Betania aktsu kachikin xwanit nema xwi max akgtutu kilómetros lakatsu kJerusalén (Juan 11:18). Anta lalh tuku lu nitlan akxni nialh lhuwa semanas xtsankga xlakata xnilh Jesús. Lázaro tiku lu tlan xtalalin Makgalhtawakgena, kaj lakapala chipalh tajatat chu nilh.

Akxni Jesús katsilh tuku xlanit, kawanilh kstalaninanin pi Lázaro kaj klhtatama chu xʼama malakastakwani (Juan 11:11). Pero akxni akxilhli pi ni akgatekgsnikgolh lakatanks kawanilh: «Ninita Lázaro» (Juan 11:14).

Akxni akgtatita kilhtamaku xmaknukanit, o xmujukanit, Jesús putsalh Marta, xtala tiku xninit, xlakata xmatliwakglhli. Marta wanilh: «Lapi uwit kawa xtawila, ni xtinilh nkintala» (Juan 11:17, 21). Jesús kgalhtilh: «Kit wa ntalakastakwan, chu latamat; wa nti nkit nkinkanajlaniy, maski xnilh, nalatamay» (Juan 11:25).

Xlakata xlimasiyalh pi tuku xlichuwinama xlikana xwanit Jesús talakatsuwilh niku xwi Lázaro chu wa: «¡Lázaro, kataxtu!» (Juan 11:43). Latamanin kaks lakawankgolh, xlakata Lázaro taxtulh niku xtanuma.

Jesús xkamalakastakwaninita chatiy lataman. Chatum tiku malakastakwanilh wa xtsumat Jairo, nachuna ama kilhtamaku Jesús wa pi aktsu tsumat kaj klhtatama (Lucas 8:52).

Akxni malakastakwanilh Lázaro chu xtsumat Jairo, Jesús wa pi kaj klhtatamakgolh, lu tlan tuku tamalakxtumilh. ¿Tuku xlakata? Xlakata akxni lhtatakan nitu lakapastakkan uma wamputun pi ni lakapastakkan tapatin chu takatsanajwa (Eclesiastés 9:5; kaʼakxilhti recuadro  «Linin xtachuna la liwana lhtatakan»). Xapulana kstalaninanin Jesús liwana xkatsikgo la xwilakgolh tiku xnikgonita. «Xlakan xʼakxilhkgo linin la akgtum talhtata, chu putaknun niku xjaxkgo [...] tiku xnikgonita  chu ni xmakgxtakgkgonit Dios» chuna wan Encyclopedia of Religion and Ethics. *

Tlan limakgkatsiyaw xlakata katsiyaw pi ni patinamakgolh tiku nikgonit; kaj lhtatamakgolh kputaknun. Xlakata katsiyaw tuku laniyaw akxni niyaw, linin nialh kinkamakgapekuanan.

Maski kimputumkan lakgatiyaw liwana nalhtatayaw katsisni, niti lakgati nalhtata putum kilhtamaku chu nialh nalakastakwanan. ¿Tlan nalatamaparakgo tiku nikgonit chuna la Lázaro chu xtsumat Jairo?

Job chatum kskujni Dios tlawalh akgtum takgalhskinin akxni xmakgkatsi pi xʼama niy: «Akxni chatum chixku [...] niy, ¿tlan nalatamaparay?» (Job 14:14).

Akxni Job kgalhskilh tiku kgalhi xliputum litliwakga, xakstu kgalhtika: «Wix nakixakgatliya chu akit nakkgalhtiyan. Xlakata tuku litlawanita mimakan nakgalhiputuna» (Job 14:15, Nueva Versión Internacional). Uma kskujni Dios liwana xkatsi pi Jehová xmalakastakwaniputun. ¿Kaj tamanixni tuku xlakapastaka? Ni.

Akxni Jesús kamalakastakwanilh latamanin, limasiyalh pi Dios maxkinit litliwakga xlakata natlaja linin. Biblia lichuwinan pi Jesús kgalhi kxmakan «limalakkin [...] nkalinin» (Apocalipsis 1:18). Wa nalimalakki kkalinin, chuna la limapakgsinalh pi xmakgenuka chiwix nema xlilakgatalakanit niku xtanuma Lázaro.

Biblia makglhuwa lichuwinan xlakata talakastakwanat. Akgtum liʼakxilhtit, chatum ángel wanilh palakachuwina Daniel: «Najaxa, pero natakiparaya kxaʼawatiya kilhtamaku» (Daniel 12:13). Jesús kawanilh saduceos, xpulalinanin takanajla tiku ni xkanajlanikgo talakastakwanat: «Kaj takgskgawiyatit wixin, mpi ni lakgapasatit ntatsokgnun, chu xlitliwakga Dios» (Mateo 22:23, 29). Apóstol Pablo wa: «Na kkgalhkgalhitiniy Dios [...] mpi nalakastakwanankgoy ninin wanti xalakwan chu nti ni xalakwan» (Hechos 24:15).

¿Tuku kilhtamaku nalakastakwanankgo wanti xatlan, chu wanti nitlan xtayat? Chuna la wanilh ángel palakachuwina Daniel, «kxaʼawatiya kilhtamaku». Marta xlakpuwan pi xtala, Lázaro, xʼama lakastakwanan «awatiya kilhtamaku» (Juan 11:24).

Biblia tamalakxtumi «kxaʼawatiya» kilhtamaku xtamapakgsin Jesús. Pablo tsokgli: «[Cristo] namapakgsinan, asta ni liwayaj wilinit nawan xlipaks xtalatlawananin kxtampin xtuwan [o xtantun]. Wa ntu xlikgatsputni, talatlawanan [...], wa linin wantu nalaktlaway» (1 Corintios 15:25, 26). Uma lu kinkamatliwakglhan xlakata naskiniyaw Dios pi kamilh xTamapakgsin chu kalalh xtalakaskin kKatiyatni. *

Chuna la liwana xkatsi Job, Dios kamalakastakwaniputun tiku nikgonit. Akxni nachan ama kilhtamaku, linin nalakgsputa, chu nialhti katikgalhskinka: «¿Anta sputa latamat akxni niyaw?».