Komo maktum libro matsokgninalh Dios xlakaskinka xliwanat, chu Biblia xlakaskinka. Lhuwa millones tlawakanit chu kʼakglhuwa ciento tachuwin. Nachuna, liskgalala nema wi kBiblia kgalhi litliwakga xlakata tlan kalakgpali latamanin. (Kalikgalhtawakga 1 Tesalonicenses 2:13; chu 2 Timoteo 3:16.)

Liwana katsiyaw pi Biblia wa xtachuwin Dios xlakata liwana kinkawaniyan tuku nala, tuku latamanin nila tlawakgo. Akgtum liʼakxilhtit, kʼakgtum lhuku lakatsu kmar Muerto tekgska xacopia xlibro Isaías nema tsokgka liwaka akgtum ciento kata akxni nina xlakachin Jesús. Anta xlichuwinan pi kBabilonia nialhti xʼama latama. Uma tuku xlichuwinankanit kgantaxtulh akxni lhuwata kata xninita Jesús. (Kalikgalhtawakga Isaías 13:19, 20 chu 2 Pedro 1:20, 21.)

Akgtum mil akgchaxan ciento kata, max tipuxum lakchixkuwin tsokgkgolh Biblia, watiya tema lichuwinankgolh chu akxtum tuku wankgolh. ¿La chuna tlawakgolh? Wa Dios tiku kapulalilh. (Kalikgalhtawakga 2 Samuel 23:2.)

Maski milh kilhtamaku akxni Dios katachuwinalh tiku tsokgkgolh Biblia chu kalimaklakaskilh ángeles, kamalakawanika chu kamamanixnika, pulana xkawilini kxtalakapastaknikan chu xlakan xlakkaxwilikgo xlakata tlan xtsokgkgolh. (Kalikgalhtawakga Apocalipsis [Revelación] 1:1; 21:3-5.)