Akxni nina xʼan kʼakgapun kata 33, Jesucristo wa pi xʼama taspita. Wa pi wa ama chixku lu xkgalhi kakni tiku alh kʼakgtum tiyat luwa makgat, chu akxni lhuwa kilhtamaku titaxtulh limilh lhuwa litliwakga xlakata mapakgsina nawan. Cristo xʼama taspita xlakata lu xaʼakgstitum tamapakgsin xkamaxkilh latamanin. (Kalikgalhtawakga Lucas 19:11, 12.)

¿La nataspita Cristo? Malakastakwanika la chatum espíritu (1 Pedro 3:18). Alh kʼakgapun chu kxpaxtun Jehová tawilacha (Salmo 110:1). Titaxtulh kilhtamaku «Kgolotsin», Jehová, maxkilh putum limapakgsin xlakata nakamapakgsi latamanin. Wa xlakata Jesús taspitpara, ni la chatum chixku, wata la chatum mapakgsina tiku nila akxilhkan. (Kalikgalhtawakga Daniel 7:13, 14.)

Jesús nakatataspita xʼángeles pero nila katikaʼakxilhka xlakata nakatalakkaxla latamanin. Nakamasputu tiku nitlan likatsikgo, pero nakamaxki latamat nema ni kgalhi xlisputni tiku nakgalhakgaxmatkgo. (Kalikgalhtawakga Mateo 25:31-33, 46.)

Akgtum paraíso natlawa Katiyatni. Nachuna, nakamalakastakwani tiku nikgonita xlakata na xatapaxuwan nalatamakgo kparaíso. (Kalikgalhtawakga Lucas 23:42, 43.)