Makuchinanin tiku kuchikgo akgxakga wankgo pi komo chatum lataman xatapaxuwan nalatama, xlikanajlanit Dios. Chuna limasiyakgo latamanin, akxni kamakgtayakgo makgapitsin. Amakgapitsi maklakaskinkgo xkilhtamakujkan nakuentajtlawakgo tuku anan kkatiyatni, maninankgo o tlakgnankgo xlakata tlan namakgkatsikgo. Pero lhuwa ni tekgskgo tapaxuwan nema xputsamakgolh.

Tiku likgalhtawakgakgo Biblia liwana katsikgo pi latamanin maklakaskinkgo xtamakgtay Dios. Xapulana capítulos xla Génesis wan pi Dios katlawalh xapulana latamanin, chu makglhuwa xkatachuwinan chu kamaxkilh talakaskin tlan natalalinkgo (Génesis 3:8-10). Dios ni katlawalh latamanin xlakata xakstukan natapakgsikgo, lakaskinkgo natachuwinankgo. Biblia makglhuwa chuna lichuwinan.

Akgtum liʼakxilhtit, Jesús wa: «Paxuwana lamakgo wantiku katsikgo pi lakaskinkgo tuku xla Dios» (Mateo 5:3, TNM). Uma tachuwin kinkamasiyaniyan pi talakaskin natlawayaw tuku xla Dios xlakata xatapaxuwan nalatamayaw. ¿Pero la natlawayaw? Jesús kinkamaxkiyan xtakgalhtin: «Ni xman wa nkaxtalanchu nkatililatamalh nchixku, wampi wa nalilatamay xlipaks ntachuwin wa ntu wan Dios» (Mat. 4:4). Chuna, uma wamputun, xtalakapastakni chu xlimapakgsin, nema wi kBiblia tlan nakinkamakgtayayan xlakata xatapaxuwan nalatamayaw. Kaʼakxilhwi pulaktutu.

La uku wilakgolh lhuwa tiku mastakgo tastakyaw xlakata la tlan nalatalalinkan, tapaxkit, familia, lakkaxtlawakan taʼakglhuwit, tapaxuwan chu tuku xlakata lamaw kkakilhtamaku. Pero tiku tlakg tlan masta tastakyaw wa Jehová, tiku katlawalh latamanin.

Kalakpuwanti pi tamawa cámara o computadora. Wix nalakaskina pi tiku tlawalh na natlawa  niku nawan xlakata la liwana namaklakaskina, ¿ni xlikana? Biblia nachuna; wa nema kinkamaxkinitan Dios tiku kinkatlawan, kinkamaxkin xlakata nakatsiyaw la nalatamayaw. Biblia kinkawaniyan tuku xlakata kinkatlawakan, chu kinkawaniyan la nalilatamayaw kilatamatkan.

Biblia na kinkawaniyan tuku nakinkamakgtayayan kkilatamatkan chu tuku ni. Tastakyaw nema nakinkamaxkikgoyan makgapitsi latamanin max nalakpuwana pi tlakg tlan chu ni tuwa. Pero ¿ni xlikana pi tlakg tlan nakitaxtu komo wa natlawayaw tuku kinkawaniyan Dios, tiku kinkatlawan?

Pero, maski Jehová kinkawaniyan la nalatamayaw chu kinkamaxkiyan tastakyaw, ni kinkamafuerzajliniyan natlawayaw. Xlakata kinkapaxkiyan chu kinkamakgtayaputunan, xatapaxuwan kinkawaniyan: «Akit, Jehová, akit mi Dios, Wantiku masiyaniyan xlakata wix tlan nakitaxtuniyan, Wantiku masiyaniyan tiji niku wix natlawana. ¡Komo xlikana xkgaxpatti kilimapakgsin! Takaksni nema nakgalhiya xtachuna nawan la kgalhtuchokgo, chu wantuku natlawaya xaʼakgstitum nawan la akxni taʼakgayawa pupunu» (Isaías 48:17, 18). Tlan nawanaw, komo natlawayaw tuku wan Dios, xatapaxuwan nalatamayaw. Wa xlakata maklakaskinaw xtamakgtay Dios.

