum xfamilia komo ni nawan niku wilakgolh umakgolh lakchixkuwin? Rahab liwana katsi tiku umakgolh lakchixkuwin. Komo nakanajla pi xDios israelitas tlakg tliwakga, chanit kilhtamaku xlakata wa natataya.

Maski ni lhuwa kilhtamaku wi, Rahab lu skgalala chu lakapala lakpuwan. Kamatsekga skgalananin niku wilakgo linos nema kamaskakama kxakgstin xchik. Kawani xmakatsininanin mapakgsina: «Xlikana pi lakchixkuwin minkgolh chu ni xakkatsi niku xalanin. Chu akxni xʼamaka malakchuwakan kachikin akxni xtsiswama, lakchixkuwin taxtukgolh. Nikkatsi niku ankgolh. Kakgosnantit xlakata nakamataxtukatit» (Josué 2:4, 5). Kalakpuwanti pi akxilhpat Rahab kalakaʼakxilha tiku kamalakgachalh mapakgsina. ¿Akxilhkgo pi Rahab lu pekuama?

¡Lu tlan kitaxtulh tuku kawanilh! Lakchixkuwin lakapala ankgo kxkilhtun Jordán (Josué 2:7). Rahab max lu tlan makgkatsilh. Xlakata uma tuku lakatanu malakgachakgolh makgninanin tiku ni xlikatsitkan tuku xaxlikana. Chuna lakgmaxtulh chatiy lataman tiku kskujnanikgo Jehová.

Rahab lakapala alh kxakgstin xchik chu kawanikgolh skgalananin tuku tlawalh. Nachuna kawanilh tuku lu xlakaskinka: Jericó ni kgalhi litliwakga chu lu kapekuanima israelitas. ¡Lu tlan tamakatsin kamaxkika skgalananin! ¡Xalakluku cananeos lu pekwanimakgolh xlitliwakga Jehová, xDioskan Israelitas! Alistalh puskat wi tuku wan nema tlakg xlakaskinka nema asta la uku lu kinkamatliwakglhan. Xla wa: «Jehová mi Dioskan chatum xalak akgapun chu tutsu xalak katiyatni» (Josué 2:11). Tuku kgaxmatnit tlawalh pi na akgatekgsa  pi xDioskan israelitas tlan nalipawankan, wa xlakata kanajlanilh.

Rahab xlikana kanajla pi: Jehová natlawa pi natlajanan xkachikin. Wa xlakata kawani skgalananin pi nalakgalhamankgo; kawani pi katapatikgolh xlatamat chu xla xfamilia. Xlakan tlan tlawakgo, pero wi tuku wanikgo: niti nakawani chu namawaka kgantum tasiw xaspinini kxventana kxpatsaps kachikin. Komo chuna natlawa, soldados tiku natanukgo tlan nakuentajtlawakgo (Josué 2:12-14, 18).

Xliʼakxilhtit Rahab kinkamasiyaniyan tuku xaxlikana xlakata takanajla. Chuna la wan Biblia, «ntakanajla, wa nalikgalhiya lantla nakgaxpata» (Romanos 10:17). Rahab kgaxmatli pi Jehová xlikana kgalhi litliwakga chu xaʼakgstitum, uma tlawalh pi kakgalhinilh takanajla chu kalipawa. Akinin tlakg katsiyaw xlakata Jehová. ¿Naliskujaw xlakata tlakg nalakgapasaw? ¿Nakinkamatliwakglhan xlakata nakgalhiniyaw takanajla tuku katsininitaw kBiblia?

Rahab tsuku lakkaxtlawa la natsalakgo skgalananin: chi kgantum tasiw kxventana xlakata anta nalaktaktukgo chu naʼankgo tatsekgkgo ksipi. Nema lu kkasijpini wilakgolh kxnorte Jericó lhuwa anan lhuku niku tlan tatsekgkan asta akxni tlan nataspitparakgo niku wilakgolh israelitas chu nakawanikgo tlan tamakatsinin nema kawaninit Rahab.

Ni lhuwa kilhtamaku titaxtulh, Jehová machokgolh kgalhtuchokgo Jordán chu Israel kaskakni niku titaxtu (Josué 3:14-17). Max Jericó lu pekuan akxni katsi tuku lalh. Pero, Rahab liwana katsilh pi tlan kitaxtunilh xlakata lipawa Jehová.

Sputmaja xliʼakgchaxan kilhtamaku nema israelitas xlimakgchaxan makgstilimakgolh Jericó. Pero xliʼakgtujun kilhtamaku tanu xʼama wan. Chuna la lichuwinaw kʼuma artículo, tsisa tsukuparakgolh makgstiliparakgo Jericó, chu akxni makgstilikgolh chuntiya xtlawamakgolh (Josué 6:15). ¿Tuku lama?

Soldados xlimakgtujun makgstilikgo kachikin chu tachokgokgo. Nialh matasikgo akgalokgot. Nitu takgaxmata. Tiku tanumakgolh kkachikin lu nitlan makgkatsikgo. Pero, akxni Josué mapakgsinalh, soldados pixlanka kawankgolh la nikxniku chuna xtlawakgonit. ¡Lu pixlanka takgaxmata! Pero nitu chuwinamakgolh. «¿Tuku tlawaputunkgo?», max kakgalhskinka soldados tiku yakgolh kxakgspun patsaps. Ni makgas kilhtamaku titaxtulh kakgalhtika. Ama lanka patsaps nema lakyakgolh chu chiwix litatlawanit tsukulh tachiki. Taskgalh chu alistalh lakxlalh. Pero kaj akgtum patsaps nitu lanilh. Wa xchik Rahab, xchik chatum puskat tiku kgalhilh takanajla. Kalakpuwanti la makgkatsilh xlakata Jehová kuentajtlawalh. * ¡Xfamilia nitu lanikgolh! (Josué 6:10, 16, 20, 21.)

Xkachikin Jehová tlan makgamakglhtinalh Rahab xlakata limasiyalh xtakanajla. Akxni akxilhkgolh pi xchik Rahab lu xtasiya la kgantum mokgot niku kaskakni tiyat, israelitas akxilhkgolh pi xmakgtayama Jehová. Rahab chu xfamilia lakgtaxtukgolh akxni masputuka ama lixkajni kachikin. Akxni masputuka ama kachikin, maxkika talakaskin natawila lakatsu niku xwilakgolh israelitas, titaxtulh kilhtamaku namakgtapakgsilh kkachikin Israel. Tatamakgaxtokgli chatum chixku tiku xwanikan Salmón, chu kgalhilh chatum kgawasa tikuwanika Boaz, tiku lu lhuwa takanajla xkgalhi chu tatamakgaxtokgli Rut, tiku moabita xwanit (Rut 4:13, 22). * Asta mapakgsina David chu Jesucristo tiku Mesías anta minkgocha kʼuma familias (Josué 6:22-25; Mateo 1:5, 6, 16).

Xlatamat Rahab kinkamasiyaniyan pi Jehová putum xlakaskinka kinkaʼakxilhan. Putum kinkaʼakxilhan chu akxilha tuku wi kinakujkan. Chu akxni akxilha maski kaj tsinu takanajla, chuna la xkgalhi Rahab lu paxuwa. Xtakanajla uma puskat matlawilh tuku tlan. Chuna la wan Biblia «wa lakwan xtatlaw ntlan litaputlakgalh» (Santiago 2:25). ¡Xlikana lu tlan xliʼakxilhtit nema akinin, na tlan natlawayaw!