Dios chatum espíritu tiku nila akxilhkan. Wa tlawalh akgapun, Katiyatni chu putum tuku staknan. Xla niti tlawalh; nitu xkilhtsukut (Salmo 90:2). Lakaskin pi latamanin kaputsakgolh chu kakatsikgolh tuku xaxlikana xlakata Dios. (Kalikgalhtawakga Hechos 17:24-27.)

Dios kgalhi xtukuwani chu tlan nalakgapasaw makgapitsi xtayat akxni naʼakxilhaw tuku tlawanit (Romanos 1:20). Pero xlakata tlakg liwana nalakgapasaw talakaskin nalikgalhtawakgayaw xTachuwin, Biblia. Chuna nalakgapasaw lakwan xtayat. (Kalikgalhtawakga Salmo 103:7-10.)

Jehová ni akxilhputun akxni tlawakan tuku ni xaʼakgstitum chu kinkatlawanitan xlakata nalimasiyayaw xtayat (Deuteronomio 25:16). Wa xlakata kilhuwakan ni akxilhputunaw akxni tlawakan tuku ni xaʼakgstitum. Ni wa xkuenta Dios akxni tlawakan tuku ni xaʼakgstitum. Xla maxkinit talakaskin chixku nalaksaka tuku natlawa pero lhuwa latamanin nitlan maklakaskinkgo uma chu tlawakgo tuku ni xlilat. Jehová nitlan limakgkatsi akxni chuna tlawakan. (Kalikgalhtawakga Génesis 6:5, 6 chu Deuteronomio 32:4, 5.)

Jehová paxki tuku xaʼakgstitum, wa xlakata ni putum kilhtamaku katimastalh talakaskin naʼanan tuku nitlan (Salmo 37:28, 29). Biblia wan pi nialh makgas namasputu tuku ni xaʼakgstitum. (Kalikgalhtawakga 2 Pedro 3:7-9, 13.)