Wi tiku wankgo pi ni maklakaskinkgo xtamakgtay Dios o nipara tsinu kanajlakgo pi lama. Lakpuwankgo pi komo xtawi chatum Dios tiku xkinkapaxkin ni xʼanalh tuku nitlan. Kakgalhskinkan: «¿Tuku xlakata patinankgo latamanin tiku tlan likatsikgo? ¿Tuku xlakata nitlan lakachinkgo lhuwa lakgskgatan tiku ni linkgo kuenta? ¿Tuku xlakata nichuna kitaxtu kilatamatkan la xlakpuwanaw?». Uma takgalhskinin lu xlakaskinka, komo nakgalhiyaw xtakgalhtin max nalakgpali kilatamatkan. Xlakata ni wa nalimawakayaw Dios putum tuku lama kkakilhtamaku, kaʼakxilhwi komo nakinkamaxkiyan takgalhtin xtachuwin.

Capítulo akgtutu xla Génesis kinkawaniyan pi Satanás, limaklakaskilh tantum luwa, kamatlawilh tuku nitlan xlakata ni xtlawakgolh xlimapakgsin Dios. Xkawanikanit pi xnikgolh komo xwakgolh xtawakat kiwi nema lilakgapaskan tuku xatlan chu nixatlan. Satanás wanilh Eva: «Ni katinitit. Xlakata Dios katsi pi kilhtamaku akxni nawayatit natalakki milakgastapukan chu la Dios nawanatit, nalakgapasatit tuku tlan chu tuku nixatlan» (Génesis 2:16, 17; 3:4, 5).

Tuku wa, Satanás ni kajwatiya wa pi Dios akgsaninan, na limasiyalh pi nitlan la mapakgsinan. Wa pi tlakg tlan nakakitaxtuni latamanin wa nakgalhakgaxmatkgo chu ni wa Dios. ¿La xtalimasiyalh komo xlikana o ni xlikana  tuku xkilhwama? Jehová mastalh talakaskin xtitaxtulh kilhtamaku. Uma wamputun pi maxkilh kilhtamaku Satanás chu tiku tatayakgolh xlakata nalimasiyakgo komo latamanin tlan xakstukan natapakgsikgo.

¿La lakpuwana wix? ¿Xlikana tlakg tlan latama chixku chu ni maklakaskin xtamakgtay Dios? Kalakpuwanti tapatin nema anan, tuku ni xaʼakgstitum, tajatat, chu linin; latlawanikgo latamanin tuku nitlan chu nitlan la limakgolh xlatamatkan, guerras chu lhuwa kamakgnikan latamanin... Uma, chu atanu tuku nitlan kamakgapatinanit latamanin akglhuwa siglo, limasiyanit pi nitlan kakitaxtuninit xlakata chixku tamakgatlininit Dios. Biblia ni wan pi wa xkuenta Dios putum tuku nitlan anan wata wan: «Chixku kaʼakgchipanit latamanin xlakata natlawani tuku nitlan» (Eclesiastés 8:9).

Chuna la akxilhwi, ¿ni xlikana pi liwana tasiya pi lakaskinaw naputsayaw Dios xlakata natekgsaw takgalhtin nema lu katsiputunaw? chu nakatsiyaw ¿la nalakkaxtlawa?

Makgasata chu asta la uku latamanin putsakgonit xlakata ni nakgalhikgo tajatat, takgolat chu linin. Lhuwa kilhtamaku maklakaskinkanit, litliwakga chu tumin, pero nitu litaxtunit tuku tlawakgonit. Lhuwa tiku putsakgonit tuku ni nalikgolonkgo, asta makuchinanin na putsakgonit, pero nila tekgskgo tuku ni nalinikgo.

