UMA tuku xmatsekgkanit, tekgska marzo kata 1961, xkgalhi liwaka akgtati ciento, katuwa xlitlawakanit cobre. Xmatsekgkanit niku lanka xtaskganit sipi chu xlitamakgchinit xachankat sakgat. Xwi coronas, cetros, liskujni, likan xla soldados chu atanu. Uma tuku tekgska lu xlakakaskinka akxilhkgo tiku likgalhtawakgakgo, xlakata Génesis 4:22 lichuwinan Tubal-caín, «tiku katuwa tuku litlawa cobre chu likan».

Maski lhuwa takgalhskinin wi xlakata la kilhtsukulh chu tuku lanit xlakata nema tekgska kNahal Mishmar, uma limasiya pi makgasata xmaxtukan cobre, xmastalankikan chu katuwa tuku xlitlawakan ktiyat nema lichuwinan Biblia.

Akxni israelitas xʼamakgolh tanukgo kTiyat nema xʼamaka kamaxkikan, Moisés kawanilh: «[Kxka]sipijni namaxtuya cobre» (Deuteronomio 8:7-9). Arqueólogos tekgskgonit lhuwa niku xwi chu niku xmastalankikan cobre kʼIsrael chu Jordania, kachikinin la Timna, Khirbat kNahas chu Feinan. ¿Tuku kinkamasiyaniyan uma?

Anta kʼFeinan chu Timna, lhuwa anan niku maxtukanit cobre nema ni lu pulhman, atsinu ni akgtiy mil kata chuna tlawakanit. Asta la uku, tiku ankgo paxialhnankgo tlan akxilhkgo xamakxtaknin chiwix, uma wamputun pi kaniwa niku xʼanan cobre. Xapulana tiku xmaxtukgo cobre maxtukgolh niku ni pulhman wi chu xlimaxtukgo chiwix. Pero akxni sputli cobre mapulhmanikgolh pozos chu lhuku, limaklakaskinkgolh liskujni xalikan. Klibro bíblico xla Job lichuwinan niku xliskujkan minas (Job 28:2-11). Uma taskujut lu tuwa xwanit. Ksiglo III chu V mapakgsinanin xalak Roma anta xkamalakgachakgo tiku xmakgninankgo chu lixkajni xlikatsikgo, niku xwilakgolh minas xla cobre kʼFeinan.

Lhuwa tuku akgataxtulh anta wilakgolh kKhirbat kNahas (wamputun «ruinas xla cobre») uma limasiya pi anta lhuwa xmastalankikan cobre. Arqueólogos lakpuwankgo pi chiwix ni makgat niku xliminkanacha la kminas xla Feinan  chu Timna. Cobre chu chiwix xkamastalankikan khorno xla carbón nema wi tuku xlisunukan xlakata namapasikan hasta nachan 1.200°C, akgtsayan o akgkaw horas chuna xtlawakan. Akgkitsis kilos xtalakaskin chiwix xlakata namaxtukan akgtum kilo cobre, lhuwa tuku xlitlawakan.

Ksipi Sinaí, Jehová limapakgsinalh pi cobre xlimaklakaskinka akxni xtlawaka tabernáculo, alistalh nachuna tlawaka templo (Éxodo, capítulo 27). Max israelitas xkatsinikgo la limaklakaskinkgo cobre akxni nina xchankgo kʼEgipto, o max anta katsinikgolh. Komo chuna o nichuna, akxni xtaxtukgonitku kʼEgipto tlawakgolh aktsu toro chu lhuwa tuku xla cobre xtamaklakaskin ktabernáculo, la ollas, sartenes, palas chu tenedores (Éxodo 32:4).

Akxni xlamakgolh kdesierto, max lakatsu kPunón, niku lu lhuwa anan cobre, (max anta niku uku kFeinan), israelitas nialh xatapaxuwan xwakgo maná chu xlakata ni lu xʼanan chuchut. Xlakata nakamalakgaxokge Jehová, kamalakgachanilh luwa nema xmakgninankgo chu lhuwa israelitas nikgolh. Akxni skinkgolh pi xkatapatika, Moisés kapalakachuwinalh. Wa xlakata, Jehová limapakgsilh Moisés pi xtlawalh tantum luwa xla cobre chu xmawakalh kkgantum kiwi. Biblia wan: «Komo tantum luwa kxkanit chatum chixku, chu xla xʼakxilha luwa xla cobre ni xniy» (Números 21:4-10; 33:43).

Mapakgsina Salomón lhuwa maklakaskilh cobre xlakata natlawa templo xalak Jerusalén. Lhuwa nema xkgalhi wa xmastokgnit xtlat, mapakgsina David, akxni xtlajanit Siria (1 Crónicas 18:6-8). Mar, nema lu lanka niku xmujukan chuchut chu wa xmaklakaskinkgo sacerdotes, max tlan xmujunikan 66.000 litros chuchut chu max 30 toneladas xlitsinka xwanit (1 Reyes 7:23-26, 44-46). Na xyakgolh akgtiy laklanka pilares niku xlaktanukan ktemplo. Xpulaklhukunkgo chu 7,5 centímetros xlitulunka xwanit, 1,7 metros xlikgelanka xwanit, 8 metros xlitalhman xwanit chu kxokgspun xkgalhi nema wanikan capiteles 2 metro xlitalhman (1 Reyes 7:15, 16; 2 Crónicas 4:17). Kaks kinkamalakawaniyan la xlilhuwa maklakaskinka cobre xlakata xtlawaka putum uma.

Nachuna, lhuwa latamanin xmaklakaskinkgo cobre. Biblia lichuwinan likan nema xlimakgninankan, nema xkalimakachikan tiku xtanumakgolh kpulachin, malakcha chu tuku xlitlakgnankan (1 Samuel 17:5, 6; 2 Reyes 25:7; 1 Crónicas 15:19; Salmo 107:16). Jesús lichuwinalh linkan tumin xla cobre anta kbolsa chu apóstol Pablo lichuwinalh «Alejandro wanti liskujkgoy tlawakgoy pailas» (Mateo 10:9; 2 Timoteo 4:14, TXS, 1999).

Arqueólogos chu historiadores lhuwa takgalhskinin kgalhikgo xlakata nema litatlawanit cobre nema talichuwinan kBiblia, pero tlakg lichuwinalh tuku tekgska kNahal Mishmar nema lhuwa xtapalh. Pero, chuna la lichuwinan Biblia: tiyat nema kamaxkika israelitas xlikana lu «tlan tiyat» xwanit, chu kxsipi lhuwa cobre maxtukgolh (Deuteronomio 8:7-9).