KATALAKATSUWINI DIOS
«Kaukxilhtit, paks kmasastiy xlipaks nkatuwaj»
¿Xlakgati putum kilhtamaku xtalatapa mi familia kKatiyatni niku nialh naʼanan tajatat? ¿Xlakaskinti xmilh kilhtamaku pi ksputli tapatin, takatsanajwat, chu linin? Uma ni akgtum tamanaxnat; Dios chuna wanit chu namakgantaxti. Kaʼakxilhwi tuku wan xlakata la nakgantaxtu anta kApocalipsis [Revelación] 21:3-5 (kalikgalhtawakga).
«Na paks naxakanikgo Dios xlakgpixtajatkan.» (Apocalipsis 21:4.) ¿Tuku lakgpixtajat naxaka? Ni wa kilhchanima lakgaxtajat xla tapaxuwan, na ni wa lakgaxtajat nema lakgchakge kilakgastapukan; wa kilhchanima xla talipuwan. Dios namasputu takatsanajwa chu tapatin nema tlawa pi natasakgo latamanin.
«Na nialh katiʼanalh linin.» (Apocalipsis 21:4.) Linin tlawa pi kaʼanalh lhuwa tatasa. Pero Jehová nakalakgmaxtu latamanin tiku kgalhakgaxmatkgo.¿La natlawa? Namasputu tuku tlawa pi kaʼanalh linin: talakgalhin nema kinkamatitaxtinin Adán (Romanos 5:12). Jehová namaklakaskin xtamakamastan Jesús, xlakata latamanin nialh nakgalhikgo talakgalhin. * Wa xlakata, linin tiku awatiya xtalatlawana chixku «nalaktlaway» (1 Corintios 15:26). Putum nalatamakgo chuna la Dios xlakaskin: nialh katikgalhikgolh tajatat chu nalatamakgo putum kilhtamaku.
«Na ni mpala wa ntakatsanajwat» (Apocalipsis 21:4.) ¿Tuku takatsanajwat nema nialh katiʼanalh? Takatsanajwat nema makgkatsiyaw xlakata wi tuku nitlan tlawaw o xlakata talipuwan, nachuna akxni katsan kimaknikan xlakata kgalhiyaw talakgalhin, uma tlawa pi lhuwa millones latamanin kapatinankgolh.
Nialh makgas tlan nalatamakan chu nialh katiʼanalh tatasa, linin, takatsanajwat. «Pero ¿niku? max nakgalhskinkana. ¿Kʼakgapun?». Ni. Tuku wanit Dios pi natlawa litsuku uma tachuwin «xputawilh Dios, anta wi kxlakgstipankan nchixkuwin», chu latamanin lamakgolh kKatiyatni (Apocalipsis 21:3). Xliʼakgtiy, lichuwinan akgtum kakilhtamaku niku «nialh katiʼanalh linin», uma wamputun, kakilhtamaku niku xʼanan linin, pero sputli. Kʼakgapun nikxni ananit linin, pero kKatiyatni ananit linin, akxni aku xkilhtsukuma latamanin. Uma wamputun pi tuku lichuwinanit Dios namakgantaxti unu kKatiyatni, chu tlakg tlan nalatamakan.
Dios natlawa pi nialh natasakgo latamanin xlakata tapatin chu talipuwan o talakgaputsit
Jehová lakaskin nakanajlayaw tuku wanit natlawa. Xlakata akxilhwi tasikulunalin nema nalimin, kinkawaniyan: «Kaukxilhtit, paks kmasastiy xlipaks nkatuwaj». Chu wa: «Yuma ntachuwin, kgalhiy xkakni, na xlikanaj» (Apocalipsis 21:5). Tlakg kakatsini xlakata la natlawa mifamilia chu wix, xlakata na anta natawilayatit niku xatapaxuwan natawilakgo latamanin tiku naʼakxilhkgo la namakgantaxti tuku wanit Dios.
Textos xalak Biblia nema tlan nalikgalhtawakgaya uma papaʼ:
1 Pedro 1-5; 2 Pedro 1-3; 1 Juan 1-5; 2 Juan 1-13; 3 Juan 1-14; Judas 1-25 asta Revelación 1-22
^ párr. 5 Xlakata tlakg nakatsiniya xla xtamakamastan Jesús kaʼakxilhti capítulo 5 xla libro ¿Tuku xlikana masiyay Biblia?, tlawakgonit xtatayananin Jehová.
