Klakachilh kkachikin wanikan Bilbao kxnorte España, niku xʼanan tsinu tumin; kinkgalhtatikan xakwanitaw chu akit xlichatiy. Lu católicos xakwanitaw kkinchik chu chali chali xakanaw kmisa. Akxni kmakgatsilh 23 kata makgalhtawakgena kwa. Wa kintaskujut xwanit chu tipuxum kata kliskujli. Na xakmasiya tuku xla Takanajla, uma lu tlan xkimamakgkatsini. Nachuna, kakgotanun xakkamakgtaya laktsuman xlakata tlan xtlawakgolh primera comunión.

Akxni kintamakgaxtokgat makgatsilh akgkutiy kata, nilh kinchixku chu ktsukulh kakuentajtlawa kgalhtati kilaktsuman. Kajku 33 kata xakkgalhi. Maski kputsalh nakimakgtayakan kkintakanajla, ni xaktekgsa xtakgalhtin kintakgalhskinin: ¿Tuku xlakata chuntiya niyaw xlakata Jesús kinkalakgmaxtun kkalinin? ¿Tuku xlakata skiniyaw Dios kamilh xTamapakgsin komo tiku tlan likatsikgo ankgo kʼakgapun? Chu komo Dios kinkatatlawayan kuenta akxni niyaw, ¿tuku xlakata nataxtuparayaw kʼakgapun, niku kamakglhtinikan xtalakgalhinkan latamanin, o kpupatin kaj xlakata xaʼawatiya nakinkatalakkaxlaparakanan?

Kkatlawanilh takgalhskinin lhuwa sacerdotes. Chatum kinkgalhtilh: «Ni kkatsi. Kakgalhskinti obispo. Wix na kanajlaniya Dios, ¿ni chuna? Kaj wa uma talakaskin». Chuntiya xakputsama takgalhtin, wa xlakata xakkatatamakxtumi jesuitas, pentecostales chu gnósticos, pero takgalhtin nema xkimaxkikgo ni putum xakkanajla.

Liwakaya 60 kata xakkgalhi akxni chatum aktsu tsumat tiku xakmakgalhtawakgema nema xkgalhi akgtujun kata, kiwanilh xaktaʼalh kxtamakxtumitkan xtatayananin Jehová. Maski klakgatilh tuku kakxilhli chu kkgaxmatli, lu lhuwa taskujut xakkgalhi wa xlakata nialh kkaputsalh. Akgtiy kata titaxtulh, chatiy xtatayananin Jehová tiku xkawanikan Juan chu Maite tlakgkgolh kimalakcha. Akgtutu papaʼ kinkgalhtikgolh takgalhskinin nema xakkgalhi asta chalh kilhtamaku akxni ktsukulh katalikgalhtawakga Biblia.

 ¡Lu xaklakaskin pi xchalha kilhtamaku akxni xkimakgalhtawakgekgolh xtatayananin Jehová! Liwana xaklakputsanan, maktutu biblias xakmaklakaskin xlakata liwana xakkatsiputun pi xlikana tuku xkimasiyanimakgo. Lu tunkun kkatsilh pi ni xaxlikana tuku makgas xakkanajlanit. Lu kaks klilakawa akxni kakxilhli pi lu tanu tuku xakkanajla chu tuku xmasiya Biblia. Pero lu nitlan xakmakgkatsi, xaklakpuwan pi kintakanajla la kgantum lanka kiwi chu asta kxtankgaxekg xmatikutumaka.

Xlichatiy kinchixku tatatlalh chu nilh. Uma kilhtamaku ktajubilarlilh chu nialh anta klatamalh kBilbao tsinu kilhtamaku. Juan chu Maite na alakatanu ankgolh. Kmakgxtakgli kintakgalhtawakga xalak Biblia, pero liwana xakkatsi pi xaktekgsnit nema lu lanka xtapalh chu putum kilhtamaku tamakgxtakgli kkintalakapastakni.

Akgpuxum kata titaxtulh akxni xakkgalhi 82 kata, Juan chu Maite taspitkgolh kBilbao chu kilakgapaxialhnankgolh. ¡Lu kpaxuwalh! Kkatsilh pi Jehová chuntiya xkilakapastaka, wa xlakata ktsukupa kgalhtawakga. Juan chu Maite ni kilitlakgwankgolh xlakata watiya takgalhskinin xakkatlawani. Xakkgaxmatputumpara tuku xwan Biblia xlakata tlan xakmakgxtakgli takanajla nema xakkgalhi. Nachuna, xakkatsiputun la xakkalitachuwinalh xaxlikana kifamilias chu kiʼamigos.

Akxni xakkgalhi 87 kata, ktamunulh kxalanka tamakxtumit xla xtatayananin Jehová. Lu ni makgtum chuna xakkgalhinit tapaxuwan la ama kilhtamaku. Kimputumkan tiku xakamaw tamunuyaw kkgaxmatwi lu stlan taʼakgchuwin. Kimakgatasalh tiku mastalh taʼakgchuwin. Xtachuna la Jehová xkintachuwinama. Akxni ktamunulh, lhuwa xtatayananin Jehová kilakgminkgolh chu kiwanikgolh lakwan tachuwin, maski lhuwa tiku ni xkilakgapaskgo.

Putum kilhtamaku xakkatsi pi Jesús «wa ntiji» (Juan 14:6). Xlakata klikgalhtawakgalh Biblia kimaxkilh talakaskin tlakg naklakgapasa Jehová, tiku Jesús kinkalitachuwinanan. La uku tlan ktlawani oración la chatum kinTlat chu kiʼAmigo. Xlakata klikgalhtawakgalh libro Acerquémonos a Jehová * lu lakgpalinit kilatamat. Akxni xapulana klikgalhtawakgalh akgtum tsisni klikgalhtawakgakgolh. Lu tlan kmakgkatsilh akxni kkatsilh pi lu lakgalhamaninan.

Akxni klakapastaka xlakata la xlilhuwa kilhtamaku kputsalh xaxlikana klakapastaka xtachuwin Cristo: «Kaskintit, na nakamaxkikanatit; kaputsatit, na natakgsatit; kachuwinantit, na nakamalakkinikanatit» (Mateo 7:7). Xlakata la uku ktekgsnit takgalhskinin nema lu xakputsama, kkalitachuwinan amakgapitsi chu lu kimakgapaxuwa.

Maski la uku kkgalhi 90 kata, la aktsu tsumat kmakgkatsi xlakata takanajla. Akxni kan kpukgalhtawakga xla xtatayananin Jehová lu xlakaskinka kakxilha, lhuwa tuku kkatsini chu lu kpaxuwa xlakata kkatatawila kinatalan tiku lu kkapaxki. Anta kParaíso nema Dios nakinkamaxkiyan kmakgalhtawakgenamputumpara (Apocalipsis [Revelación] 21:3, 4). Chu lu kakxilhputun kifamilias tiku nikgonita (Hechos 24:15). Na tlan nakkamasiyani xaxlikana chu nakkalitachuwinan tamaskiwin nema Jehová kimaxkinit maski klina kata.