Dios lakaskin pi xatapaxuwan kalatamakgolh latamanin. Wa uma tuku xlakaskin akxni katlawalh latamanin, chu ni talakgpalinit xtapuwan (Génesis 1:27, 28; Isaías 45:18). Liwana katsiyaw pi putum tuku wan Jehová namakgantaxti (Isaías 55:10, 11). Biblia lichuwinan tuku wanit Dios natlawa, pi akgtum paraíso natlawa Katiyatni xtachuna nema makgatsankgakgolh Adán chu Eva. Apocalipsis o Revelación 21:4 wan pi «naxakanikgo Dios xlakgpixtajatkan; na nialh katiʼanalh linin; chu na nialh katiʼanalh ntalipuwan, ni mpala wa ntatasa, chu na ni mpala wa ntakatsanajwat». ¿Tuku natlawa Dios, xlakata nalakgpali uma kakilhtamaku? ¿La nalitamakgtayayaw akxni nakgantaxtu tuku wanit Dios?

Xkgawasa Dios, Jesucristo, kamasiyanilh natlawakgo oración xlakata nakgantaxtu xtalakaskin xTlat. Lhuwa latamanin lakgapaskgo chu tlawakgo ama oración, lilakgapaskan padrenuestro. Wan: «KinTlatikan nti wilapi nkakgapun, katamasantujlilh mintukuwini. Kamilh milimapakgsin. Wa nkatatlawalh ntu mintalakaskin, xtachuna lantla nkʼakgapun, nachuna kawa nkatiyatna» (Mateo 6:9, 10). Wa xTamapakgsin namasputu tuku nitlan tlawakgonit mapakgsinanin xalak kakilhtamaku chu nawili xasasti kakilhtamaku nema wanit (Daniel 2:44; 2 Pedro 3:13). * Pero akinin wi tuku kilitlawatkan. ¿Tuku natlawayaw?

 Jesucristo masiyalh tuku kilitlawatkan chu ni tuwa: «Wa cha yuma liwi latamat wantu xaliʼankgalhin, mpi nalakgapaskgoyan wix [...] Dios, talulokgtat, chu Jesucristo, wa nti wix malakgachanita» (Juan 17:3). Xlikana, paxtikatsiniyaw Jehová xlakata tlan nalatamayaw putum kilhtamaku kxasasti kakilhtamaku. Wa xlakata, ¿maklakaskinaw xtamakgtay Dios? Tlan nawanaw pi maklakaskinaw.

Akgtiy milh kata titaxtunit, kʼAreópago o sipi xla Marte kʼAtenas, apóstol Pablo kawanilh lakgskgalalan griegos xlakata Dios: «Sampi wata wanti maxkiy latamat nkaxatikawaj, chu ntajaxan, chu xlipaks nkatuwaj». Alistalh wa: «Wa lilamaw, na wa litatsuwajiyaw, chu na wa liananaw; xtachuna lantla ntiwankgolh makgapitsin mintsokgnaninkan xla lakswan tachuwin: Sampi na xkilhtsukut Dios nkin» (Hechos 17:25, 28).

Tachuwin nema wa Pablo xlikana asta la uku. Kimalakatsukinakan kinkamaxkiyan un nema lijaxananaw, chuchut nema likgotnanaw chu liwat nema wayaw. Komo ni xkgalhiw uma nila xlatamaw. Pero, ¿tuku xlakata chuntiya kamakgtayama latamanin maski lhuwa ni tsinu lakapastakkgo? Pablo wan tuku xlakata: «Sampi lakaskilh Dios naputsakgoy, mpalapi lantla naputsakgoy, xalan natakgskgoy, maski cha xlikana ni makgat kinkawilanin nchatunu nkin» (Hechos 17:27).

¿Tlakg lakgapasputuna Dios? ¿Tlakg katsiputuna tuku lakpuwanit natlawa chu xtastakyaw xlakata xtapaxuwan nalatapaya uku chu putum kilhtamaku? Komo chuna, kkawaniyan pi katachuwinanti tiku maxkin uma likgalhtawakga o tiku tlawakgonit uma revista. Xlakan namakgtayakgoyan.