Wa xaPulana Guerra xLikalanka Katiyatni sputli 11 xla noviembre kata 1918. Latamanin malakchuwakgolh xnegocioskan chu ankgolh tantlikgo ktiji. Pero ni makgas kilhtamaku paxuwakgolh. Atanu tuku tlakg nitlan xlama kkakilhtamaku, nixawa ametralladora.

Kpapaʼ junio kata 1918 niku xtlawamakgo guerra franceses taxtulh lu nitlan tajatat wanikan gripe española, chu lu lakapala tasiyalh pi lu lixkajni tajatat xwanit. Ni akglhuwa papaʼ titaxtulh tlakg lhuwa soldados xalak Estados Unidos kamakgnilh kFrancia nixawa xtalatlawananin. Chu soldados tiku taspitkgolh kxchikkan xkapasanita uma tajatat chu malakgatumikgolh kputum katiyatni.

Akxni sputli guerra analh tatsinksni chu nialh kgalhikgolh tumin. Atsinu ni xliputum Europa akxni sputli guerra latamanin xnimakgolh xlakata ni xkgalhikgo tuku xwakgo. Kata 1923, xtuminkan alemanes nialh lhuwa xkgalhi xtapalh. Akxni titaxtulh akgchaxan kata, xlikalanka katiyatni kachikinin nialh lhuwa tumin kgalhikgolh. Chu kata 1939 tsukulh xliʼAkgtiy Guerra xLikalanka Katiyatni, nema makgatsilh xapulana guerra. ¿Tuku xlakata lalh umakgolh laklanka guerra?

Tuku lichuwinan Biblia pi xʼama la kinkamakgtayayan nakatsiyaw tuku xlakata ananit tuku nitlan chu xaPulana Guerra xLikalanka Katiyatni. Jesús wa pi xʼama min kilhtamaku akxni kachikinin xʼama latalachipa chu xʼama anankgo tajatat nema xkamakgnikgolh lhuwa latamanin chu klhuwa kachikinin ni xʼama anan tuku wakan (Mateo 24:3, 7; Lucas 21:10, 11). Kawanilh kstalaninanin pi tuku nitlan wa  xʼama litasiya xaʼawatiya kilhtamaku. Xaʼawatiya libro xalak Biblia, Apocalipsis (o Revelación) tlakg lichuwinan xlakata xaʼwatiya kilhtamaku, niku wan pi tapatin nema anan kKatiyatni litsukulh guerra nema lalh kʼakgapun. (Kaʼakxilhti recuadro  «Guerra kKatiyatni, guerra kʼakgapun».)

Uma libro xla Apocalipsis lichuwinan kgalhtati tiku kgewilakgolh kawayu. Kgalhtutu litaxtukgo tuku nitlan lama nema lichuwinalh Jesús: guerras, tatsinksni chu tajatat nema kamakgni lhuwa latamanin. (Kaʼakxilhti recuadro  «¿Matlawanimakgo xkawayujkan kgalhtati tiku kalichuwinan Apocalipsis?».) Liwana tasiya pi xaPulana Guerra xLikalanka Katiyatni limilh lhuwa tapatin nema wi asta la uku. Biblia lichuwinan pi wa xkuenta Akgskgawini (1 Juan 5:19). ¿Wi tiku tlan namachokgo?

Libro xla Apocalipsis liwana wan pi Akgskgawini «kaj tsinu kilhtamaku nkgalhiy» (Apocalipsis 12:12). Wa xlakata lu sitsinit chu tlawama pi kaʼanalh lhuwa tapatin kKatiyatni. Xlikana, tapatin nema akxilhaw kkakilhtamaku limasiya pi sputma xkilhtamaku Akgskgawini.

Wa xaPulana Guerra xLikalanka Katiyatni lakgpalilh kakilhtamaku. Litsukulh lhuwa guerras, latamanin  tsukukgolh talatlawakgo mapakgsinanin chu nialh kalipawankgolh. Na liwana litasiya pi Satanás maxtukancha kʼakgapun (Apocalipsis 12:9). Tuku tlawama uma xmapakgsina kakilhtamaku nema ni akxilhaw litaxtu la chatum mapakgsina tiku lu lixkajni likatsi xlakata katsi pi sputmaja xtamapakgsin. Akxni nasputa xkilhtamaku, nasputa tuku nitlan nema matsukilh xaPulana Guerra xLikalanka Katiyatni.

Tuku wan Biblia pi xʼama la kinkamakgtayayan nalipawanaw pi Jesucristo, kiMapakgsinakan xalak akgapun, nialh makgas «namalakgsputuy xtatlaw akgskgawini» (1 Juan 3:8). La uku, latamanin skinkgo kxoracioneskan pi kamilh uma Tamapakgsin. ¿Chu wix? Xlakata uma tamapakgsin, latamanin tiku tlan likatsikgo naʼakxilhkgo akxni nakgantaxtu xtalakaskin Dios kKatiyatni chu ni xtalakaskin Akgskgawini (Mateo 6:9, 10). Anta kxTamapakgsin Dios, nikxni natlawaparakan guerra xlikalanka katiyatni chu nipara atanu guerra (Salmo 46:9). Tlakg kakatsini xlakata uma Tamapakgsin chu nalatapaya xlakata naʼakxilha akxni naʼanan takaksni kkatiyatni (Isaías 9:6, 7).